လါစဲးပထ့ဘၢၣ်(၂၇)သီ,၂၀၂၄နံၣ်
လါစဲးပထ့ဘၢၣ်(၂၆)သီအနံၤ, ခ့ၣ်အဲၣ်ယူၣ်-လီၢ်ခၢၣ်သး၀ဲၤလီၢ်ခိၣ်သ့ၣ် တၢ်ကစီၣ်ပၥ်ဖျါဃၣ်၀ဲလၢ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကး ပညိၣ်ခးလီၤကျိဖးဒိၣ်ဒီးဒြိမ့ၣ်ပိၢ်တဖၣ် ဆူခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤ ကမျၢၢ်အိၣ်ဆိးလီၢ်ကျဲတဖၣ်ဒီး တၢ်ဖံးအီၣ်မၤအီၣ်လီၢ်ကျဲတဖၣ်အပူၤအဃိ ဘၣ်ဒိ၀ဲတကွဲဖိ(၂)ဂၤ, ကမျၢၢ်(၂)ဂၤ ဒီး ဘၣ်ဟးဂီၤကွံၥ်၀ဲ ကမျၢၢ်ဟံၣ်ဃီ(၂)ဖျၢၣ်န့ၣ်လီၤ.
လါစဲးပထ့ဘၢၣ်(၁၉)သီအနံၤ, ဟါ(၃း၃၀)နၣ်ရံၣ်အဆၢကတီၢ်, သုးကီၣ်ကးအသုး(ခလရ−၂၆၄)သုးရ့ၣ် ခးလီၤ(၁၂၂ မမ)ဟီၣ်၀့ၣ်စၣ်ကျိဖးဒိၣ်(၁)ဖျၢၣ်ဆူ ကီၢ်ဆၣ်လၢၢ်ဒိၣ်ဟီၣ်က၀ီၤအပူၤအဃိ လဲၤလီၤတဲၥ်ပိၥ်ဖးထီၣ်၀ဲဒၣ် ဖဲယီးသွါကိသ၀ီပူၤဒီး ဘၣ်ဒိ၀ဲတကွဲဖိ(၂)ဂၤအဂ့ၢ် စံး၀ဲန့ၣ်လီၤ.
လါစဲးပထ့ဘၢၣ်(၂၅)သီအနံၤ, မုၢ်ထူၣ်(၁)နၣ်ရံၣ်အဆၢကတီၢ် သုးကီၣ်ကးအသုး(ခလရ-၂၆၄)သုးရ့ၣ် ဟဲတ့ၢ်လီၤဒြိမ့ၣ်ပိၢ်(၁)ဖျၢၣ်ဆူ ဃီကၤသ၀ီပူၤအဃိ ဘၣ်ဟးဂီၤကွံၥ်၀ဲ အူခၠံးငွ့ၣ်ဟံၣ်(၁)ဖျၢၣ် ဒီး တကတီၢ်ဃီအဆၢကတီၢ် ခးလီၤကဒီး၀ဲ (၁၂၂ မမ)ဟီၣ်၀့ၣ်စၣ်ကျိဖးဒိၣ်(၁)ဖျၢၣ်အဃိ လဲၤလီၤတဲၥ်ပိၥ်ဖးထီၣ်၀ဲဒၣ်ဖဲ နိၣ်ထိးအ့ၣ်သ၀ီဒီးစွဲတလဲသ၀ီအဘၢၣ်စၢၤန့ၣ်လီၤ.
ဒ်န့ၣ်အသိး ဖဲလါစဲးပထ့ဘၢၣ်(၂၅)သီအနံၤ, ဂီၤ(၉း၃၀)နၣ်ရံၣ်အဆၢကတီၢ် သုးကီၣ်ကးအသုး(ခမရ−၅၉၉)သုးရ့ၣ် ခးလီၤ(၈၁ မမ)ကျိဖးဒိၣ်(၇)ဖျၢၣ်ဆူ ကီၢ်ဆၣ်မူဟီၣ်က၀ီၤပူၤအဃိ လဲၤလီၤတဲၥ်ပိၥ်ဖးထီၣ်၀ဲဒၣ် ဖဲစ၀့သ၀ီပူၤ၀ံၤ ဘၣ်ဒိ၀ဲအူ၀့လဲၣ်သးနံၣ်(၆၃)နံၣ် ဒီး မီၣ်အီၣ်ပၠ့းဖၠိ သးနံၣ်(၁၈)နံၣ် (၂)ဂၤအဂ့ၢ် ပၥ်ဖျါဃၣ်၀ဲန့ၣ်လီၤ.
လၢန့ၣ်အမဲၥ်ညါ ဖဲလါစဲးပထ့ဘၢၣ်(၂၅)သီအနံၤ, မုၢ်ထူၣ်(၂း၂၅)နၣ်ရံၣ်ဒီး (၃း၁၇)နၣ်ရံၣ်အဆၢကတီၢ် သုးကီၣ်ကးအသုးဟဲတ့ၢ်လီၤကဒီး ဒြိမ့ၣ်ပိၢ်ဆူ ကီးမဲၢ်သူၣ်သ၀ီပူၤအဃိ ဘၣ်ဟးဂီၤကွံၥ်၀ဲ ကိၣ်မၠိသူၣ်ဟံၣ်(၁)ဖျၢၣ်အဂ့ၢ် စံး၀ဲန့ၣ်လီၤ.
