လါအီးကထိဘၢၣ်(၁၆)သီ,၂၀၂၄နံၣ်
ဖဲလါအီးကထိဘၢၣ်(၁၅)သီအနံၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ တဲလီၤ၀ဲလၢ သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ တၫ်ဆၢကတီၫ်ယံာ်ထီၣ်ဘၣ်ဆၣ် တၫ်အၢၣ်လီၤ(၅)ထံၣ်လၢ အၣ်စံၣ်ယၣ်အၢၣ်လီၤတူၫ်လိာ်၀ဲတဖၣ် ဒုးအိၣ်ထီၣ်၀ဲအမိၫ်လံၤမိၫ်ပှၫ်တန့ၫ်ဘၣ်အဃိ ကီၫ်ပယီၤဂ့ၫ်၀ီန့ၣ် တမ့ၫ်ထဲအၣ်စံၣ်ယၣ်ဘၣ်အမဲာ်ညါ ထံဂုၤကီၫ်ဂၤတဖၣ်စ့ၫ်ကီး ကြၢးပာ်ဃုာ်၀ဲအဂ့ၫ် န့ၣ်လီၤ.
ဖဲစှၤသီအတီၫ်ပူၤ အၣ်စံၣ်ယၣ်ပတီၫ်ထီတၫ်အိၣ်ဖှိၣ် လၢဘၣ်တၫ်မၤ၀ဲဖဲကီၫ်လၣ်အိၣ်၀ံၤအလီၫ်ခံ ဘၣ်ထွဲဒီး လါအီးကထိဘၢၣ်(၁၃)သီနံၤ အၣ်စံၣ်ယၣ်ပှၤပၢၤလီၫ်ဆ့ၣ်နီၤအတၫ်ဘိးဘၣ်ရၤလီၤအဖီခိၣ် KNUပှၤကတိၤတၫ်ပၢ ပဒိၣ်စီၤတီနံၤတဲခီၣ်ဆၢ၀ဲဒ်အံၤလီၤ.
“ထဲအၣ်စံၣ်ယၣ်တဖုဧိၤန့ၣ် တမ့ၫ်တၫ်ကကဲထီၣ်နီတမံၤဘၣ်.တၫ်လၢကဘၣ်မၤန့ၣ် အၣ်စံၣ်ကရၢထံကီၫ်အပူၤ ပှၤလၢသးလီတၫ်ဆီတလဲမ့ၫ်ဂ့ၤ,ထံဂုၤကီၫ်ဂၤတၫ်ကရၢကရိတဖၣ်ဒီးထံကီၫ်လၢ လီၤဆီဒၣ်တၫ် ထီဘိတဲ၀ဲဘၣ်ထွဲဒီး ကီၫ်ပယီၤအတၫ်ဆီတလဲတဖၣ် ကြၢးပာ်ဃုာ်၀ဲန့ၣ်လီၤ.”
အၣ်စံၣ်ယၣ် ပတီၫ်ထီတၫ်အိၣ်ဖှိၣ်၀ံၤအလီၫ်ခံ လါအီးကထိဘၢၣ်(၁၃)သီနံၤ အၣ်စံၣ်ယၣ်တၫ်ဘိးဘၣ်ရၤလီၤအပူၤ ဖၢနုာ်ဃ့ထီၣ်ဃာ်၀ဲလၢ တၫ်ကပတုာ်ကွံာ်တၫ်ဒုးတဘျီဃီ၀ံၤ တၫ်ကထံၣ်လိာ်တၢၣ်ပီၣ်တဲသကိးတၫ်အဂီၫ်န့ၣ်လီၤ.
ကီၫ်ပယီၤပူၤ တၫ်ပၢၫ်ဆၢဂံၫ်ဘါကရၢတဖၣ်ဒီးပှၤပဲာ်ထံနီၤဖးတၫ်တဖၣ်တခီ အၣ်စံၣ်ယၣ်အတၫ်ဃ့ထီၣ်န့ၣ် ကဲထီၣ်အသးတညီဘၣ်အဂ့ၫ်တဲ၀ဲန့ၣ်လီၤ.
ဖဲလါအီးကထိဘၢၣ်(၁၁)သီနံၤ လၢကီၫ်လၣ်အိၣ်,၀့ၫ်ဘံၣ်ယဲးကၠ့, တၫ်မၤ၀ဲမုၫ်ထီၣ်အ့ရှၢၣ်ပတီၫ်ထီတၫ်အိၣ်ဖှိၣ်အပူၤ စ့ၣ်ကဖူၣ်ကိတိာ်ခိၣ်ကျၢၫ် Lawrence Wongစ့ၫ်ကီး ဃ့ထီၣ်၀ဲလၢ ကီၫ်ပယီၤပူၤတၫ်မၤပျီၫ်မၤဂီၫ်ကပတုာ်ကွံာ်အဂီၫ် အၣ်စံၣ်ယၣ်ထံကီၫ်တဖၣ် ကမၤစၢၤဘၣ်အဂီၫ်န့ၣ်လီၤ.
ဖဲလါအီးကထီဘၢၣ်(၁၁)သီနံၤ လၢကီၫ်လၣ်အိၣ်,၀့ၫ်ဘံၣ်ယဲးကၠံ တၫ်မၤ၀ဲ(၁၉)၀ီတ၀ီ မုၫ်ထီၣ်အ့ရှၢၣ်ပတီၣ်ထီ တၫ်အိၣ် ဖှိၣ်အပူၤ မလ့ရှါကိတိာ်ခိၣ်ကျၢၫ် ဒၣ်တိးဆၣ်ရံၤ အၣ်န၀ၣ် အၤဘြၤဟၤ(ဒါတွတ်ဆာရီ အန်နဝါ အီဘရာဟင်)စ့ၫ်ကီး တဲ၀ဲလၢ ကီၫ်ပယီၤပူၤ တၫ်ဒုးအိၣ်ထီၣ်တၫ်မုာ်တၫ်ခုၣ်ကန့ၫ်အဂီၫ် လၢအၣ်စံၣ်ယၣ်အတၫ်တီခိၣ်ရိၣ်မဲတကတီၫ်ဃီ ဘၣ်ထွဲဟီၣ်ခိၣ်ဒီဖျၢၣ် တၫ်ကဟံးန့ၫ်ဂ့ၫ်၀ီအဂီၫ်န့ၣ်လီၤ.
Ref: RFA
