လါဖ့ၤဘြူၤအါရံၤ(၁၂)သီ,၂၀၂၅နံၣ်
ပှၤအံၣ်စရ့ဖိလၢ ဟါမးကရၢဖီၣ်ဃၥ်အီၤတဖၣ် တၢ်ကပၥ်မုၢ်ဘူၣ်အနံၤဒ်အစဲးခံကတၢၢ်၀ံၤ တၢ်မ့ၢ်တပျၢ်ကဒါက့ၤဘၣ်န့ၣ် တၢ်ကမၤဟးဂီၤကွံၥ်တၢ်ပတုၥ်တၢ်ခးအဂ့ၢ် အမဲရကၤကီၢ်ခိၣ် Donald Trump ဆီၣ်တခူထီၣ်ဃၥ်၀ဲန့ၣ်လီၤ.
“အံၣ်စရ့ကဘၣ်ဆဲတဲၥ်၀ဲဘၣ်ဆၣ် မ့မ့ၢ်ယၤတခီဒု အစဲးခံကတၢၢ် မုၢ်ဘူၣ်အနံၤ, မုၢ်ထူၣ်(၁၂)နၣ်ရံၣ်မး တၢ်မ့ၢ်တပျၢ်ကဒါက့ၤ ပှၤအံၣ်စရ့ဖိလၢဘၣ်တၢ်ဖီၣ်အီၤတဖၣ်န့ၣ် ကမၤဟးဂီၤကွံၥ် တၢ်ပတုၥ်တၢ်ခးအဂ့ၤကတၢၢ်လီၤ”အဂ့ၢ် ကီၢ်ခိၣ်ထရဲး တဲလီၤ၀ဲဆူ ပှၤထၢတၢ်ကစီၣ်ဖိတဖၣ်အအိၣ်န့ၣ်လီၤ.
အံၣ်စရ့မၤကမၣ် တၢ်ပတုၥ်တၢ်ခးတၢ်အၢၣ်လီၤအဂ့ၢ် ဟါမးပဲၥ်အၢပဲၥ်သီ၀ံၤ ပတုၥ်ကွံၥ်၀ဲ တၢ်ပျၢ်ကဒါက့ၤ ပှၤလၢဘၣ်တၢ်ဖီၣ်ဃၥ်အီၤတဖၣ်တၢ်ရဲၣ်တၢ်ကျဲၤ၀ံၤအလီၢ်ခံ ကီၢ်ခိၣ်ထရဲး တဲလီၤ၀ဲဒ်အံၤန့ၣ်လီၤ.
မ့မ့ၢ်လၢ ဟါမးတခီ ဒ်သိးပှၤလၢဘၣ်တၢ်ဖီၣ်ဃၥ်အီၤတဖၣ် ကထူၣ်ဖျဲးထီၣ်အဂီၢ် တၢ်ကပၥ်ကဲ တၢ်ပတုၥ်တၢ်ခးတၢ်အၢၣ်လီၤအံၤအဂီၢ် တဲခီၣ်ဆၢက့ၤ၀ဲ မဟါအနံၤန့ၣ်လီၤ. ခီဖျိ ကီၢ်ခိၣ်ထရဲးအတၢ်တဲလီၤအဃိ တၢ်ပတုၥ်တၢ်ခးတၢ်အၢၣ်လီၤလၢ ကမၣ်တသ့နီတစဲးအံၤ ဘံဘူစဲၤသၢအါထီၣ်သ့အဂ့ၢ် ဟါမးကရၢ ပတီၢ်ထီလီၢ်လၤအိၣ် Sami Abu Zuhri Reuters တဲလီၤ၀ဲဆူ AFPတၢ်ကစီၣ်သန့အအိၣ်န့ၣ်လီၤ.
တၢ်မၤတၢ်ပတုၥ်တၢ်ခး၀ံၤအလီၢ်ခံ ပှၤပၣ်လဲးစတဲးဖိလၢအကထိကလးတဖၣ် က့ၤဆူအိၣ်ဆိးလီၢ်ကျဲဘၣ်ဆၣ် ပှၤလၢကက့ၤဆူ ကၣ်စၣ်ကလံၤစိးဟီၣ်က၀ီၤတပၤတဖၣ် အံၣ်စရ့မၤတံၢ်တံၥ်အီၤအဂ့ၢ် ဟါမးတပၤစံး၀ဲ၀ံၤ တၢ်တပျၢ်ကဒါက့ၤ ပှၤလၢဘၣ်တၢ်ဖီၣ်ဃၥ်အီၤတဖၣ်လၢၤဘၣ်အဂ့ၢ် ဟါမးကရၢ ဘိးဘၣ်ရၤလီၤ၀ဲဖဲ မဟါအနံၤန့ၣ်လီၤ.
Ref: VOA
