လါအီးကထိဘၢၣ်(၃)သီ,၂၀၂၄နံၣ်
ကရ့ၣ်နံၣ်ကမျၢၢ်တၢ်လဲၤထီၣ်လဲၤထီၣ်ဂံၢ်ဘါကရူၢ်(PKPF) ဘိးဘၣ်ရၤလီၤဃၣ်၀ဲလၢ စးထီၣ်လၢသုးဟံးန့ၢ်ဆူၣ်ထံကီၢ်တၢ်စိတၢ်ကမီၤ, လါဖ့ၤဘြူၤအါရံၤ(၁)သီ (၂၀၂၁)နံၣ် တုၤ လါစဲးပထ့ဘၢၣ်(၃၀)သီ ၂၀၂၄နံၣ်အတီၢ်ပူၤခီဖျိလၢသုးကီၣ်ကးအသုးမၤပျီၢ်မၤဂီၤတၢ်တဖၣ်အဃိ ကီၢ်ကရ့ၣ်နံၣ်ဒီးယိၤဒိၣ်ကီၢ်စဲၣ်ကလံၤစိးဟီၣ်က၀ီၤအပူၤ ပှၤလီၢ်က၀ီၤဖိ ဘၣ်သံ၀ဲ(၇၀၀)ဃၣ်ဃၣ်န့ၣ်လီၤ.
PKPF အလံၥ်ဘိးဘၣ်ရၤလီၤအပူၤ ပၥ်ဖျါဃၣ်၀ဲလၢ ပှၤသံတ့ၢ်အကျါ ခံခီခံကပၤတၢ်ဒုးအပူၤ ခီဖျိသုးကီၣ်ကးအသုး ဖီၣ်န့ၢ်ဆူၣ်မၤသံအီၤအဃိ လီၢ်က၀ီၤကမျၢၢ် ဘၣ်သံ၀ဲ(၅၂၀)ဂၤဒီး ထံလီၢ်ကီၢ်ပူၤပှၤလီၢ်အိၣ်ကမှံဖိဒဲက၀ီၤဖိ (၁၆၃)ဂၤစ့ၢ်ကီး ဘၣ်သံ၀ဲန့ၣ်လီၤ.
ထံလီၢ်ကီၢ်ပူၤပှၤလီၢ်အိၣ်ကမှံဖိဒဲက၀ီၤဖိလၢသံတ့ၢ်တဖၣ်အံၤ ခီဖျိလၢ သုးကီၣ်ကးအသုးခးလီၤကျိဖးဒိၣ်တဖၣ်, ကသံၣ်ကသီတလၢတလီၣ်ဘၣ်ဒီး တၢ်ကူစါန့ၢ်အီၤ ချူးဆၢချူးကတီၢ်တန့ၢ်ဘၣ်အဃိ ဘၣ်သံ၀ဲအဂ့ၢ် PKPF ပှၤဘၣ်မူဘၣ်ဒါတဂၤ တဲ၀ဲန့ၣ်လီၤ.
ကီၢ်ကရ့ၣ်နံၣ်အပူၤ တၢ်ပညိၣ်မၤသံမၤ၀ီ လီၢ်က၀ီၤကမျၢၢ်တၢ်မူးတၢ်ရၢ် ကဲထီၣ်တ့ၢ်၀ဲအါအါဂီၢ်ဂီၢ်၀ံၤ ဘၣ်တၢ်မၤသံမၤ၀ီလီၢ်က၀ီၤကမျၢၣ်တဖၣ်အဖီခိၣ် လိၣ်ဘၣ်၀ဲ တၢ်တြီတၢ်တြၢ်အဂ့ၢ် ကရ့ၣ်နံၣ်ပိၥ်မုၣ်ကရၢ ပှၤဘၣ်မူဘၣ်ဒါလၢ အမၤစၢၤ ထံလီၢ်ကီၢ်ပူၤပှၤလီၢ်အိၣ်ကမှံဖိဂ့ၢ်၀ီတဂၤ စံး၀ဲန့ၣ်လီၤ.
“လီၢ်က၀ီၤကမျၢၢ်ဖိလၢ ဘၣ်သံတ့ၢ်၀ဲတဖၣ် တဒိးန့ၢ်ဘၣ်တၢ်တြီတၢ်တြၢ်နီတမံၤဘၣ်. ဖဲလၢယသ၀ီၤဒၣ်လဲၣ် ပိၥ်မုၣ်တဂၤ ဃ့ၢ်ပူၤဖျဲးသုးဒီးက့ၤဆူဟံၣ်အဆၢကတီၢ် ကျိဖးဒိၣ်ဘၣ်အီၤဒီး သံ၀ဲန့ၣ်လီၤ. ကမျၢၢ်တဖၣ် က့ၤဆူနီၢ်ကစၢ်အိၣ်ဆိးလီၢ်ကျဲ ဟံၣ်ဃီဆၢကတီၢ်ဒၣ်လဲၣ် ဘၣ်သံ၀ဲအဂ့ၢ်” န့ၣ်လီၤ.
PKPF အလံၥ်ဘိးဘၣ်ရၤလီၤအပူၤ ပၥ်ဖျါဃၣ်၀ဲလၢ တၢ်ဒုးတဖၣ်အပူၤ ကရ့ၣ်နံၣ်ဒီကလုၥ်တၢ်ဒီသဒၢသုး(KNDF), ကမျၢၢ်တၢ်ဒီသဒၢသုး(PDF)ဒီး ကရ့ၣ်နံၣ်သုးမုၢ်ဒိၣ်(KA) ပၥ်ဃုၥ် တၢ်ပၢၢ်ဆၢဂံၢ်ဘါကရူၢ်တပၤ ဘၣ်သံတ့ၢ်၀ဲ (၆၅၅)ဂၤအဂ့ၢ်န့ၣ်လီၤ.
PKPF အလံၥ်ဘိးဘၣ်ရၤလီၤအပူၤ ပၥ်ဖျါဃၣ်၀ဲစ့ၢ်ကီးလၢ ကီၢ်ကရ့ၣ်နံၣ်ဟီၣ်က၀ီၤပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ(၃)နံၣ်ဘျဲၣ်အတီၢ်ပူၤ သုးကီၣ်ကးအသုး ဘၣ်သံတ့ၢ်၀ဲ (၃)ကထိဘျဲၣ် (၃၅၃၃)ဂၤအဂ့ၢ်န့ၣ်လီၤ.
