လါစဲးပထ့ဘၢၣ်(၃၀)သီ,၂၀၂၄နံၣ်
ကီၢ်နံၣ်ပီအပူၤ ခီဖျိလၢမူခိၣ်စူၤဒိၣ်၀ံၤ ထံဒိၣ်နိယွၤဒီးဟီၣ်ခိၣ်လီၤပှီၢ်ကဲထီၣ်သးအဃိ ပှၤဘၣ်သံ၀ဲ (၁၀၀)ဘျဲၣ် ဒီး ပှၤလီၤမၢ်ကွံၥ်၀ဲ (၇၀)ဃၣ်ဃၣ်အဂ့ၢ် ပှၤဘၣ်မူဘၣ်ဒါတဖၣ် တဲ၀ဲန့ၣ်လီၤ.
ထံဒိၣ်နိယွၤဒီးဟီၣ်ခိၣ်လီၤပှီၢ်ကဲထီၣ်သး ဖဲ၀့ၢ်ခိၣ်ခ့းတးမဒူၣ်ဒီးအကပိၥ်ကပၤ တၢ်လီၢ်ဘံးဟီၣ်က၀ီၤတဖၣ်ပူၤအဃိ ပှၤသံဟဲအိၣ်အါထီၣ်သ့အဂ့ၢ် စံး၀ဲန့ၣ်လီၤ. ဟံၣ်ဃီအကထိကလးလၢ အိၣ်ဖဲထံကျိကၢၢ်နံၤတဖၣ်တခီ ထံလုၥ်ဘၢကွံၥ်၀ဲန့ၣ်လီၤ.
တကးဘၣ် ကျဲမုၢ်ဖးဒိၣ်တဖၣ် ဘၣ်တၢ်ကးတံၥ်ဃၣ်၀ဲအသိး ပှၤလၢအိၣ်ကးတံၥ်သးတဖၣ်စ့ၢ်ကီး အိၣ်၀ဲအါအါဂီၢ်ဂီၢ်န့ၣ်လီၤ. ခီဖျိလၢထံဒိၣ်နိယွၤအဃိ ပှၤဘၣ်သံ၀ဲအသိး ဟီၣ်ခိၣ်လီၤပှီၢ်အဃိ ပှၤအါအါဂီၢ်ဂီၢ် ဘၣ်သံ၀ဲစ့ၢ်ကီးန့ၣ်လီၤ.
ခီဖျိလၢ ဟီၣ်ခိၣ်လီၤပှီၢ်ကဲထီၣ်သးလၢ ခ့းတးမဒူၣ်မုၢ်ထီၣ်, ဘဲးတၣ်ပၣ်ဟီၣ်က၀ီၤအပူၤအဃိ ဘၣ်သံ၀ဲ မိၢ်ဒၢ(၁)ဂၤ, ဖိသၣ်လၢသးနံၣ်အိၣ်(၄)နံၣ် ပၥ်ဃုၥ် ပှၤ(၅)ဂၤအဂ့ၢ် ထံကီၢ်ပၢတၢ်ကစီၣ်၀ဲၤကျိၤ ပၥ်ဖျါဃၣ်၀ဲန့ၣ်လီၤ.
ဒ်န့ၣ်အသိး ဟီၣ်ခိၣ်လီၤပှီၢ်ကဲထီၣ်သးစ့ၢ်ကီးလၢ ၀့ၢ်ခိၣ်မုၢ်နုၥ်, ဒၣ်ဒ့(ဒါဒင်း)ဟီၣ်က၀ီၤပူၤအဃိ သိလ့ၣ်ဘၢး(ဘတ်စ်ကား)တခိၣ် ဟီၣ်ခိၣ်လီၤဘျၢကွံၥ်၀ံၤ တၢ်ထံၣ်န့ၢ်၀ဲ အစိၥ်(၂)စိၥ်လၢ သိလ့ၣ်ပူၤန့ၣ်လီၤ. သိလ့ၣ်ဘၢးအပူၤ ပၥ်ဃုၥ်၀ဲပှၤနီၣ်သိလ့ၣ်ဘၢးဒီး ပှၤ(၁၂)ဂၤဟဲဒိး၀ဲအဂ့ၢ် ပှၤဘၣ်မူဘၣ်ဒါတဖၣ် တဲ၀ဲန့ၣ်လီၤ.
လၢန့ၣ်အမဲၥ်ညါ ဟီၣ်ခိၣ်လီၤပှီၢ်ကဲထီၣ်သးလၢ ၀့ၢ်ခိၣ်မုၢ်နုၥ်ကလံၤထံးတပၤ, နံၣ်ပီဖျၢၣ်ထူကရၢခိၣ်ကျၢၢ်, တၢ်ဂဲၤလိတၢ်လီၢ်တခါအပူၤအဃိ ပှၤဂဲၤဖျၢၣ်ထူဖိ(၆)ဂၤဘၣ်သံ၀ဲ၀ံၤ ကလံၤထံးတၢ်လီၢ်ဘံးဟီၣ်က၀ီၤပူၤစ့ၢ်ကီး ပှၤမၤပူၤဖျဲးသးသမူဖိ (၄)ဂၤစ့ၢ်ကီး သံ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: BBC
