လါဒံၣ်စဲဘၢၣ်(၁၇)သီ,၂၀၂၄နံၣ်
ကီၫ်ပယီၤပူၤ ၂၀၂၅နံၣ်အဂီၫ် ပှၤလၢလိၣ်ဘၣ်ပှၤတ၀ၢတၫ်မၤစၢၤ အိၣ်၀ဲအကကွဲၫ်(၂၀)ဃၣ်ဃၣ်၀ံၤ ကလိၣ်ဘၣ်၀ဲ အမဲရကၤဒီၣ်လၣ်(၁)ဘံၣ်လံၣ်ယၣ်ဘျဲၣ်အဂ့ၫ် ဘီမုၫ်စၢဖှိၣ်ကရၢဘၣ်ထွဲပှၤတ၀ၢတၫ်မၤစၢၤ တၫ်တၢၣ်ပီၣ်တဲသကိး၀ဲၤဒၢး(UNOCHA)ပာ်ဖျါ၀ဲ ဖဲလါဒံၣ်စ့ဘၢၣ်(၁၆)သီနံၤန့ၣ်လီၤ.
(UNOCHA)တဲစ့ၫ်ကီး၀ဲလၢ ဂ့ၫ်ဂီၫ်အူ ပှၤလၢလိၣ်ဘၣ်တၫ်မၤစၢၤ (၅.၅)ကကွဲၫ်အဂီၫ် မုၫ်လၫ်၀ဲလၢကသူဘၣ် ဒီၣ်လၣ်(၁)ဘံၣ်လံၣ်ယၣ်န့ၣ်လီၤ.လၢကတီၫ်အံၤ ဒိးန့ၫ်ဃာ်၀ဲထဲ ဒီၣ်လၣ်အကကွဲၫ်(၃၀၀)ဘျဲၣ်ဒံးလီၤအဂ့ၫ် တဲ၀ဲလီၤ.
စ့တၫ်မၤစၢၤလၢဒိးန့ၫ်၀ဲတဖၣ်န့ၣ် တၫ်အီၣ်တၫ်အီကလၢကလီၫ်အဂီၫ်,ကူၣ်သ့ဂ့ၫ်၀ီ,ဆူၣ်ချ့ဂ့ၫ်၀ီဒီး ကသူ၀ဲလၢ တၫ်အိၣ် ကဒုအဂီၫ်တဖၣ်အဂ့ၫ်စ့ၫ်ကီး(UNOCHA)ဘိးဘၣ်ရၤလီၤ၀ဲလီၤ.
ကီၫ်ပယီၤတၫ်သဘံၣ်သဘုၣ်ပူၤ ပှၤဘၣ်ပာ်တ့ၫ်တၫ်အိၣ်တၫ်ဆိး ဘၣ်စံၣ်သုးအိၣ်၀ဲ(၃.၅)ကကွဲၫ်၀ံၤ ပှၤလၢလိၣ်ဘၣ် တၫ်အီၣ်တၫ်အီအိၣ်၀ဲ(၁၅)ကကွဲၫ်ဘျဲၣ်အဂ့ၫ် (UNOCHA)တဲ၀ဲလီၤ.
တကးဘၣ်ပှၤလၢအိၣ်ဆိးအဂီၫ်တၫ်အိၣ်ကဒုဒီးထံအီတအိၣ်ဘၣ် အိၣ်၀ဲ(၁)ကကွဲၫ်ဘျဲၣ်အဂ့ၫ်တဲ၀ဲလီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ၀ံၤအလီၫ်ခံ ကီၫ်ပယီၤပူၤ ပှၤလၢလိၣ်ဘၣ်ပှၤတ၀ၢတၫ်မၤစၢၤ အါထီၣ်၀ဲကိးမုၫ်နံၣ်၀ံၤ ဖဲ၂၀၂၁နံၣ်န့ၣ် အိၣ်၀ဲ(၂.၁)ကကွဲၫ်ဒီးလၢကတုၤဃီၤလၢ၂၀၂၅နံၣ်အပူၤတခီ ကအိၣ်ထီၣ်၀ဲအအကွဲၫ်(၂၀)အဂ့ၫ် (UNOCHA)တယာ်ဃာ်၀ဲလီၤ.
