ထံလုာ်ဘၢတၢ်ကဲထီၣ်သးလၢ မဲခီၣ်ထံကျိထံကီၢ်တဖၣ်န့ၣ် တမ့ၢ်သါတၢ်ကမၣ်ဘၣ်အဂ့ၢ် တရူးဂ့ၢ်လိၥ်

လါစဲးပထ့ဘၢၣ်(၁၉)သီ,၂၀၂၄နံၣ်

ဖဲမဟါအနံၤ, ကၠီၣ်တဲၣ်ထံဂုၤကီၢ်ဂၤ၀ဲၤကျိၤ တဲလီၤ၀ဲလၢ တၢ်မၤ၀ဲတၢ်တၢၣ်ပီၣ်တဲသကိးဒီးသုးကီၣ်ကးလၢ ဘၣ်ထွဲဒီး တၢ်မၤစှၤလီၤထံလုၥ်ဘၢအဂ့ၢ်န့ၣ်လီၤ. လါစဲးပထ့ဘၢၣ်(၁၇)သီအနံၤ, BankgkokPost တၢ်ကစီၣ်သန့ပၥ်ဖျါဃၣ်၀ဲလၢ ကၠီၣ်တဲၣ်ထံဂုၤကီၢ်ဂၤကိတိၥ်အတၢ်တဲလီၤဃုၥ်ဒီး တကတီၢ်ဃီမဲခီၣ်ကျိထံကီၢ်တဖၣ် ထံလုၥ်ဘၢကွံၥ်ကဲထီၣ်သးန့ၣ် တမ့ၢ်သါတၢ်ကမၣ်ဘၣ်အဂ့ၢ် တရူးဂ့ၢ်လိၥ်ဃၣ်၀ဲအဂ့ၢ်န့ၣ်လီၤ.

ကလံၤမုၢ်ဒီးတၢ်လီၢ်ထီဟီၣ်က၀ီၤပူၤတဆီ ထံဟဲနုၥ်လီၤလၢဃိၣ်လိၥ်ကျိပူၤအဃိ ကီၢ်ပယီၤအံၤဘၣ်သဂၢၢ်ဘၣ်ထံလုၥ်ဘၢတၢ်ဆူၣ်ဆူၣ်ကိၢ်ကိၢ်၀ံၤ ထံလုၥ်ဘၢတၢ် ကစှၤလီၤအဂီၢ် တၢ်ကမၤအါထီၣ်ဘၣ်ထံကွၥ်ခံတၢ်လီၢ်တဖၣ်အဂီၢ် ထံကီၢ်(၂)ဘ့ၣ်အဘၢၣ်စၢၤ တၢ်ကဃုကျဲအဂ့ၢ် ကၠီၣ်တဲၣ်ထံဂုၤကီၢ်ရၤကိတိၥ် မၢ်ရ့း တဲလီၤ၀ဲန့ၣ်လီၤ.

တၢ်ကပၥ်ပနီၣ်န့ၢ် တၢ်လီၢ်လၢကြၢးလၢတၢ်ကဆီတလဲအီၤဒ် ထံကွၥ်ခံတၢ်လီၢ်တဖၣ်အဂီၢ် ထံကီၢ်(၂)ဘ့ၣ် အ့ၣ်ကၠ့ၣ်စံၣ်တဖၣ် ကတၢၣ်ပီၣ်တဲသကိး ဘၣ်ထွဲဒီးတၢ်သ့တၢ်ဘၣ်တၢ်ဂ့ၢ်တၢ်ကျိၤလီၤတံၢ်လီၤဆဲးကန့ၢ်ကသ့အဂီၢ် ကၠီၣ်တဲၣ်မီၢ်သီဘၣ်ထွဲကီၢ်ပယီၤ ဂုၥ်ကျဲးစၢး၀ဲအဂ့ၢ်တၢ်သ့ၣ်ညါဘၣ်န့ၣ်လီၤ.

ကတီၢ်ခဲအံၤထံလုၥ်ဘၢတၢ် တၢ်အိၣ်သးအံၤ  ထံလုၥ်ဘၢကွံၥ် မဲခီၣ်ကျိထံကီၢ်တဖၣ်၀ံၤ အနံၣ်(၂၀)အတီၢ်ပူၤ ထံလုၥ်ဘၢတၢ်အအၢကတၢၢ်ကဲထီၣ်သးလၢ ကီၢ်ပယီၤကီၢ်ဆၢ၀့ၢ် တၣ်ခၠံၣ်လ့းအဂ့ၢ် အ၀ဲတဲ၀ဲန့ၣ်လီၤ.

ခီဖျိလၢ မဲခီၣ်ထံကျိကၢၢ်နံၤ ခံကပၤလၢၤအပူၤ ကၠီၣ်တဲၣ်ဒီးပယီၤထံကီၢ်(၂)ဘ့ၣ်စလၢၤ သူၣ်ထီၣ်ဘှီထီၣ်ဃၣ် တၢ်သူၣ်ထီၣ်တဖၣ်အဃိထံယွၤလီၤအကျိၤအံၣ်လီၤဒီးထံယွၤလီၤတၢ်ဂ့ၢ်ကီနးထီၣ်အဂ့ၢ်,တၢ်ကတြီဆှၢထံလုၥ်ဘၢတၢ်ကန့ၢ်အယံၤအထၢအဂီၢ်တၢ်ကပၥ်ဖှိၣ်မၤသကိးဘၣ်ထွဲဒီးတၢ်ပၢဆှၢရဲၣ်ကျဲၤထံတၢ်ဖံးတၢ်မၤတဖၣ်တၢ်ကတီၣ်ထီၣ်ဆူ မဲခီၣ်-လၣ်ခၠါ(မဲခေါင်-လန်ချန်း) တၢ်ပၥ်ဖှိၣ်မၤသကိးတၢ်အပူၤအဂ့ၢ် မံးစထၢၣ်မၢ်ရ့း တဲ၀ဲန့ၣ်လီၤ.

တကတီၢ်ဃီကတီၢ် တရူးမီၢ်သီဘၣ်ထွဲကၠီၣ်တဲၣ်ဂ့ၢ်လိၥ်ဃၣ်၀ဲလၢ တရူးတခီ တၢ်ပျၢ်လီၤထံလၢ မဲခီၣ်ထံကျိအပူၤတအိၣ်၀ဲဘၣ်အဂ့ၢ်, ထံဒိၣ်နိယွၤကဲထီၣ်သးလၢ မဲခီၣ်ထံကျိကလံၤထံးဟီၣ်က၀ီၤအပူၤအံၤ တမ့ၢ်တရူး ကၠ့ဟိၣ်(ကျင်းဟုန်ဆည်)ထံတမၢၣ်ထံတဖၣ်ဘၣ်အဂ့ၢ်န့ၣ်လီၤ.

ဖဲအပူၤကွံၥ်စှၤသီအတီၢ်ပူၤ “ထံလုၥ်ဘၢတၢ်ကဲထီၣ်သးလၢ ပယီၤ,ကၠီၣ်တဲၣ် ဒီးလၣ်အိၣ် ထံကီၢ်(၃)ဘ့ၣ်အပူၤတၢ်ဂ့ၢ်အဖီခိၣ် တၢ်ပၥ်ဒ့ၣ်ပၥ်ကမၣ်လိၥ်သးအိၣ်ထီၣ်ကဒဲကဒဲ၀ံၤ အနီၢ်ကီၢ်တခီစ့ၢ်ကီး တၢ်ပျၢ်လီၤထံလၢတရူးထံတမၢၣ်ပူၤလီၤ”အဂ့ၢ် တၢ်ဂီၤကွံးကွးတဖၣ် အိၣ်ရၤလီၤအသးလၢ ပှၤတ၀ၢပှၥ်ဘျးစဲတဖၣ်အပူၤ၀ံၤအလီၢ်ခံ တရူးမီၢ်သီ ဂ့ၢ်လိၥ်ဃၣ်၀ဲဒ်အံၤန့ၣ်လီၤ.

မ့မ့ၢ်လၢတရူးတခီ ထီဘိန့ၣ်တၢ်ပၢဆှၢ၀ဲ ထံလၢကၠ့ၣ်ဟိၣ်(ကျင်းဟုန်)ထံတမၢၣ်ပူၤတဖၣ်န့ၢ်၀ဲအဂ့ၢ် ဒီး ဘၣ်ထွဲဒီး မူခိၣ်ကလံၤသီၣ်ဂီၤတၢ်အိၣ်သးလၢဆူၣ်ဆူၣ်ကိၢ်ကိၢ်တဖၣ်အဖီခိၣ် အဲၣ်ဒိးလၢတၢ်ပၥ်ဖှိၣ်မၤသကိးတၢ်တဖၣ် ကဂ့ၤထီၣ်ဒီးမဲခီၣ်ထံကျိၤထံကီၢ်တဖၣ်အဘၢၣ်စၢၤအဂ့ၢ် တရူးမီၢ်သီပၥ်ဖျါဃၣ်၀ဲလၢ အပှၤတ၀ၢလံၥ်ကဘျံးပၤန့ၣ်လီၤ.

Ref- BankgkokPost