လါစဲးပထ့ဘၢၣ်(၂၇)သီ,၂၀၂၄နံၣ်
ဖဲလါစဲးပထ့ဘၢၣ်(၂၅)သီအနံၤ ခ့ၣ်အဲၣ်ယူၣ်-လီၫ်ခၢၣ်သး ဘိးဘၣ်ပာ်ဖျါဃၣ်၀ဲလၢ တၫ်ဆီလီၤတၫ်ပၢတၫ်ပြးကန့ၫ်အဂီၫ် တၫ်ပညိၣ်လီၤ၀ဲ၀ံၤ ဖဲလါစဲးပထ့ဘၢၣ်(၁၉)သီနံၤတုၤ(၂၃)သီအနံၤန့ၣ် တၢ်မၤ၀ဲတၢၣ်ပီၣ်တဲသကိးထီဘိကမံးတံာ်တၫ်ဖံးတၫ်မၤတၢ်ဂ့ၢ်တဖၣ် ဖဲခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ,သုးက့နီၫ်ဂံၫ်(၇),ကီၫ်ရ့ၣ်ဖၣ်အၣ်,ကီၫ်ဆၣ်ဒူယီၫ်,ဒူရ့ၣ်သ၀ီအပူၤန့ၣ်လီၤ.
တၫ်ဘိးဘၣ်ရၤလီၤ တၫ်တၢၣ်ပီၣ်တဲသကိးအံၤန့ၣ် လီၤဂာ်လၢအဆိကတၢၫ်တဘျီလီၤ. ကီၫ်ရ့ၣ်ဖၣ်အၣ်လၢ ကီၫ်ဆၣ် အိၣ်(၅)ဘ့ၣ်အံၤအပူၤ တၫ်ဆီလီၤတၫ်ပၢတၫ်ပြးကန့ၫ်အဂီၫ် ဘၣ်တၫ်မၤ၀ဲလီၤ. လၢ၂၀၂၁နံၣ် သုးဟံးန့ၫ်တၫ်စိတၫ်ကမီၤလံၤလံၤ ဟီၣ်က၀ီၤလၢသုးကီၣ်ကးဘၣ်ပာ်တ့ၫ်ကွံာ်တဖၣ်န့ၣ် မ့ၫ်ဒၣ်ပဟီၣ်က၀ီၤထူလံၤအဃိ ပဆီလီၤတၫ်ပၢတၫ်ပြး ကန့ၫ်အဂီၫ် ပမၤလီၤအဂ့ၫ် ခ့ၣ်အဲၣ်ယူၣ် -ပှၤကတိၤတၫ်ပၢ ပဒိၣ်စီၤတီနံ တဲ၀ဲလီၤ.
တၫ်တၢၣ်ပီၣ်တဲသကိးတဘျီ၀ဲအံၤ ခ့ၣ်အဲၣ်ယူၣ်- တၫ်ဟ့ၣ်ပီညါတၫ်ကရၢကရိဒီးတၫ်သူၣ်ထီၣ်ဆီလီၤ တၫ်ဖံးတၫ်မၤကမံးတံာ်ကရၢဖိတဖၣ်ဟဲထီၣ်၀ဲ၀ံၤ ခ့ၣ်အဲၣ်ယူၣ်အကျဲသနူ, တၫ်မၤကျဲသနူ, တၢ်သူၣ်ထီၣ်တၫ်ဘျၢသဲစးခိၣ်သ့ၣ်ဒီး တၢ်သူၣ်ထီၣ်တၫ်ဘျၢသဲစးခိၣ်သ့ၣ် အသဲစးတၫ်ဘျၢတဖၣ် တၢၣ်ပီၣ်ဟ့ၣ်ခီဟ့ၣ်နီၤလီၤ၀ဲအဂ့ၫ် တၫ်သ့ၣ်ညါဘၣ်လီၤ.
“ခ့ၣ်အဲၣ်ယူၣ်အတၫ်မုၫ်လၫ်တခါလၢအမ့ၫ် တၫ်ကဒုးအိၣ်ထီၣ် ကီၫ်သူလ့ၤ(ကညီကီၫ်)ပဒိၣ်အဂ့ၫ် လၢ၂၀၂၃နံၣ်လါအီကူးအပူၤ ဒ်ပပာ်ဖျါဆိတ့ၫ်အသိး ပပၢဆှၢအီၤဒ်ပဒိၣ်တဖုအက့ၫ်အဂီၤကန့ၫ်အဂီၫ် ပှၤလၢကပာ်ဃုာ်လၢပၢပြးပူၤတဖၣ် ခီၣ်တဃာ်ကျဲသနူတဖၣ် ကနၫ်ပၢၫ်ဃာ်၀ဲ၀ံၤ ကမၤတၫ်တုၤလီၤတီၤလီၤအဂီၫ် ပဟ့ၣ်တၫ်မၤလိအဂ့ၫ် ပဒိၣ်စီၤတီနံတဲ၀ဲန့ၣ်လီၤ.
ဒ်ခ့ၣ်အဲၣ်ယူၣ် အထံရူၫ်ကီၫ်သဲးကျဲသနူအသိး ကလုာ်ခဲလၢာ်လၢအိၣ်ဆိးဖဲကညီကီၫ်ပူၤတဖၣ် အိၣ်ဖိးမံလိာ်သး၀ံၤ အိၣ်ဆိးသဃဲၤဃုာ်တပူၤဃီကန့ၫ်အဂီၫ် မၤထွဲ၀ဲအဂ့ၫ် တဲ၀ဲလီၤ.
တၫ်ထံၣ်လိာ်တၢၣ်ပီၣ်တဲသကိးတၫ်တဘျီအံၤ ပှၤခဲလၢာ်ဟဲထီၣ်၀ဲ(၇၄)ဂၤ၀ံၤ ကီၫ်ဆၣ်ဒူယီၫ်ထီဘိကမံးတံာ်တဖၣ်, ကီၫ်ရ့ၣ်ဖၣ်အၣ် ၀ဲၤကျိၤခိၣ်နၫ်တဖၣ်,ကညီသးစၫ်တၫ်ကရၢကရိ(KYO)ဒီး ကညီပိာ်မုၣ်ကရၢ(KWO)ပာ်ဃုာ် ပၢပြးဘၣ်မူဘၣ်ဒါဒီးသ၀ီသးပှၫ်တဖၣ် ဟဲထီၣ်၀ဲန့ၣ်လီၤ.
