ကီၢ်ပယီၤဂ့ၢ်၀ီ တၢ်ကထံၣ်လိၥ်ဘှဲရှဲအဂီၢ် အီစတြ့လယါ, အ့ဒံယါ, ယပၣ်ဒီးအမဲရကၤ ဆီၣ်တခူဆီၣ်

လါစဲးပထ့ဘၢၣ်(၂၆)သီ,၂၀၂၄နံၣ်

အီစတြ့လယါ, အ့ဒံယါ, ယပၣ်ဒီးအမဲရကၤထံကီၢ်တဖၣ် ဆီၣ်တခူထီၣ်လၢ ကီၢ်ပယီၤဂ့ၢ်၀ီအဖီခိၣ် ပှၤလၢပၥ်ဃုၥ်ပၥ်ဂီၤတဖၣ်အဘၢၣ်စၢၤ တၢ်ထံလိၥ်တၢၣ်ပီၣ်တဲသကိးတဆီ တၢ်ကဘှါရှဲဘၣ်တၢ်ဃံးတၢ်စ့ၢ်ဒီး တၢ်က့ၤဆူပှၤခဲလၢၥ်ပၥ်ဃုၥ် ဒံၣ်မိၣ်ခြ့ၣ်စံၣ်ကျဲအဖီခိၣ်ကန့ၢ်အဂီၢ်န့ၣ်လီၤ.

Quad ခိၣ်နၢ်လွံၢ်ဂၤဟဲထီၣ်(၄)၀ီတ၀ီ ပတီၢ်ထီတၢ်အိၣ်ဖှိၣ်ဖးဒိၣ် လၢတၢ်မၤအီၤဖဲ ဒဲၢ်လၣ်၀ဲကီၢ်စဲၣ်(ဒယ်လာဝဲပြည်နယ်), ၀ဲၢ်မ့ၣ်တၣ်၀့ၢ်(ဝယ်လ်မင်တန်)အပူၤ ဃ့ထီၣ်၀ဲအဂ့ၢ် ဘိးဘၣ်ရၤလီၤဃၣ်၀ဲလၢ လါစဲးပထ့ဘၢၣ်(၂၅)သီအနံၤန့ၣ်လီၤ.

အီစတြ့လယါကိတိၥ်ခိၣ်ကျၢၢ် အၣ်တိၣ်နံၣ်အဲၣ်ဘါနံး, အ့ဒံယါကိတိၥ်ခိၣ်ကျၢၢ် နၣ်ရၣ်တြၣ်မိၣ်ဒံၣ်, ယပၣ်ကိတိၥ်ခိၣ်ကျၢၢ် ကံၣ်ရှံၣ်ဒၣ်ဖူၣ်မံၣ်ယိၣ်ဒီး အမဲရကၤကီၢ်ခိၣ် ကၠိဘဲၣ်တၣ် ဟဲထီၣ်၀ဲပတီၢ်ထီၣ်တၢ်အိၣ်ဖှိၣ်ဖးဒိၣ်၀ံၤ ဃ့ထီၣ်၀ဲလၢ တၢ်ကဒီသဒၢကးတံၥ်ဘၣ် ကဘီယူၤဒုးသုးပၥ်ဃုၥ် စုက၀ဲၤဒီးသုးတၢ်ပီးတၢ်လီ တၢ်ယွၤလီၤအဂ့ၢ်န့ၣ်လီၤ.

ရၢၢ်ခၢၢ်ကီၢ်စဲၣ်ပၥ်ဃုၥ် ကီၢ်ပယီၤအပူၤ ထံရူၢ်ကီၢ်သဲး,တၢ်ဘံၣ်တၢ်ဘၢဒီး ပှၤဟီၣ်ခိၣ်ဖိတၢ်ဒိသူၣ်ဒိသးဂ့ၢ်၀ီတၢ်အိၣ်သးတဖၣ်လၢ ဟဲအၢထီၣ်အဖီခိၣ် ဘၣ်ယိၣ်ဘၣ်ဘှီ၀ဲ၀ံၤ တၢ်မၤပျီၢ်မၤဂီၤတဖၣ် ကပတုၥ်ကွံၥ်တဘျီဃီ, တၢ်ကပျၢ်က့ၤ ပှၤလၢတၢ်ဖီၣ်န့ၢ်ဆူၣ်ဃၣ်တဖၣ်, ပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤတဖၣ် တၢ်ကဟ့ၣ်ဘၣ်အီၤဂ့ၤဂ့ၤ, ကီၢ်ပယီၤပူၤ ပှၤလၢပၥ်ဃုၥ်ပၥ်ဂီၤတဖၣ်အဘၢၣ်စၢၤ တၢ်ထံၣ်လိၥ်တၢၣ်ပီၣ်တဲသကိးတဆီ တၢ်ကဘှါရှဲဘၣ်တၢ်ဃံးတၢ်စ့ၢ်ဒီး တၢ်က့ၤဆူပှၤခဲလၢၥ်ပၥ်ဃုၥ် ဒံၣ်မိၣ်ခြ့ၣ်စံၣ်ကျဲအဖီခိၣ်ကန့ၢ်အဂီၢ် ဃ့ထီၣ်ကဒီး၀ဲန့ၣ်လီၤ.

အၣ်စံၣ်ယၣ်ပှၤပၢၤလီၢ်ဆ့ၣ်နီၤဒီး ကီၢ်ပယီၤဂ့ၢ်၀ီခၢၣ်စးလီၤဆီ တၢ်ဟူးတၢ်ဂဲၤတဖၣ်ပၥ်ဃုၥ် တၢ်ဟူးတၢ်ဂဲၤလၢ အၣ်စံၣ်ယၣ် ဂုၥ်ကျဲးစၢမၤတ့ၢ်၀ဲတဖၣ် တူၢ်လိၥ်ဆီၣ်ထွဲ၀ဲအဂ့ၢ် ဒီး တၢ်ကမၤဖျါထီၣ် အၣ်စံၣ်ယၣ်တၢ်အၢၣ်လီၤ(၅)ထံၣ် အမိၢ်လံမိၢ်ပှၢ်ကန့ၢ်အဂီၢ် စ့ၢ်ကီးဃ့ထီၣ်၀ဲန့ၣ်လီၤ.

ထံလီၢ်ကီၢ်ပူၤ တၢ်ဘၣ်ဂံၥ်ဂူၥ်ဒီး ဆဲၣ်ဘၣ်ကွီၢ်မ့ၣ်လၢ တအိၣ်ဂၢၤကျၢၢ်တဖၣ်, တဖိးသဲစး တၢ်ကူလဲၢ်မၤကၤကသံၣ်မူၤဘှီးဒီး တၢ်ကူလဲၢ်မၤကၤပှၤကညီတဖၣ်အံၤ ဘၣ်အၢထီၣ်လီၢ်က၀ီၤပူၤ တၢ်အိၣ်ဂၢၤဆိးကျၢၢ်အဂ့ၢ် စံး၀ဲန့ၣ်လီၤ.

ကီၢ်ပယီၤထံဖိကမျၢၢ်ဖိတဖၣ် ကတီခိၣ်ရိၣ်မဲဒီး ကဘှါရှဲဘၣ် တၢ်ဃံးတၢ်စ့ၢ်တဖၣ်အဂီၢ်ဒီး ကီၢ်ပယီၤပူၤ ပှၤလၢပၥ်ဃုၥ်ပၥ်ဂီၤခဲလၢၥ်အဘၢၣ်စၢၤ တၢ်ထံၣ်လိၥ်တၢၣ်ပီၣ်တဲသကိးတဆီ တၢ်က့ၤဆူ ဒံၣ်မိၣ်ခြ့ၣ်စံၣ်ကျဲအဖီခိၣ်ကန့ၢ်အဂီၢ် တၢ်ပၥ်လီၤသးကျၢၤမူဆူအဂ့ၢ် စံး၀ဲန့ၣ်လီၤ.

Ref: DVB