လါဒံၣ်စ့ဘၢၣ်(၁၉)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၅), ကီၢ်ရ့ၣ်မုၢ်တြီၢ်ဟီၣ်က၀ီၤ, ဖၣ်ပူၣ်-ကမးမိၢ်ကျဲမုၢ်အဖီခိၣ် သုးကီၣ်ကးကတၢတံသုးကလၢၤအကပၤ တၢ်ခးလိၥ်သးတဖၣ် ကဲထီၣ်သးကိးမုၢ်နံၤဃၥ်ဃၥ်လီၤအဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိတဖၣ်ဒီးဂ့ၢ်ခီၣ်ထံးတၢ်ကစီၣ်တဖၣ်အအိၣ်န့ၣ်လီၤ.
လါနိၣ်၀့ဘၢၣ်ဒီးလါဒံၣ်စ့ဘၢၣ်အတီၢ်ပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးပၥ်ဖှိၣ်တဖၣ် ထီၣ်ဒုးမၤန့ၢ်ဃၥ်န့ၢ်၀ဲ သုးကီၣ်ကးသုးကလၢၤလွံၢ်ဖျၢၣ်လၢအမ့ၢ် ကူးဆ့း, မးထီ, ကစၢၢ်သၢဖျၢၣ်, ထံကဆီမဲလၢအိၣ်ဖဲ ဖၣ်ပူၣ်-ကမးမိၢ်ကျဲမုၢ်အဖီခိၣ်အဃိ အိၣ်တ့ၢ်ဒၣ်ထဲ ကတၢတံသုးကလၢၤဒီးကမးမိၢ်၀့ၢ်အနုၥ်လီၤ တၢ်ဘံၣ်တၢ်ဘၢသုးကလၢၤတဖၣ်န့ၣ်လီၤ.
စးထီၣ်လၢ လါဒံၣ်စ့ဘၢၣ်ခံနွံတနွံန့ၣ် ကတၢတံသုးကလၢၤအကပၤ တၢ်ဒုးတဖၣ်ကဲထီၣ်သးလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးကီၣ်ကးအသုးအဘၢၣ်စၢၤ၀ံၤ သုးကီၣ်ကးမၤ၀ဲ ကလံၤကျါတၢ်ဒုးစ့ၢ်ကီးန့ၣ်လီၤ.
“ကဲထီၣ်သးလၢသုးစံၣ်ဖျီးတဖၣ်မ့တမ့ၢ်သုးဖိလၢအိၣ်လၢသုးကလၢၤအပူၤတဖၣ်အဘၢၣ်စၢၤဧါန့ၣ်တသ့ၣ်ညါလီၤတံၢ်ဘၣ်. ခးလိၥ်သးတခီဒု အိၣ်ထီၣ်၀ဲကိးမုၢ်နံၤန့ၣ်လီၤ. တမ့ၢ်ထဲကျိဖိဘၣ် တၢ်နၢ်ဟူဘၣ်စ့ၢ်ကီး ကျိဖးဒိၣ်, မ့ၣ်ပိၢ်ပိၥ်ဖးထီၣ်ကလုၢ်တဖၣ်အဂ့ၢ်” ပှၤကမးမိၢ်ဖိတဂၤ စံး၀ဲန့ၣ်လီၤ. “
ကတၢတံသုးကလၢၤအံၤ အိၣ်စီၤစုၣ်ဒီး ကမးမိၢ်၀့ၢ်ထဲဒၣ် (၁၄)မံၤလၤ၀ံၤ ကမးမိၢ်၀့ၢ်အနုၢ်လီၤတၢ်ဘံၣ်တၢ်ဘၢတြဲၤန့ၣ် ကညီသုးခိးကီၢ်ဆၢ(BGF) ပၢဆှၢဃၥ်၀ဲန့ၣ်လီၤ.
ကတၢတံသုးကလၢၤသုတလီၤအဂီၢ် သုးကီၣ်ကးဆှၢအါထီၣ် သုးအဂံၢ်အဘါ လၢမၠဲၣ်ကၠံငူၣ်, ကမးမိၢ်၀့ၢ်တဆီ၀ံၤ သုးကီၣ်ကးသုးအဂံၢ်အဘါ(၂၀၀)ဃၥ်ဃၥ် ဟဲတုၤဆူကတၢတံသုးကလၢၤလံအဂ့ၢ် ဂံၢ်ခီၣ်ထံးသုးဂ့ၢ်၀ီတၢ်ကစီၣ်စံး၀ဲန့ၣ်လီၤ.
တကတီၢ်ဃီ ခီဖျိသုးကီၣ်ကးမၤပှဲၤအါထီၣ်သုးအဂံၢ်အဘါအဃိ ကတၢတံ, တခိၣ်တဲၣ်, ၀ၣ်သိးခိၣ်, ကူးဆ့, မးထီ, ဖၣ်လိ, ဘီကၠိးလၢၢ်သ၀ီတဖၣ်ဒီး ဒူသ၀ီလၢ အိၣ်ဘူးဒီးဖဲန့ၣ်တဖၣ် ဘၣ်ယိၣ်လၢတၢ်ဒုးတဖၣ်ကကဲထီၣ်သးအဃိ လဲၤဃ့ၢ်အိၣ်ကဒုအသး ဆူကမးမိၢ်, မၠဲၣ်ကၠံငူၣ်ဒီး ဖၣ်အၣ်တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ ဖၣ်ပူၣ်-ကမးမိၢ်ကျဲမုၢ်အဖီခိၣ်ပၥ်ဃုၥ် ဒူသ၀ီလၢအိၣ်ဘူးဒီးဖဲန့ၣ်တဖၣ်အပူၤ တၢ်ဒိးလီၤဃၥ် မ့ၣ်ပိၢ်တဖၣ်အဃိ ပှၤလီၢ်က၀ီၤဖိတဖၣ် ယီၢ်ဘၣ်မ့ၣ်ပိၢ်ဒီးဘၣ်ဒိဘၣ်ထံးတဖၣ် အိၣ်ထီၣ်၀ဲခဲအံၤခဲအံၤလီၤအဂ့ၢ် တၢ်သ့ၣ်ညါဘၣ်လၢ ကမးမိၢ်ပှၤတ၀ၢတၢ်မၤစၢၤကရၢအအိၣ်န့ၣ်လီၤ.
Ref: Mizzima
