လါဖ့ၤဘြူၤအါရံၤ(၂၄)သီ,၂၀၂၅နံၣ်
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုး ကမၤ၀ဲဒုးယၤရဲၣ်ကျဲၤတဖၣ်အဂီၢ် ဆှၢပၥ်တူၣ်ရကံၣ်ဒြိအခိၣ်(၈၀၀)ဘျဲၣ်ဆူ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူပျၥ်ယၥ်, ကီးတရံးကီၢ်ဆၣ်ပူၤအဂ့ၢ် သုးဂ့ၢ်၀ီဂံၢ်ထံးတၢ်ကစီၣ်တဖၣ်စံး၀ဲန့ၣ်လီၤ.
တၢ်ဘံၣ်တၢ်ဘၢအဂီၢ် သုးကီၣ်ကးအသုးတဖၣ် ကွၢ်ဟုၣ်ကွၢ်စုၥ်တၢ်ဒီးဒြိတဖၣ် လၢကီးတရံးကီၢ်ဆၣ်အဃၢၤ၀း၀းဖဲဟါ(၅)နၣ်ရံၣ်တုၤဂီၤ(၄)နၣ်ရံၣ်ဆၢကတီၢ်အသိး နဘူ(၅၄၉)သုးစ့ၢ်ကီးကွၢ်ဟုၣ်ကွၢ်စုၥ်တၢ်ဒီးဒြိတဖၣ်တုၤဂီၤ(၂)နၣ်ရံၣ်အဂ့ၢ် စံး၀ဲန့ၣ်လီၤ.
သုးကီၣ်ကးအသုးဒီးတၢ်ပၢၢ်ဆၢသုးပၥ်ဖှိၣ်အဘၢၣ်စၢၤ တၢ်ဒုးဆူၣ်ထီၣ် ဖဲအ့ရှၢကျဲမုၢ်အဖီခိၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး ဖဲလါဖ့ၤဘြူၤအါရံၤ(၂၂)သီအနံၤန့ၣ် တၢ်ဒုးကဲထီၣ်သးလၢ ရွ့ၣ်ကၠဲးမ့ဒီးထါပ့ၣ်ကိလၢအိၣ်ကီးတရံးကီၢ်ဆၣ်ပူၤ၀ံၤ တၢ်ပၢၢ်ဆၢသုးတပၤစ့ၢ်ကီး ခးစၢၤ၀ဲဒၣ်လၢ ကျိဖးဒိၣ်အဂ့ၢ်တၢ်သ့ၣ်ညါဘၣ်န့ၣ်လီၤ. တကးဘၣ် တၢ်ဘၣ်သဂၢၢ်ခးလိၥ်သးတဖၣ်စ့ၢ်ကီး အိၣ်ထီၣ်၀ဲဒၣ်လၢ တတၣ်ကူတပၤအဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
သုးကီၣ်ကး အီၣ်စ့ၣ်ယၣ်သုးကျိၤဟဲထီၣ်သုးကျိၤတဖၣ် ဖဲအ့ရှၢကျဲမုၢ်အဆၢကတီၢ် အသိလ့ၣ်ဘၣ်ဟးဂီၤကွံၥ်၀ဲခဲလၢၥ်ပၥ်ဖှိၣ်(၁၄)ခိၣ်၀ံၤ ဖဲလါဖ့ၤဘြူၤအါရံၤ(၂၂)သီအနံၤန့ၣ်သုးကီၣ်ကးအသုးဂံၢ်ဘါအိၣ်(၇၀)က့ၤဆှၢ၀ဲ သိလ့ၣ်ဟးဂီၤတဖၣ်ဆူ ဖၣ်အၣ်တပၤအဆၢကတီၢ် BGFသိလ့ၣ်ခံခိၣ်ဟံးန့ၢ်တၢ်ဘံၣ်တၢ်ဘၢအဂ့ၢ် တၢ်သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါဖဲလါဖ့ၤဘြူၤအါရံၤ(၂၂)သီအနံၤ,ဂီၤအဆၢကတီၢ်စ့ၢ်ကီးသုးကီၣ်ကးအသုးလၢအိၣ်ဖဲကၠိၣ်ဒိ၀့ၢ်(၅၄၅)သုးဂံၢ်ဘါအိၣ်(၄၀)ဃၣ်ဃၣ် သုးသိလ့ၣ်(၂)ခိၣ်ဟးထီၣ်၀ဲဒၣ်ဖဲ အ့ကၠံသ၀ီကျဲဒီးလဲၤထီၣ်ဆူ ၀့ၢ်ကီးတရံးတပၤအဂ့ၢ် သုးဂ့ၢ်၀ီဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
