လါစဲးပထ့ဘၢၣ်(၁၉)သီ,၂၀၂၄နံၣ်
လါစဲးပထ့ဘၢၣ်(၁၁)သီအနံၤ, ခ့ၣ်အဲၣ်ယူၣ်-လီၢ်ခၢၣ်သး၀ဲၤလီၢ်ခိၣ်သ့ၣ်တၢ်ကစီၣ် ပၥ်ဖျါဃၣ်၀ဲလၢ သုးဟံးန့ၢ်ဆူၣ်ထံကီၣ်တၢ်စိတၢ်ကမီၤသုးကီၣ်ကး လဲၤနုၥ်လီၤသုးကျိၤဖဲသကၠဲး(သကျက်)သ၀ီကရူၢ်ပူၤ၀ံၤ လဲၤတ့ၢ်လီၤဒြိမ့ၣ်ပိၢ်ဖဲ ကွှဲထ့ကိ(ကျွဲထိန်းကုန်း)သ၀ီပူၤအဃိ လီၢ်က၀ီၤကမျၢၢ်ဘၣ်ဒိ၀ဲ(၄)ဂၤဒီး ဘၣ်ဟးဂီၤကွံၥ်၀ဲ လီၢ်ကမျၢၢ်ဟံၣ်ဃီ(၁)ဖျၢၣ်အဂ့ၢ်န့ၣ်လီၤ.
လါစဲးပထ့ဘၢၣ်(၁၂)သီအနံၤ, သုးကီၣ်ကးအသုး လဲၤတ့ၢ်လီၤကဒီးဒြိမ့ၣ်ပိၢ်(၂)ဖျၢၣ် ဖဲကွ့သ့းသ၀ီပူၤအဃိ အူသံၣ်ဟးဟံၣ်(၁)ဖျၢၣ်ဘၣ်ဟးဂီၤကွံၥ်၀ဲ၀ံၤ ကတီၢ်ခဲအံၤ သုးကီၣ်ကးအသုးတဖၣ် လဲၤနုၥ်လီၤဟူးဂဲၤသုးဂ့ၢ်၀ီဒီးမၤပှဲၤအါထီၣ်သုးအဂံၢ်အဘါတဖၣ်ဖဲ ကွှဲထ့ကိ(ကျွဲထိန်းကုန်း), ဆ့ၣ်ခီ(ဆင်ခေါင်း), (၅)မံၤလၤ, (၆)မံၤလၤ, ဘၣ်လီ, ဘၣ်သ့ၣ်ဒီး သကၠဲးသ၀ီကရူၢ်တဖၣ်အပူၤန့ၣ်လီၤ.
သုးကီၣ်ကးအသုးတဖၣ် ပညိၣ်၀ဲလီၢ်ကလီၤကမျၢၢ်တဖၣ်၀ံၤလဲၤခးလီၤတၢ်လၢကလံၤကျါဒီးခးလီၤကျိဖးဒိၣ်တဖၣ်ဆူ လီၢ်က၀ီၤကမျၢၢ်အိၣ်ဆိးလီၢ်ကျဲသ၀ီတဖၣ်ပူၤဒီးတၢ်ဖံးအီၣ်မၤအီၣ်လီၢ်ကျဲတဖၣ်အပူၤအဃိကမျၢၢ်တဖၣ်ဘၣ်ဃ့ၢ်အိၣ်ပူၤဖျဲး၀ံၤ လိၣ်ဘၣ်၀ဲတၢ်အီၣ်တၢ်အီတဖၣ်, ကသံၣ်ကသီတဖၣ် ဒီး တၢ်ပီးတၢ်လီလၢကအိၣ်ဆိးအဂီၢ်အဂ့ၢ် ပၥ်ဖျါဃၣ်၀ဲန့ၣ်လီၤ.
သုးကီၣ်ကးအသုး ကးတံၥ်ဃၣ်ကမျၢၢ်လ့ၤလိၤဟးထီၣ်တၢ်ပျဲလၢ ဘီဒံးကၣ်တိၤ(ဘောဒိကာ တံတား)လၢအိၣ်ဖဲ တနီသရံး-သကၠဲးကျဲမုၢ်အဖီခိၣ်အဃိ လီၢ်က၀ီၤကမျၢၢ်တဖၣ် ဘၣ်ကွၢ်ဆၢၣ်မဲၥ်ဘၣ်တၢ်ဂ့ၢ်ကီလၢ ကပှ့ၤတၢ်အီၣ်တၢ်အီအဂ့ၢ် ပၥ်ဖျါဃၣ်၀ဲန့ၣ်လီၤ.
