လါစဲးပထ့ဘၢၣ်(၃၀)သီ,၂၀၂နံၣ်
ကရ့ၣ်နံၣ်ကီၫ်စဲၣ်ပူၤ ဒ်သုးကီၣ်ကးတၫ်ဘၣ်သးအသိး လူၤထၢန့ၫ်၀ဲဖးဖီမုၫ်စရီ၀ံၤ တၫ်ဃုထၢကကဲထီၣ်အဂီၫ် ပှၤပာ်ဃုာ်ပာ်ဂီၫ် ဆီၣ်ထွဲမၤစၢၤတဖၣ် တၫ်ကဟံးန့ၫ်ဂ့ၫ်၀ီတုၤလီၤတီၤလီၤအဂ့ၫ် ကရ့ၣ်နံၣ်တၫ်ဒီသဒၢသုး ဒံမီဆိၣ်(ဒီးမော့ဆို)ထုးထီၣ်ဘိးဘၣ်ရၤလီၤ၀ဲလီၤ.
လီၤဆီဒၣ်တၫ် ဒ်သုးကီၣ်ကးအတၫ်ဘၣ်သးအသိး တၫ်ဃုထၢကကဲထီၣ်အဂီၫ်ဒီးဖးဖီမုၫ်စရီတၫ်ဂ့ၫ်တဖၣ်အပူၤ Non-CDM ပဒိၣ်ပှၤမၤတၫ်ဖိတဖၣ်ဒီးပှၤလၢဘၣ်ထွဲဒီးသုးကီၣ်ကးခဲလၢာ် မ့ၫ်တၫ်ဟ့ၣ်ပလီၫ်အ၀ဲသ့ၣ်န့ၣ်လီၤ.
တၫ်ကပာ်လီၤတၫ်စုက၀ဲၤဒီး တၫ်ကနုာ်လီၤဒိးဃုထၢသးလၢ တၫ်ဃုထၢပူၤအဂီၫ် သုးကီၣ်ကးအတၫ်ကွဲမုာ်အံၤ ကမျၢၫ်တၫ်ဒီသဒၢသုးဒံမီဆိၣ်တကပၤ လ့ၤတက့ၤတူၫ်လိာ်၀ဲတသ့ဘၣ်အဂ့ၫ် ဟ့ၣ်ဒုးသ့ၣ်ညါ၀ဲလီၤ.
သုးကီၣ်ကးန့ၣ် ကမၤလီၤမၫ်ကွံာ် သုးကွီၫ်မ့ၣ်တၫ်မၤကမၣ်တဖၣ်အဂီၫ် ဖဲ၂၀၂၅နံၣ်အပူၤန့ၣ် ကမၤတၫ်ဃုထၢ၀ံၤ ၂၀၀၈ထံကီၫ်တၫ်ဘျၢသဲစးခိၣ်သ့ၣ်လၢဖီၣ်ဃာ်၀ဲန့ၣ် အဲၣ်ဒိးဒုးအိၣ်ထီၣ်ကဒါက့ၤ၀ဲအသးသမူ၀ံၤ လၢထံရူၫ်ကီၫ်သဲးတကပၤ ဂုၫ်ကျဲးစၢး ဖီၣ်ဃံးကဒီးတၫ်အဂ့ၫ် ဒံမီဆိၣ် PDFတဲ၀ဲလီၤ.
သုးကီၣ်ကးအတၫ်ကွဲမုာ် တၫ်ပၢၫ်ဆၢဂံၫ်ဘါကရၢတဖၣ် လၢကတၢၣ်ပီၣ်တဲသကိးတၫ်မုာ်တၫ်ခုၣ်အဂီၫ်န့ၣ် တမ့ၫ် ထံရူၫ်ကီၫ်သဲးတၫ်စၢလၢ ကတီၫ်အံၤတၫ်ဃံးတၫ်စ့ၢ်အဂီၫ်ဘၣ်အမဲာ်ညါ မ့ၫ်ထံရူၫ်ကီၫ်သဲးတၫ်ဘၣ်ဘျူးတခါအဂ့ၫ် ကီၫ်ကရ့ၣ်နံၣ်ပၢပြးကီၣ်ကး( IEC)စ့ၫ်ကီး ဖဲလါစဲးပထ့ဘၢၣ်(၂၈)သီနံၤန့ၣ် ဟ့ၣ်ဒုးသ့ၣ်ညါ ဘိးဘၣ်ရၤလီၤ၀ဲလီၤ.
သုးဟံးန့ၫ်ဆူၣ်တၫ်စိတၫ်ကမီၤလၢတဖိးသဲစးအံၤအတၫ်ကွဲမုာ်န့ၣ် ကီၫ်ကရ့ၣ်နံၣ်ပူၤ တၫ်ပၢၫ်ဆၢဂံၫ်ဘါကရၢတဖၣ် တတူၫ်လိာ်၀ဲဘၣ်အမဲာ်ညါ ဖဲၣ်ဒရၢၣ်သနူအမ့ၫ်အတီကအိၣ်ထီၣ်အဂီၫ် ကကျဲးစၢးဂဲၤလိာ်၀ဲအဂ့ၫ်စ့ၫ်ကီး ဘိးဘၣ်ပာ် ဖျါ၀ဲလီၤ.
