လါစဲးပထ့ဘၢၣ်(၁၉)သီ,၂၀၂၄နံၣ်
ကီၫ်ပယီၤပူၤ ပှၤတူၫ်ဘၣ်ထံလုၫ်ဘၢတၫ်(၅)ကလီၫ်ဃၣ်ဃၣ်အဂီၫ် WFP ကမၤစၢၤဆီၣ်ထွဲတၫ်အီၣ်တၫ်အီလၢအမ့ၫ် ဟုသး,ဘံၣ်စကံးတၫ်အီၣ်မၤပှဲၤဂံၫ်ဘါဒီးတၫ်န့ၫ်ဂံၫ်န့ၫ်ဘါ တၫ်မၤစၢၤဆီၣ်ထွဲတဖၣ်ပာ်ဃုာ် တလါဂီၫ်တၫ်အီၣ်တၫ်အီတဖၣ် ကနီၤဟ့ၣ်လီၤ၀ဲလၢအနီၫ်ကစၫ်အဂ့ၫ် ဘီမုၫ်စၢဖှိၣ်ကရၢ ဟီၣ်ခိၣ်ဒီဖျၢၣ်တၫ်အီၣ်တၫ်အီကရၢ (WFP)ဘိးဘၣ်ရၤ လီၤဃာ်၀ဲလီၤ.
ကီၫ်ပယီၤအပူၤ ဖဲအပူၤကွံာ်စှၤသီ စူၣ်ပၣ်တဲၣ်ဖိကလံၤမုၫ် ယၣ်ကံၫ် နုာ်လီၤအူတၫ်၀ံၤအလီၫ်ခံ ကမျၢၫ်လၢကွၫ်ဆၢၣ်မဲာ်ဘၣ် ထံလုၫ်ဘၢတၫ်အဂီၫ် တၫ်ခီၣ်ဆၢဆီၣ်ထွဲမၤစၢၤ ဂ့ၫ်ဂီၫ်အူ တၫ်အီၣ်တၫ်အီတၫ်ဖံးတၫ်မၤတဖၣ် WFP တကပၤလၢတနွံအံၤအပူၤ ကစးထီၣ်မၤ၀ဲအဂ့ၫ် ဖဲလါစဲးပထ့ဘၢၣ်(၁၈)သီနံၤန့ၣ် ဘိးဘၣ်ရၤလီၤ၀ဲလီၤ.
ဖဲလါစဲးပထ့ဘၢၣ်(၁၁)သီအနံၤ တဲၣ်ဖိကလံၤမုၫ်ယၣ်ကံၫ် ဟဲနုာ်လီၤလၢကီၫ်ပယီၤပူၤအဃိ ကညီကီၫ်စဲၣ်,ကရ့ၣ်နံၣ်ကီၫ် စဲၣ်,န့ၣ်ပၠံၣ်တီၣ်,ပကိကီၫ်ခီ,မကွ့ကီၫ်ခီ,မတလ့ကီၫ်ခီ,တလၢၤကီၫ်စဲၣ်ဒီး ယိၤဒိၣ်ကီၫ်စဲၣ်တဖၣ်အပူၤ ကွၫ်ဆၢၣ်မဲာ်ဘၣ် မူခိၣ်စူၤဒိၣ်,ထံလုၫ်ဘၢတၫ်ဒီး ဟီၣ်ခိၣ်လာ်တဖၣ်န့ၣ်လီၤ.
ထံလုၫ်ဘၢတၫ်အဃိ ပှၤခဲလၢာ်ဘၣ်သံလၢအကယၤဂၤ၀ံၤ လၢထံကီၫ်ဒီတဘ့ၣ် အစှၤကတၢၫ် ပှၤခဲလၢာ်(၆၃၁,၀၀၀)ဂၤ ဃၣ်ဃၣ် ကွၫ်ဆၢၣ်မဲာ်ဘၣ်ထံလုၫ်ဘၢတၫ်အဂ့ၫ် WFPဘိးဘၣ်ပာ်ဖျါဃာ်၀ဲလီၤ.
WFPအကီၫ်ပယီၤ ခၢၣ်စး Ms. Sheela Matthewတခီ “ထံလုၫ်ဘၢတၫ်အဃိ တၫ်အီၣ်တၫ်အီကအိၣ်လၢလၢလီၫ်လီၫ်အဂီၫ် ကီခဲဒိၣ်မးန့ၣ်လီၤ.ထံလုၫ်ဘၢတၫ်တချူးကဲထီၣ် လၢလါအီကူးအပူၤလံၤလံၤ ကီၫ်ပယီၤပူၤ ပှၤ(၁၃)ကကွဲၫ်ဘျဲၣ်န့ၣ် ကွၫ်ဆၢၣ်မဲာ်ဘၣ်တၫ်အီတၫ်အီတလၢတပှဲၤဘၣ်န့ၣ်လီၤ.တၫ်လိၣ်ဘၣ်အါထီၣ်ဒ်သိးအံၤအဖီခိၣ် တၫ်မၤလၢပှဲၤကန့ၫ် အဂီၫ် ပပှၤမၤတၫ်ဖိတဖၣ် မၤတၫ်တပယူာ်ဃီအဂ့ၫ် တဲ၀ဲလီၤ.”
တကတီၫ်ဃီ WFP ပှၤမၤတၫ်ဖိတဖၣ်တကပၤတၫ်သူၣ်အီၣ်ဖျးအီၣ်အဂီၫ်,တၫ်လုၫ်အီၣ်နီၣ်ခိသးသမူကၠိဒီး တၫ်ကဒိးန့ၫ်ဘၣ်တၫ်အီၣ်တၫ်အီအဂီၫ်အဖီခိၣ် ထံအတၫ်မၤဘၣ်ဒိ တၫ်အိၣ်သးတဖၣ် ဃုသ့ၣ်ညါဃုာ်၀ဲဒီးအသိၣ်မှံၤ တၫ်ကရၢကရိတဖၣ်အဂ့ၫ် တၫ်ဘိးဘၣ်ရၤလီၤအပူၤပာ်ဖျါ၀ဲလီၤ.
တချူးယၣ်ကံၫ်ကလံၤမုၫ်ဟဲနုာ်လီၤ WFPန့ၣ် လၢလါအီကူးအပူၤ ကမျၢၫ်(၁၈၅,၀၀၀)ဂၤဃၣ်ဃၣ်လၢ အစံၣ်ပျီထံလုၫ်ဘၢကွံာ်လၢအကလးတဖၣ် ဟ့ၣ်မၤစၢၤဆီၣ်ထွဲတ့ၫ်၀ဲ တၫ်အီၣ်တၫ်အီတဖၣ်အဂ့ၫ် ဘိးဘၣ်ပာ်ဖျါဃာ်၀ဲလီၤ.
Ref: DVB
