လါဒံၣ်စ့ဘၢၣ်(၁၈)သီ,၂၀၂၄နံၣ်
ရၢၫ်ခၢၣ်ကီၫ်စဲၣ်ပူၤ တၫ်ဒုးတဖၣ်အဃိ ပှၤလီၫ်အိၣ်ကမှံဖိလၢ ဟဲဃ့ၫ်အိၣ်ကဒုဖဲ အ့ၣ်ယၣ်၀တံၣ်ကီၫ်ခီ,ကီၫ်ဆၣ်တဖၣ်အပူၤန့ၣ် တၫ်တဟ့ၣ်တၫ်ပျဲလၢကလဲၤဖီၣ်ညၣ်လၢပီၣ်လဲၣ်ပူၤဘၣ်အမဲာ်ညါ လၢတၫ်လဲၤထီၣ်က့ၤလီၤအပူၤ ကွၫ်ဆၢၣ်မဲာ်ဘၣ်ဒီးတၫ်သမံသမိးဃံးဃံးအဂ့ၫ် လီၫ်က၀ီၤဖိတဖၣ်တဲ၀ဲလီၤ.
တၫ်ဒုးအဃိ ကွးကီၫ်ဆၣ်ဒီးသၣ်တွဲကီၫ်ဆၣ်ပူၤ ပှၤလီၫ်အိၣ်ကမှံဖိတဖၣ် ဟဲဃ့ၫ်အိၣ်ကဒုဆူ အ့ၣ်ယၣ်၀တံၣ်ကီၫ်ခီ, ယ့ၣ်ကၠံၣ်,သၣ်ပီ,ရွှ့ၣ်သီၣ်ယၣ်,ခၠီသၣ်,ငသဲခၠီ၀့ၫ်တဖၣ်အပူၤ အိၣ်၀ဲတစှၤန့ၫ်(၅)ကထိအဂ့ၫ် လီၫ်က၀ီၤဖိတဖၣ်တယာ်၀ဲ လီၤ.
ပှၤလီၫ်အိၣ်ကမှံဖိလၢ အိၣ်လၢရၢၫ်ခၢၣ်ကီၫ်စဲၣ်,ကွး၀့ၫ်ဒီးသၣ်တွဲ၀့ၫ်တဖၣ် ဟဲတုၤဆူ ပသံၣ်ကီၫ်ဆၣ်,ရွှ့ၣ်သီၣ်ယၣ်၀့ၫ်ပူၤ ခီဖျိလၢ ချံဖီၣ်ညၣ်အခိၣ်(၆၀)၀ံၤ ပှၤနီၫ်ဂံၫ်အိၣ်၀ဲ(၁)ကထိဂၤဃၣ်ဃၣ်န့ၣ်လီၤ.အ၀ဲသ့ၣ်တဖၣ် သုတအိၣ်ကဒီးဖဲ၀့ၫ်အံၤ အဂီၫ် ဖဲအပူၤကွံာ် လါဒံၣ်စ့ဘၢၣ်(၁၄)သီနံၤန့ၣ် သုးကီၣ်ကးအလီၫ်က၀ီၤပှၤဘၣ်မူဘၣ်ဒါတဖၣ် ဟ့ၣ်တၫ်ဆီၣ်သနံး အ ဂ့ၫ် တၫ်ဘံၣ်တၫ်ဘၢအဖီခိၣ် ပှၤလီၫ်အိၣ်ကမှံဖိလၢတအဲၣ်ဒိးပာ်ဖျါအမံၤတဂၤတဲ၀ဲလီၤ.
”ကီၫ်ဆၣ်ခိၣ်နၫ်တဖၣ်,ကီၫ်ခီခိၣ်နၫ်တဖၣ်ဟဲ၀ဲလီၤ.တဲ၀ဲလၢကဟ့ၣ်ပှၤတၫ်ဆၢကတီၫ်(၁၄)သီလီၤ. ဖၠၣ်ပိၣ်ဒီးအမၣ်န့ၣ် လၢ(၇)သီအတီၫ်ပူၤ တၫ်ကဘၣ်သုးကွံာ်အသးအဂီၫ် ဟဲတဲ၀ဲလီၤ.ပ၀ဲတဖၣ်န့ၣ် မ့ၫ်(၁၁/)ပနိတစွၤ အဃိ ပထံၣ်ဘၣ် တၫ် ကီတၫ်ခဲဖဲတၫ်လီၫ်အံၤလီၤ.”
ရွှ့ၣ်သီၣ်ယၣ်၀့ၫ်န့ၣ် အိၣ်စီၤစုာ်ယံၤဒီး ကွး၀့ၫ်လၢတၫ်ဒုးဆူၣ်ဒီးရၢၫ်ခၢၣ်သုးမုၫ်ဒိၣ် မံးလာ်(၃၀)ဘျဲၣ်၀ံၤ ဘၣ်ယိၣ်၀ဲလၢ ကဆီၣ်ထွဲမၤစၢၤရၢၫ်ခၢၣ်သုးမုၫ်ဒိၣ်-AAအဃိ ဟ့ၣ်တၫ်ဆီၣ်သနံး မၢသုးလီၫ်သုးကျဲဒ်သိးအံၤအဂ့ၫ် ပှၤလီၫ်က၀ီၤဖိ တဖၣ်တဲ၀ဲလီၤ.
ဒ်န့ၣ်အသိး လၢခၠီသၣ်ကီၫ်ဆၣ်ပူၤစ့ၫ်ကီး စံးအၢစံးသီ၀ဲလၢ တၫ်ဆှၢသိဒီးတၫ်အီၣ်တၫ်အီဆူရၢၫ်ခၢၣ်ကီၫ်စဲၣ်အဃိ ရၢၫ်ခၢၣ် ပှၤလီၫ်အိၣ်ကမှံဖိ အချံဖီၣ်ညၣ်တဖၣ် တၫ်တဟ့ၣ်တၫ်ပျဲလၢ ကဟးထီၣ်ဆူပီၣ်လဲၣ်ပူၤဘၣ်အဂ့ၫ် ခၠီသၣ်၀့ၫ်ဖိ တဂၤတဲ၀ဲလီၤ.
“ပှၤလီၫ်အိၣ်ကမှံအချံဖီၣ်ညၣ်ဖးဒိၣ်တဖၣ်လီၤ.တ၀ဲသ့ၣ်တဟးထီၣ်ဘၣ်လၢပီၣ်လဲၣ်ပူၤဘၣ်.ဟးထီၣ်ဒၣ်န့ၫ်ထဲပှၤလီၫ်က၀ီၤဖိတဖၣ်လီၤ.သုးကီၣ်ကးတဲလၢ အ၀ဲသ့ၣ်ဆှၢသိလၢရၢၫ်ခၢၣ်ကီၫ်စဲၣ်တကပၤလီၤ.”
လၢခၠီသၣ်၀့ၫ်တခီ ပှၤလီၫ်အိၣ်ကမှံဖိလၢ ရၢၫ်ခၢၣ်တဖၣ် ဟဲဃ့ၫ်ဟးထီၣ်ဒီးချံဖီၣ်ညၣ်တဖၣ် ကအိၣ်၀ဲ(၂၀၀)ဂၤ ဃၣ်ဃၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.ပီၣ်လဲၣ်ပူၤ တၫ်တြီဃာ်တၫ်ဖီၣ်ညၣ်န့ၣ် မ့ၫ်သုးကီၣ်ကးအသုး,ပၢၤကီၫ်,ညၣ်တၫ်ဖံးတၫ်မၤ၀ဲၤကျိၤဒီး သ၀ီသးပှၫ်တဖၣ် တြီဃာ်၀ဲလီၤ.
သၣ်ပီကီၫ်ဆၣ်,သ၀ီတနီၤအပူၤ ရၢၣ်ခၢၣ်ပှၤလီၫ်အိၣ်ကမှံဖိတဖၣ် ဘၣ်တၫ်သမံသမိးအ၀ဲသ့ၣ် ဖးဖီမုၫ်စရီဒီး ဘၣ်တၫ် ဖီၣ် ခဲအံၤခဲအံၤအဂ့ၫ် လီၫ်က၀ီၤဖိတဖၣ်တဲ၀ဲလီၤ.
သၣ်ပီပှၤ၀့ၫ်ဖိတဂၤတဲ၀ဲလၢ”တနီၤန့ၣ် အလံာ်ခိၣ်ဂီၤတပာ်ဃုာ်ဘၣ်.တၫ်လဲၤထီၣ်က့ၤလီၤတၫ်အုၣ်ကီၤတဖၣ် တပာ်ဃုာ် ၀ဲအိၣ်လီၤ.ပှၤသ့ၣ်တဖၣ်န့ၣ် ဘၣ်တၫ်ကိးသမံသမိး၀ံၤ တၫ်က့ၤဖီၣ်အ၀ဲသ့ၣ်န့ၣ်လီၤ.”
လၢ၀့ၫ်ငသဲခၠီ တၫ်သမံသမိးတြဲၤတဖၣ် ပှၤလၢကက့ၤဆူ ရၢၫ်ခၢၣ်ကီၫ်စဲၣ်တကပၤ စးထီၣ်ဖဲတလါအံၤန့ၣ် တဟ့ၣ်လဲၤ ၀ဲလၢၤဘၣ်အသိး သုးကီၣ်ကးအသုးတဖၣ် သမံသမိး၀ဲတၫ်လဲၤထီၣ်က့ၤလီၤဃံးဃံးအဂ့ၫ် လီၫ်က၀ီၤဖိတဖၣ်တဲ၀ဲလီၤ.
ရၢၫ်ခၢၣ်ကီၫ်စဲၣ်,ကွး၀့ၫ်လၢ အိၣ်ဘျးစဲလိာ်သးဒီးအ့ၣ်ယၣ်၀တံၣ်ကီၫ်ခီအံၤ ရၢၫ်ခၢၣ်သုးမုၫ်ဒိၣ် ထီၣ်ဒုး၀ဲအဃိ တၫ်ဒုးဆူၣ်၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
Ref: RFA
