လါအီးကထိဘၢၣ်(၂၄)သီ,၂၀၂၄နံၣ်
ခီဖျိလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးပၥ်ဖှိၣ်တဖၣ် က၀ီၤကးတံၥ်ဒုး သုးကီၣ်ကးဖၣ်ပူၣ်သုးတၢ်တိၥ်ကူၣ်ကျဲၤခိၣ်သ့ၣ်ဒီး ခီပူးသုးကလၢၤတဖၣ်အဃိ သုးကီၣ်ကးတပၤ လဲၤတ့ၢ်လီၤမ့ၣ်ပိၢ်တဖၣ်လၢကလံၤကျါ ဆူကမျၢၢ်အိၣ်ဆိးလီၢ်ကျဲဒူသ၀ီတဖၣ်အပူၤအဂ့ၢ် ကီၢ်ရ့ၣ်မုၢ်တြီၢ်ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ်စီၤကျၢၢ်ဒိၣ်စံး၀ဲန့ၣ်လီၤ.
သုးကီၣ်ကးသုးကလၢၤလၢ အိၣ်ဖဲကီၢ်ရ့ၣ်မုၢ်တြီၢ်ဟီၣ်က၀ီၤအပူၤတဖၣ် ဟူးဂဲၤသုးဂ့ၢ်၀ီတၢ်ဟူးတၢ်ဂဲၤတဖၣ်အဃိ တၢ်ဒုးကဲထီၣ်သးဒီး KNLAသုးပၥ်ဖှိၣ်တဖၣ်အဘၢၣ်စၢၤန့ၣ်လီၤ.
သုးကီၣ်ကးပညိၣ်ဒုးလီၢ်က၀ီၤကမျၢၢ်ဒ်ဒူၣ်ဒါအသိး၀ံၤ လဲၤဒုး၀ဲလီၢ်က၀ီၤကမျၢၢ်အိၣ်ဒူသ၀ီတဖၣ်လၢ ကလံၤကျါအဂ့ၢ် ကီၢ်ရ့ၣ်မုၢ်တြီၢ်ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၢ်ဒိၣ်စံး၀ဲန့ၣ်လီၤ.
“သုးကီၣ်ကးမၤကမၣ် ပှၤဂ့ၢ်ဂီခွဲးယၥ်တဖၣ် တပယူၥ်ဃီန့ၣ်လီၤ. အါကတ့ၢ်အ၀ဲသ့ၣ်ကဘီယူၤတဖၣ် ဟဲခးလီၤတၢ်လၢ ဒူသ၀ီတဖၣ်အပူၤလီၤ. ဒူသ၀ီလၢဟဲခး၀ဲန့ၣ် ပှၤသုးဖိတအိၣ်ဘၣ်. ဟဲခးလီၤတၢ်လၢ ကမျၢၢ်ဖံးအီၣ်မၤအီၣ်လီၢ်ကျဲတဖၣ်အပူၤန့ၣ်လီၤ. ပၥ်ပနီၣ်၀ဲဒ် ဒူၣ်ဒါခဲလၢၥ်၀ံၤ ပညိၣ်ခး၀ဲလီၤ.”
လါအီးကထိဘၢၣ်(၁)သီတုၤ(၁၄)သီအနံၤ သုးကီၣ်ကးလဲၤတ့ၢ်လီၤမ့ၣ်ပိၢ်(၅၁)ဖျၢၣ် ဆူလီၢ်က၀ီၤကမျၢၢ်အိၣ်ဒူသ၀ီတဖၣ်အပူၤ တကးဘၣ် ခးလီၤ၀ဲစ့ၢ်ကီး ကျိဖးဒိၣ်(၅)ဖျၢၣ်န့ၣ်လီၤ.
ခီဖျိလၢလဲၤတ့ၢ်လီၤမ့ၣ်ပိၢ်လၢကလံၤကျါဒီးခးလီၤကျိဖးဒိၣ်တဖၣ်အဃိ ကမျၢၢ်ဘၣ်သံ၀ဲ(၃)ဂၤ ဒီးဘၣ်ဒိ၀ဲ(၃)ဂၤန့ၣ်လီၤ. ကမျၢၢ်အိၣ်ဟံၣ်ဃီတဖၣ်ဒီး တၢ်ဖံးအီၣ်မၤအီၣ်လီၢ်ကျဲတဖၣ်စ့ၢ်ကီး ဘၣ်ဟးဂီၤကွံၥ်၀ဲန့ၣ်လီၤ.
ကမျၢၢ်လၢဃ့ၢ်ဟးဆှဲးသုးတဂၤ စံး၀ဲလၢ” ပှၤလၢသံတ့ၢ်တဖၣ်အကျါ ပၥ်ဃုၥ်၀ဲ ပဘူးတံၢ်တဖၣ်စ့ၢ်ကီးန့ၣ်လီၤ. ခဲအံၤပှၤသံတဖၣ်စ့ၢ်ကီးန့ၣ် မ့ၢ်ဒၣ် ပက၀ီၤဒ့ပူၤလီၤ. တကြၢးပညိၣ်ဒုးကမျၢၢ်တဖၣ်ဘၣ်. ဘၣ်တဲဒ်လဲၣ်မး တဲတဘၣ်လဲၣ်ဘၣ်. တၢ်အိၣ်သးတဖၣ် ယံၤထီၣ်အၢထီၣ်လီၤအဂ့ၢ်”န့ၣ်လီၤ.
လါအီးကထိဘၢၣ်(၁)သီတုၤ(၁၄)သီအနံၤ တၢ်ဒုးကဲထီၣ်သးလၢ KNLAသုးပၥ်ဖှိၣ်တဖၣ်ဒီး သုးကီၣ်ကးအသုးအဘၢၣ်စၢၤ ခဲလၢၥ်(၄၇)ဘျီ၀ံၤ သုးကီၣ်ကးတပၤ ဘၣ်သံ၀ဲ(၁၀)ဂၤဒီး ဘၣ်ဒိ၀ဲ(၉)ဂၤန့ၣ်လီၤ.
ခီဖျိလၢသုးကီၣ်ကး ပညိၣ်ဒုးကမျၢၢ်လၢ ကလံၤကျါတဖၣ်အဃိ ကမျၢၢ်အကထိအကလးလၢ အိၣ်ဖဲ၀့ၢ်ဖၣ်ပူၣ်ဒီးကပိၥ်ကပၤဒူသ၀ီပူၤတဖၣ် ဘၣ်လဲၤအိၣ်ကဒု၀ဲဒၣ်ဖဲ ဖၢ်အၣ်,ကမးမီ, မၠဲၣ်ကၠံငူၣ်, ကီၢ်သူလ့ၤတၢ်ပၢဟီၣ်က၀ီၤအပူၤဒီး အဘူးတံၢ်တဖၣ်တကးဘၣ် ခီဖျိလၢကဖံးအီၣ်မၤအီၣ်အဂီၢ် ကီခဲ၀ဲအဃိ ဘၣ်ကွၢ်ဆၢၣ်မဲၥ်ဘၣ်ဒီး တၢ်ကီတၢ်ခဲအါမးလီၤအဂ့ၢ် ကမျၢၢ်လၢဃ့ၢ်ဟးဆှဲသုးတဂၤ စံး၀ဲန့ၣ်လီၤ.
Ref: DVB
