လါအီးကထိဘၢၣ်(၈)သီ,၂၀၂၄နံၣ်
လါအီးကထိဘၢၣ်(၇)သီအနံၤ, ခ့ၣ်အဲၣ်ယူၣ်-လီၢ်ခၢၣ်သး၀ဲၤလီၢ်ခိၣ်သ့ၣ် တၢ်ကစီၣ်ဘိးဘၣ်ရၤလီၤ၀ဲလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤအပူၤ ခီဖျိသုးကီၣ်ကးအသုး ပညိၣ်ခးလီၤကျိဖးဒိၣ်ဒီးဒြိတဖၣ်ဆူ ကမျၢၢ်အိၣ်ဆိးလီၢ်ကျဲဖံးအီၣ်မၤအီၣ်လီၢ်ကျဲတဖၣ်ပူၤအဃိ ကမျၢၢ်ဘၣ်သံ(၁)ဂၤ, ဘၣ်ဒိ(၁)ဂၤ ဒီး ဖီၣ်န့ၢ်ဆူၣ်၀ဲစ့ၢ်ကီး ကမျၢၢ်(၂)ဂၤအဂ့ၢ်န့ၣ်လီၤ.
လါစဲးပထ့ဘၢၣ်(၃၀)သီအနံၤ, ဟါ(၂)နၣ်ရံၣ်အဆၢကတီၢ် လၢၢ်ဒိၣ်ကီၢ်ဆၣ်ဟီၣ်က၀ီၤ, နိၣ်ထိးအ့ၣ်သ၀ီဖိလၢအမ့ၢ် စီၤထံမူဒီးနီၢ်သဒါဖီ(၂)ဂၤ လဲၤပှ့ၤတၢ်လၢ ၀့ၢ်လၢၢ်တြဲၤအံၤ ခီဖျိ၀့ၢ်လၢၢ်တြဲၤပၢၤကီၢ်သုး ပှၤဟ့ၣ်တၢ်ကစီၣ်ဖိ စီၤစိနၢၤ၀့ က့ၤကိးအီၤဆူ ပၢၤကီၢ်သုးကလၢၤ၀ံၤ ဖီၣ်ဒုးဃၥ် မၤသမံးသမိးတဖၣ်အဂ့ၢ် စံး၀ဲန့ၣ်လီၤ.
မၤတၢ်သမံသမိး၀ံၤအလီၢ်ခံ ပျၢ်ကဒါက့ၤ စီၤထံမူ၀ံၤ ဖဲလါအီးကထိဘၢၣ်(၄)သီအနံၤ ဘၣ်လဲၤက့ၤဆူပၢၤကီၢ်သုးကလၢၤတ၀ီ ဒီး ဖဲလၢလဲၤ၀ဲအဆၢကတီၢ် တၢ်ဃ့အီၤ စ့(၉)ကလီၢ်ကၠး၀ံၤအလီၢ်ခံ ပျၢ်ကဒါက့ၤ နီၢ်သဒါဖီအဂ့ၢ် စံး၀ဲန့ၣ်လီၤ.
လါအီးကထိဘၢၣ်(၃)သီအနံၤ, ဆီထံးကီၢ်ဆၣ်, အ့ၣ်ကနံၣ်သ၀ီအကပၤ တၢ်ဒုးကဲထီၣ်သးလၢ သုးကီၣ်ကးသုးပၥ်ဖှိၣ်တဖၣ်လၢအမ့ၢ် (ခလရ−၅၇၊,ခမရ−၃၅၀,ခမရ−၃၄၉)ဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်((K.N.L.A))အဘၢၣ်စၢၤ၀ံၤအလီၢ်ခံ မုၢ်ထူၣ်(၁၁း၄၅)နၣ်ရံၣ်အဆၢကတီၢ် သုးကီၣ်ကးအသုးခးလီၤကျိဖးဒိၣ်တဖၣ်ဆူ အ့ၣ်ကနံၣ်သ၀ီပူၤအဃိ ဘၣ်ဒိ၀ဲ မအ့သံၣ်တၣ် သးနံၣ်(၂၃)နံၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
လါအီးကထိဘၢၣ်(၃)သီအနံၤ, မုၢ်ထူၣ်(၁၁)နၣ်ရံၣ်ဘျဲၣ်အဆၢကတီၢ် သုးကီၣ်ကးအသုး(ခမရ−၃၀၇)သုးရ့ၣ် ခးလီၤကျိဖးဒိၣ်(၁၂၀)မမ(၂)ဖျၢၣ်ဆူ မူကီၢ်ဆၣ်ပူၤအဃိ လဲၤလီၤတဲၥ်ပိၥ်ဖးထီၣ်၀ဲဒၣ် ဖဲလ့ၣ်ဒိသ၀ီ သီခါဖၠၣ်မဲၥ်ညါဒီး ဖျၢၣ်ထူကရီပူၤအသိး တကတီၢ်ဃီအဆၢကတီၢ် သုးကီၣ်ကးအသုး(ခမရ−၃၀၇)သုးရ့ၣ် ဟဲတ့ၢ်လီၤဒြိမ့ၣ်ပိၢ်(၃)ဖျၢၣ် ဆူ တီကၠဲအ့၀့ၢ်မုၢ်ထီၣ်, ယွၣ်သ့းသ၀ီပူၤအဃိ ဘၣ်ဒိ၀ဲ ဒီၣ်ယ့ၣ်ထွ့ သးနံၣ်(၅၅)နံၣ် အခိၣ်သးဃံအဂ့ၢ်န့ၣ်လီၤ.
