လါဖ့ၤဘြူၤအါရံၤ(၁၁)သီ, ၂၀၂၅နံၣ်
၂၀၂၅နံၣ်, လါဖ့ၤဘြူၤအါရံၤ(၁၁)သီအနံၤလၢအလီၤဘၣ် ကညီဒီကလုၥ်မုၢ်နံၤဆၢက့ၤအလီၢ်(၇၇)၀ီတ၀ီ အမူးတၢ်ရဲၣ်တၢ်ကျဲၤ တၢ်မၤအီၤဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, လီၢ်ခၢၣ်သး၀ဲၤလီၢ်ခိၣ်သ့ၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သး ပၥ်ဖျါဃၥ်၀ဲန့ၣ်လီၤ.
ဖဲ၁၉၄၈နံၣ်, လါဖ့ၤဘြူၤအါရံၤ(၁၁)သီအနံၤန့ၣ် ကညီကလုၥ်လၢကီၢ်ဒီဘ့ၣ်, တၢ်လီၢ်အါတီၤဒီးလၢ၀့ၢ်အါဖျၢၣ် ပှၤနီၣ်ဂံၢ်(၄)ကလီၢ်ဘျဲၣ်တဖၣ် ပၥ်ဖှိၣ်ထီၣ်သး၀ံၤ ကိးသတြီထီၣ်ဆူ ဖဆပလပဒိၣ်အအိၣ်ဒ်အမ့ၢ်
(၁)ဟ့ၣ်ကညီကီၢ်တဘျီဃီ
(၂)ဒုးနဲၣ်ကညီတဘးပယီၤတဘးတဘျီဃီ
(၃)ထံလီၢ်ကီၢ်ပူၤတၢ်ဒုးတၢ်ယၤပတသးလီ
(၄)ကလုၥ်တၢ်သဘံၣ်ဘုၣ်ပတသးလီတဖၣ်န့ၣ်လီၤ.
တၢ်ကိးသတြီ(၄)ထံၣ်လၢအမ့ၢ် တၢ်စံၣ်ညီၣ်ပၢလီၤသးခွဲးယၥ်, ကလုၥ်တၢ်ထဲသိးတုၤသိးခွဲးယၥ်, တၢ်မုၥ်တၢ်ခုၣ်ဒီးအိၣ်မူသကိးဘၣ်လိၥ်ဖိးဒ့အိၣ်ဒီးတၢ်ပၥ်ပနီၣ်ပၥ်ကဲလိၥ်သးတဖၣ် ကစုဒုဒီးဟးးဆှၣ်ပၥ်ဖျါထီၣ်၀ဲ ပှၤကညီအထံရူၢ်ကီၢ်သဲးအတၢ်မိၣ်န့ၢ်သးလီဒီးကညီကလုၥ်တဖၣ်အတၢ်ပၥ်သးတဖၣ်န့ၣ်လီၤ.
တၢ်ကသ့ၣ်နီၣ်,ပၥ်ဒိၣ်, မၤလၤကပီၤမုၢ်နံၤအံၤ ထီဘိလၢကညီတၢ်စံၣ်စိၤတဲစိၤပူၤအဂီၢ် ဖဲ”ကီၢ်သူလ့ၤခီးကရဲးအဆိကတၢၢ်တဘျီ” လၢဘၣ်တၢ်မၤအီၤဖဲ ၁၉၅၃နံၣ်လါနိၣ်၀့ဘၢၣ်(၂၃)တုၤ(၂၅)သီအနံၤ, တၢ်ပၥ်ပနီၣ်အီၤဒ်အမ့ၢ် “ကညီဒီကလုၥ်မုၢ်နံၤ” အသိးန့ၣ်လီၤ.
ကညီဒီကလုၥ်မုၢ်နံၤဆၢက့ၤအလီၢ်(၇၇)၀ီတ၀ီအမူးတၢ်ရဲၣ်တၢ်ကျဲၤအံၤအပူၤ ခ့ၣ်အဲၣ်ယူၣ်-ပှၤပၢၤလီၢ်ဆ့ၣ်နီၤ ပဒိၣ်စီၤကွဲၤထူ၀့, နဲၣ်ရွဲၣ်ခိၣ်ကျၢၢ် ပဒိၣ်စီၤတၢ်ဒိၣ်မူ, နဲၣ်ရွဲၣ်သဃဲၤ(၂)ပဒိၣ်စီၤလးထိဒီး လီၢ်ခၢၣ်သးထီဘိကမံးတံၥ်တဖၣ်, လီၢ်ခၢၣ်သးပၢဆှၢတၢ်ကမံးတံၥ်တဖၣ်, လီၢ်ခၢၣ်သးခိၣ်နၢ်တဖၣ်, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA), ကညီဒီကလုၥ်ဂၢၤသးကရၢ(KNDO), ၀ဲၤကျိၤ၀ဲၤဒ့ခိၣ်နၢ်တဖၣ်, ကလုၥ်ဒူၣ်အဂၤ ဒီး ထံဖိကီၢ်ဖိကမျၢၢ်တဖၣ်စ့ၢ်ကီး ဟဲထီၣ်မၤလၤကပီၤ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
