လါအီးကထိဘၢၣ်(၁၇)သီ,၂၀၂၄နံၣ်
၂၀၂၄နံၣ်, လါစဲးပထ့ဘၢၣ်(၁)လါအတီၢ်ပူၤ ခီဖျိလၢသုးကီၣ်ကးအသုး ဟဲဒုးတၢ်လၢကလံၤကျါဒီးခးလီၤကျိဖးဒိၣ်တဖၣ်ဆူ ဒူသ၀ီတဖၣ်ပူၤအဃိ ဘၣ်သံ၀ဲလီၢ်က၀ီၤကမျၢၢ်(၁၂)ဂၤ, ဘၣ်ဒိ၀ဲ(၄၂)ဂၤအဂ့ၢ် ဒီကလုၥ်ဃူဖိးပဒိၣ်(NUG)တၢ်ဒီတဒၢကိတိၥ်၀ဲၤကျိၤ ကလံၤထံးသုးဟီၣ်က၀ီၤ ဘိးဘၣ်ရၤလီၤဃၣ်၀ဲ ဖဲလါအီးကထိဘၢၣ်(၁၆)သီအနံၤန့ၣ်လီၤ.
သုးကီၣ်ကးအသုးအံၤ ကလံၤထံးသုးဟီၣ်က၀ီၤအပူၤ တၢ်ဒုးကဲထီၣ်သးတအိၣ်ဘၣ်ဒီးခးလီၤကျိဖးဒိၣ်, ဟဲဒုးတၢ်လၢကလံၤကျါ, ဟဲတ့ၢ်လီၤမ့ၣ်ပိၢ်လၢဒြိတဖၣ်, ဖီၣ်န့ၢ်ဆူၣ်မၤသံလီၢ်က၀ီၤကမျၢၢ်တဖၣ်အဃိ လီၢ်က၀ီၤကမျၢၢ်တဖၣ် ဘၣ်သံဘၣ်ပှၢ်၀ဲအဂ့ၢ်န့ၣ် ပၥ်ဖျါဃၣ်၀ဲလၢ အလံၥ်ဘိးဘၣ်ရၤလီၤအပူၤန့ၣ်လီၤ. တကးဘၣ် လါစဲးပထ့ဘၢၣ်အတီၢ်ပူၤ လီၢ်က၀ီၤကမျၢၢ်(၂၆၃)ဂၤ ဘၣ်တၢ်ဖီၣ်န့ၢ်ဆူၣ်အီၤအဂ့ၢ် စံး၀ဲန့ၣ်လီၤ.
လါစဲးပထ့ဘၢၣ်အတီၢ်ပူၤ တၢ်ထီၣ်ဒုးသုးကလၢၤတၢ်ဒုး(၃)ဘျီပၥ်ဃုၥ် တၢ်ဒုးကဲထီၣ်သးဒီး သုးကီၣ်ကးအဘၢၣ်စၢၤ ခဲလၢၥ်(၆၆)ဘျီအသိး တၢ်ဒုးသုးကီၣ်ကးသုးလၢၤ လၢဒြိဒီးကျိဖးဒိၣ်တဖၣ်အိၣ်၀ဲအဂ့ၢ် ပၥ်ဖျါဃၣ်၀ဲန့ၣ်လီၤ.
တၢ်လဲၤဒုးအီၤအပူၤ သုးကီၣ်ကးအသုးဖိ ဘၣ်သံ၀ဲ(၁၄၇)ဂၤ, ဘၣ်ဒိ(၉၆)ဂၤ ဒီးတၢ်ဖီၣ်န့ၢ်အီၤ(၈)ဂၤအဂ့ၢ် ပၥ်ဖျါဃၣ်၀ဲန့ၣ်လီၤ. ကမျၢၢ်တၢ်ဒီသဒၢသုးတပၤစ့ၢ်ကီး ဘၣ်သံ၀ဲ(၁၇)ဂၤ၀ံၤ ဘၣ်ဒိ၀ဲ(၄၈)ဂၤအဂ့ၢ် စံး၀ဲန့ၣ်လီၤ.
တၢ်ဒုးတဖၣ်အပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA), ကီၢ်ပယီၤကၠိဖိဒံၣ်မိၣ်ကရဲးတံးသုးမုၢ်ဒိၣ်(ABSDF), တလၢၤကီၢ်သီပၣ်တံၣ်(AD), ကမျၢၢ်တၢ်ဒီသဒၢသုးမုၢ်ဒိၣ်(PDF)သုးရ့ၣ်တဖၣ်ဒီး ကမျၢၢ်တၢ်ဒီသဒၢသုး(ပကဖ)ဒီး ဒြိသုးပၥ်ဖှိၣ်ပၥ်ဃုၥ်၀ဲအဂ့ၢ် စံး၀ဲန့ၣ်လီၤ.
ကလံၤထံးသုးဟီၣ်က၀ီၤလၢ (NUG)တၢ်ဒီတဒၢကိတိၥ်၀ဲၤကျိၤ ပၥ်ပနီၣ်ဃၣ်၀ဲအပူၤ ပၥ်ဃုၥ်၀ဲ ဒူးပကီး(ပကိ),အ့ၣ်ယၣ်၀တံၣ်, ၀့ၢ်တကူၣ်, တနီသရံး, ကရ့ၣ်နံၣ်ဒီး တလၢၤကီၢ်စဲၣ်တဖၣ်န့ၣ်လီၤ.
Ref: RFA
