ပှၤကူၣ်သ့တဖၣ်အိၣ်ခိးကွၫ်၀ဲ မူဖျၢၣ်ဖိတခါလၢ နုာ်လီၤဘျၢၣ်ဟီၣ်ခိၣ်ဖျၢၣ်သ့

လါဖ့ၤဘြူၤအါရံၤ(၅)သီ,၂၀၂၅နံၣ်

ဘီမုၫ်စၢဖှိၣ်ကရၢ အတၫ်ကရၢကရိလၢဒီသဒၢမူဖျၢၣ်တဖၣ်န့ၣ် အိၣ်ခိးကွၫ်၀ဲ မူဖျၢၣ်ဆံးဖိလၢ တၫ်ဘၣ်ယိၣ်အိၣ်လၢ ကလီၤတဲာ်ဘျၢၣ်ဘၣ်၀ဲ ဟီၣ်ခိၣ်ဖျၢၣ်န့ၣ်လီၤ.

ယူရပၤ မူကပိာ်အ့ၣ်ကၠ့ၣ်စံၣ်တခီ မူဖျၢၣ်ဆံးဖိ၀ဲအံၤ ဖဲ၂၀၃၂နံၣ်,လါဒံၣ်စ့ဘၢၣ်(၂၂)သီအနံၤန့ၣ် ကခီတဲာ်၀ဲ ဟီၣ်ခိၣ်ဖျၢၣ်အကပၤ လၢ(၉၉)မျးကယၤ လၢတၫ်ပူၤဖျဲးအပူၤသ့၀ဲအဂ့ၫ် တဲဃာ်၀ဲဘၣ်ဆၣ် တၫ်လၢကဲထီၣ် အသးသ့လီၤတံၫ်လီၤဆဲးခဲလၢာ်တခီ တသ့ၣ်ညါ၀ဲဒံးဘၣ်အဂ့ၫ် တဲ၀ဲလီၤ.

မူဖျၢၣ်ဆံးဖိလၢအမံၤအိၣ်ဒ် 2024 YR4အံၤ ကနုာ်လီၤဘျၢၣ်ဟီၣ်ခိၣ်ဖျၢၣ်အဂီၫ် လၢကတီၫ်အံၤ တၫ်တယာ်၀ဲအဖီခိၣ် အိၣ်ထဲဒၣ်(၁.၃)မျးကယၤလီၤအဂ့ၫ် တဲ၀ဲလီၤ.မူဖျၢၣ်ဆံးဖိ၀ဲအံၤန့ၣ် ဖဲ၂၀၂၄နံၣ်,လါဒံၣ်စ့ဘၢၣ်(၂၇)သီအနံၤန့ၣ် မူကပိာ်ပှၤကူၣ်သ့တဖၣ် ထံၣ်န့ၫ်၀ဲလီၤ.

မူဖျၢၣ်ဆံးဖိလၢအက့ၫ်အဂီၤအိၣ်ထဲ မံထၢၣ်(၄၀)တုၤ(၆၀)အံၤ မ့ၫ်နုာ်လီၤဘျၢၣ်ဘၣ်ဟီၣ်ခိၣ်ဖျၢၣ်န့ၣ် တၫ်ဘၣ် ဒိဘၣ်ထံးကကဲထီၣ်အသးဒ်နူကလံယါမ့ၣ်ပိၫ်အသိးန့ၣ်လီၤ.ဘၣ်ဆၣ် မူဖျၢၣ်ဆံးအံၤ လီၤတဲာ်၀ဲသ့ဖဲပီၣ်လဲၣ် ပူၤဒီးတၫ်လီၫ်လၢယံၤဒီးဟီၣ်ခိၣ်ဖျၢၣ်သ့အါ၀ဲအဂ့ၫ် ပှၤကူၣ်သ့တဖၣ်တဲ၀ဲလီၤ.

ကဲထီၣ်အသးမ့ၫ်သ့လၢကနုာ်လီၤဘျၢၣ် ဟီၣ်ခိၣ်ဖျၢၣ်န့ၣ် မူဖျၢၣ်ဆံးအံၤ တၫ်ဆီတလဲအတၫ်တရံးကျဲ ခီဖျိ လၢ တၫ်သူပတီၫ်ထီတၫ်သ့တၫ်ဘၣ်တဖၣ်သ့န့ၣ်လီၤ.ကျိၤကျဲ၀ဲအံၤန့ၣ် ဖဲ၂၀၂၂နံၣ်အပူၤ လၢနၣ်ဆၣ်အတၫ် တိာ်ကျဲၤတခါအပူၤ တၫ်မၤကွၫ်အီၤန့ၫ်၀ဲဂ့ၤဂ့ၤန့ၣ်လီၤ.

မူဖျၢၣ်ဆံး၀ဲအံၤန့ၣ် လၢကတီၫ်အံၤ အိၣ်လၢဟီၣ်ခိၣ်ဖျၢၣ် သုးအသးဒ်ပနိဘျၢအက့ၫ်အဂီၤအသိး၀ံၤ လၢခံတဘျီ အကျဲလၢကဟဲက့ၤဆူဟီၣ်ခိၣ်ဖျၢၣ်န့ၣ် တၫ်ထိၣ်တၫ်ဒွးအီၤလီၤတံၫ်လီၤဆဲးအဂီၫ် ကီခဲ၀ဲလီၤ. လၢစှၤလါ အတီၫ်ပူၤ ကလီၤမၫ်ကွံာ်လၢ တၫ်ကွၫ်အီၤဖျါအလီၫ်၀ံၤ တုၤ၂၀၂၈နံၣ် လၢဟီၣ်ခိၣ်ဖျၢၣ်အဂီၫ် မ့ၫ်မူဖျၢၣ်ဆံးလၢ ပာ်ဃုာ်လၢတၫ်ဘၣ်ယိၣ်အိၣ်စရီပူၤန့ၣ်လီၤ.

Ref: BBC