လါစဲးပထ့ဘၢၣ်(၂၇)သီ,၂၀၂၄နံၣ်
သုးကီၣ်ကးန့ၣ် ဃ့ထီၣ်၀ဲPDFဒီးကလုာ်ဒူၣ်တၫ်ပၢၫ်ဆၢကရၢတဖၣ် လၢတၫ်ဖီၣ်စုက၀ဲၤဒုးတၫ်အလီၫ် အဲၣ်ဒိးမၤတၫ်ထံၣ်လိာ်တၢၣ်ပီၣ်တဲသကိးထံရူၫ်ကီၫ်သဲးအဂ့ၫ်န့ၣ်လီၤ.
သုးကီၣ်ကးန့ၣ် ထံရူၫ်ကီၫ်သဲးတၫ်သဘံၣ်သဘုၣ်န့ၣ် ကဘှါဆှဲ၀ဲလၢထံရူၫ်ကီၫ်သဲးကျဲအဂ့ၫ် ထီထီၣ်၀ဲအခိၣ်တီ၀ံၤ ဖဲမဟါနံၤဟါ(၈)နၣ်ရံၣ်အကတီၫ်န့ၣ် ဘိးဘၣ်ရၤလီၤ၀ဲလီၤ.
တၫ်ဘိးဘၣ်ရၤလီၤအပူၤ သုးကီၣ်ကးအတၫ်ဃ့ထီၣ်လၢ ပှၤဖီၣ်စုက၀ဲၤပၢၫ်ဆၢတၫ်တကပၤ ကပာ်လီၤတၫ်စုက၀ဲၤဒီးကဒုးအိၣ်ထီၣ်ပၣ်တံၣ်၀ံၤ လၢအ၀ဲသ့ၣ်ကတီခိၣ်ရိၣ်မဲမၤ၀ဲ တၫ်ဃုထၢအပူၤ တၫ်ကနုာ်သတြီၤအဂီၫ် ပာ်ဃုာ်၀ဲလီၤ.
သုးမီၤစိရိၤလီၫ်လံၤ သါရွှ့ၣ်စ့ၫ်ကီး ဖဲတချူးမၤ ၂၀၁၀နံၣ်တၫ်ဃုထၢဒံးဘၣ်အကတီၫ် ဃ့ထီၣ်တ့ၫ်ကလုာ်ဒူၣ်တၫ်ပၢၫ် ဆၢကရၢတဖၣ် ဒ်သိးအံၤန့ၣ်လီၤ.ဖဲန့ၣ်အဆၢကတီၫ် ကလုာ်ဒူၣ်တၫ်ပၢၫ်ဆၢကရၢလၢ တူၫ်လိာ်သုးကီၣ်ကးအတၫ်ရဲၣ်တၫ်ကျဲၤန့ၣ် ဘၣ်ကဲထီၣ်သုးကီၣ်ကးအစုတီၤဖီလာ် သုးခိးကီၫ်ဆၢဒီးဂၢၤကီၫ်သုးတဖၣ်၀ံၤ မ့မ့ၫ်ကလုာ်ဒူၣ် တၫ်ပၢၫ်ဆၢ ကရၢKIAလၢဂ့ၫ်လိာ် သုးကီၣ်ကးအတၫ်ရဲၣ်တၫ်ကျဲၤတခီ ဒုး၀ဲန့ၣ်လီၤ.
သုးကီၣ်ကးအတၫ်ဃ့ထီၣ်အပူၤ ကမျၢၫ်တၫ်ဒီသဒၢသုး(PDF)ပာ်ဃုာ်ဘၣ်ဆၣ် မ့မ့ၫ်NUG လၢကရၢကရိဒုးအိၣ်ထီၣ် PDFတဖၣ်တခီ ဖၢနုာ်တဲဃုာ်၀ဲတအိၣ်ဘၣ်.
သုးကီၣ်ကးတဲ၀ဲလၢ ကတၢၣ်ပီၣ်တဲသကိးထံရူၫ်ကီၫ်သဲးဘၣ်ဆၣ် အတၫ်ဃ့ထီၣ်အပူၤ ယၢၤထီၣ်၀ဲPDF ဒီးကလုာ်ဒူၣ်တၫ်ပၢၫ်ဆၢကရၢတဖၣ် ဒ်ကရၢလၢပှၤမၤပျီၫ်မၤဂီၤတၫ်အသိးန့ၣ်လီၤ.
၂၀၂၀နံၣ်တၫ်ဃုထၢအပူၤ ပၣ်တံၣ်လၢတူၫ်လိာ်ဆီၣ်ထွဲသုးကီၣ်ကးတဖၣ် တမၤနၢၤတၫ်ဘၣ်ဒီး ဟံးန့ၫ်တၫ်စိတၫ်ကမီၤ ဘၣ်ဆၣ်သုးကီၣ်ကးတခီ တဲတခီတၢၤ၀ဲဒၣ်လၢ ဟံးန့ၫ်တၫ်စိတၫ်ကမီၤ ခီဖျိလၢတၫ်ဖးကဘျံးကဘျၣ်အဃိန့ၣ်လီၤ.
သုးကီၣ်ကးန့ၣ် လါအီးကထိဘၢၣ်(၁)သီနံၤ ကထၢဖးဖီမုၫ်စရီ၀ံၤ ကဟံးန့ၫ်၀ဲအခီၣ်တဃာ်လၢ ဖးဖီမုၫ်စရီ၀ဲအံၤအဖီခိၣ် ဒီးကဘိးဘၣ်ရၤလီၤ ကမၤတၫ်ဃုထၢန့ၣ်လီၤ.သုးကီၣ်ကးန့ၣ် တၫ်ဃုထၢလၢကတီခိၣ်ရိၣ်မဲမၤ၀ဲ မုၫ်နံၤမုၫ်သီတခီ တဲဖျါ၀ဲတအိၣ်ဒံးဘၣ်.
တၫ်ဃုထၢလၢ သုးကီၣ်ကးကတီခိၣ်ရိၣ်မဲမၤ၀ဲန့ၣ် တၫ်သုတတူၫ်လိာ်တဂ့ၤအဂီၫ် ဒီကလုာ်ဃူဖိးပဒိၣ်(NUG)ဒီး ကရၢလၢပၢၫ်ဆၢတၫ်တဖၣ် ဆီၣ်တခူထီၣ်ဃာ်၀ဲလီၤ.
သုးကီၣ်ကး ဘိးဘၣ်ရၤလီၤ၀ဲလၢ ကွဲမုာ်တၫ်မုာ်တၫ်ခုၣ်အဂ့ၫ်ဘၣ်ဆၣ် လါစဲးပထ့ဘၢၣ်အပူၤ လဲၤတ့ၫ်လီၤမ့ၣ်ပိၫ် လၢကဘီယူၤတဖၣ် အိၣ်ထီၣ်၀ဲတပယူာ်ဃီန့ၣ်လီၤ.
Ref: Myanmar Now
