လါအီးကထိဘၢၣ်(၁၆)သီ,၂၀၂၄နံၣ်
လါအီးကထိဘၢၣ်(၁၂)သီအနံၤ, ကရ့ၣ်နံၣ်တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲ သုးကီၣ်ကးထူခၠီသုးကလၢၤတဖျၢၣ်လၢအိၣ်ဖဲ ကီၢ်ကရ့ၣ်နံၣ်, ဖၣ်ဆီကီၢ်ဆၣ်ဒီးဘီလခဲကီၢ်ဆၣ်အဘၢၣ်စၢၤအဂ့ၢ်န့ၣ် ကရ့ၣ်နံၣ်ဒီကလုၥ်တၢ်ဒီသဒၢသုး (KNDF)စံး၀ဲန့ၣ်လီၤ.
လါအီးကထိဘၢၣ်(၁၄)သီအနံၤစ့ၢ်ကီး ကရ့ၣ်နံၣ်တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုး၀ဲ သုးကီၣ်ကးအသုးကလၢၤအဂ့ၢ်န့ၣ် လီၢ်က၀ီၤတၢ်ကစီၣ်တဖၣ် ပၥ်ဖျါဃၣ်၀ဲန့ၣ်လီၤ.
လါအီးကထိဘၢၣ်(၁၂)သီအနံၤ,ကရ့ၣ်နံၣ်တၢ်ပၢၢ်ဆၢသုးပၥ်ဖှိၣ်တဖၣ်ထီၣ်ဒုးမၤန့ၢ်သုးကီၣ်ကးထူခၠီသုးကလၢၤတၢ်အိၣ်သးအဖီခိၣ် (KNDF)လီၢ်ခၢၣ်သးတၢ်ကစီၣ်မူဒါခိၣ် တၢ်အဲၣ်စိ စံး၀ဲဒ်အံၤန့ၣ်လီၤ.
“လါအီးကထိဘၢၣ်(၁၂)သီအနံၤန့ၣ် တၢ်ပၢၢ်ဆၢသုးတဖၣ် နုၥ်လီၤဒုး၀ဲ သုးကီၣ်ကးထူခၠီသုးကလၢၤန့ၣ်လီၤ. သုးကီၣ်ကးတပၤ ဘၣ်ဒိဘၣ်ထံးအါအဃိ ပၥ်တ့ၢ်သုးကလၢၤဃ့ၢ်ပဒ့ၣ်အသးန့ၣ်လီၤ. အဃိတၢ်ပၢၢ်ဆၢသုးတပၤ ထီၣ်ဒုးမၤန့ၢ်၀ဲ ထူခၠီသးကလၢၤန့ၣ်လီၤ. တၢ်ဒုးအပူၤ သုးကီၣ်ကးတပၤ ဘၣ်သံ၀ဲ(၆)ဂၤန့ၣ်လီၤ. တၢ်မၤန့ၢ်စ့ၢ်ကီး မ့ၣ်ပိၢ်သၣ်, ကျိဖးဒိၣ်အချံအသၣ်တဖၣ်န့ၣ်လီၤ.”
တၢ်ထီၣ်ဒုးမၤန့ၢ် ထူခၠီသုးကလၢၤ၀ံၤအလီၢ်ခံ ဖဲလါအီးကထိဘၢၣ်(၁၄)သီအနံၤစ့ၢ်ကီး ကရ့ၣ်နံၣ်တၢ်ပၢၢ်ဆၢသုးပၥ်ဖှိၣ်တဖၣ် နုၥ်လီၤဒုး၀ဲသုးကလၢၤခိၣ်သ့ၣ်အံၤအပူၤ တၢ်မၤန့ၢ် ဟုသးထၢၣ်တနီၤအသိး တၢ်ထံၣ်ဘၣ်စ့ၢ်ကီး တၢ်သံအစိၣ်တဖၣ်အဂ့ၢ် ကီၢ်ကရ့ၣ်နံၣ်သုးမုၢ်ဒိၣ်(KA) ပၢဆှၢသုးဂ့ၢ်၀ီခိၣ်ကျၢၢ် သုးခိၣ်ဒိၣ်စိဘိနၢၤ(ဘုန်းနိုင်)တဲလီၤ၀ဲအဖီခိၣ် ကၣ်တၣ်ယး၀တံၣ်ထဲ တၢ်ကစီၣ်သန့ပၥ်ဖျါဃၣ်၀ဲန့ၣ်လီၤ.
ခံခီခံကပၤတၢ်ဒုးတဖၣ်ကဲထီၣ်သးလၢ သုးကီၣ်ကးအသုးလၢ ဂုၥ်ကျဲးစၢးန့ၢ်ပၢ ယိၤ-ကရ့ၣ်နံၣ်ကီၢ်ဆၢ ပ့ၣ်လီကီၢ်ဆၣ် နါဖးမုၢ်သ၀ီအကပၤ ဒီး ကရ့ၣ်နံၣ်တၢ်ပၢၢ်ဆၢသုးပၥ်ဖှိၣ်အဘၢၣ်စၢၤအဃိ လီၢ်က၀ီၤကမျၢၢ်အကထိတဖၣ် ဘၣ်ဃ့ၢ်ပူၤဖျဲးသးဒီး လိၢ်ဘၣ်စ့ၢ်ကီး ဂ့ၢ်ဂီၤအူတၢ်အီၣ်တၢ်အီတဖၣ်အဂ့ၢ် ပှၤလၢမၤစၢၤ ပှၤဃ့ၢ်သုးထံလီၢ်ကီၢ်ပူၤပှၤလီၢ်အိၣ်ကမှံဖိတဂၤ တဲ၀ဲန့ၣ်လီၤ.
သုးကလၢၤတဖၣ်လၢ သုးကီၣ်ကးဟံးန့ၢ်ခီၣ်တဃၣ်ဆီလီၤပၥ်အံၤ ကရ့ၣ်နံၣ်တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲ တဖျၢၣ်၀ံၤတဖျၢၣ် ဒီး ၀့ၢ်တဖၣ်လၢပၢဆှၢဃၣ်အံၤအပူၤ စးထီၣ်လဲၤသရံး နီၢ်ကစၢ်တၢ်ပၢတၢ်ပြးတၢ်ဖံးတၢ်မၤတဖၣ်စ့ၢ်ကီးအိၣ်၀ဲန့ၣ်လီၤ.
Ref:VOA
