ကီၫ်ကၠီၣ်တဲၣ်ပူၤ တၫ်ဖီၣ်န့ၫ်ပယီၤပနံာ်သူ(၁၆၀၀၀)ဘျဲၣ်

လါအီးကထိဘၢၣ်(၁၀)သီ,၂၀၂၄နံၣ်

တၫ်ဖီၣ်န့ၫ် ကီၫ်ပယီၤပနံာ်တဖိးသဲစးလၢအကလးတဖၣ်လၢ အိၣ်ဖဲကီၫ်ကၠီၣ်တဲၣ်,ကီၫ်ရ့ၣ်စမူးစၣ်ခိၣ်အပူၤအဂ့ၫ်  ပှၤဟူးဂဲၤလၢပှၤမၤတၫ်ဖိဂ့ၫ်၀ီ လၢကၠီၣ်တဲၣ်တဖၣ်တဲ၀ဲ ဖဲလါအီးကထိဘၢၣ်(၉)သီအနံၤန့ၣ်လီၤ.

ကီၫ်ရ့ၣ်၀ဲန့ၣ်အပူၤ တၫ်ဆါတၫ်ပှ့ၤကျးခံဖျၢၣ် ကၠီၣ်တဲၣ်ဘၣ်မူဘၣ်ဒါတဖၣ် နုာ်လီၤသမံသမိး၀ဲအကတီၫ် တၫ်အီၣ်တၫ်အီပနံာ်ဒီးကသံၣ်ကသီပာ်ဃုာ်  ပနံာ်အနီၫ်ဂံၫ်နီၫ်ဒွး (၁၆၀၀၀)ဘျဲၣ် တၫ်ဖီၣ်န့ၫ်၀ဲအဂ့ၫ် Bangkok Post တၫ်ကစီၣ်သန့ကွဲးဖျါဃာ်၀ဲ ဖဲအလါအီးကထိဘၢၣ်(၈)သီအနံၤန့ၣ်လီၤ.

ကီၫ်ကၠီၣ်တဲၣ်ဒီတဘ့ၣ်အပူၤ မၤ၀ဲတၫ်သမံသမိးပနံာ်တဖိးသဲစးတဖၣ်၀ံၤ လၢတလါအံၤအတီၫ်ပူၤ ဖီၣ်တၫ်အါထီၣ်၀ဲအဂ့ၫ် ကူၣ်သ့ဒီးတၫ်ဂုၤထီၣ်ပသီထီၣ်ကရၢ(FED)အပှၤမၤတၫ်ဖိ ပှၤဘၣ်မူဘၣ်ဒါ အူမ့အူတဲ၀ဲလီၤ.

“ပနံာ်တၫ်ဖိတၫ်လံၤတဖၣ် ဟဲနုာ်လီၤလၢကီၫ်ဆၢ လၢကျဲအဘိဘိလီၤ.တၫ်န့ၣ်အဃိ တၫ်ဖီၣ်အီၤလၢ ခိသွဲတၫ်ဘျၢဒီးပနံာ်သူတဖၣ်သ့၀ဲလီၤ.လီၤဆီဒၣ်တၫ် ပနံာ်တၫ်မၤဃံမၤလၤသး, တၫ်အီၣ်တၫ်အီဒီး ကသံၣ်ကသီတဖၣ်လီၤ.”

ကၠီၣ်တဲၣ်တၫ်ဘျၢအပူၤ တၫ်ကွဲးဃာ်၀ဲလၢ ပနံာ်လၢတၫ်တြီဃာ်တဖၣ် တၫ်မ့ၫ်ဆါန့ၣ်တၫ်ဃ့အီၣ်လိး စ့ယိၤ(၅)ကထိတုၤ(၃)ကလး မ့တမ့ၫ်တၫ်ဒုးလီၤဃိၣ် (၃)လါတုၤ(၃)နံၣ်သ့၀ဲအဂ့ၫ်န့ၣ်လီၤ.

ကီၫ်ကၠီၣ်တဲၣ်အပူၤ ကီၫ်ပယီၤပှၤမၤတၫ်ဖိဒီး တၫ်ဂ့ၫ်ကလုာ်ကလုာ်အဃိ ပှၤကီၫ်ပယီၤဖိဟဲအိၣ်လၢ ကၠီၣ်တဲၣ်ပူၤအါမး၀ံၤ သူ၀ဲပနံာ်လၢကီၫ်ပယီၤထုးထီၣ်တဖၣ်အိၣ်အဃိ တၫ်ဆါတၫ်ပှ့ၤ၀ဲအိၣ်အဂ့ၫ် တဲ၀ဲန့ၣ်လီၤ.

ဖဲလါအီးကထိဘၢၣ်(၅)သီအနံၤ ကၠီၣ်တဲၣ်ပှၤမၤတၫ်ဖိကိတိာ်၀ဲၤကျိၤ ပာ်ဖျါ၀ဲလၢကီၫ်ကၠီၣ်တဲၣ်ပဒိၣ် အတၫ်ဃုဖီၣ်ပှၤမၤတၫ်ဖိလၢတဖိးသဲစး,လၢအသီ(၁၂၀)တၫ်တိာ်ကျဲၤအပူၤ တၫ်ဖီၣ်သမံသမိးန့ၫ်၀ဲ ကီၫ်ပယီၤပှၤမၤတၫ်ဖိ (၂)ကလီၫ် (၁)ကလးဂၤဃၣ်ဃၣ်န့ၣ်လီၤ.

Ref: RFA