လါစပထ့ဘၢၣ်(၁၈)သီ,၂၀၂၄နံၣ်
ခီဖျိလၢ မူခိၣ်စူၤဒိၣ်၀ံၤထံဒိၣ်နိယွၤကဲထီၣ်လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်, လၢၢ်ဒိၣ်ကီၢ်ဆၣ်, ပရဲလိၥ်ကျိမုၢ်ထီၣ်ဒီးမုၢ်နုၥ်ဟီၣ်က၀ီၤပူၤအဃိ ထံလုၥ်ဘၢကွံၥ်၀ဲ သ၀ီခဲလၢၥ်(၁၀၄)ဖျၢၣ်အပူၤ ဟံၣ်ခိၣ်ဘူးထီၣ်(၁၄၀၀၀)ဃၣ်ဃၣ်အဂ့ၢ် လၢၢ်ဒိၣ်ကီၢ်ဆၣ်ပှၤကတိၤတၢ်ပၢ ပဒိၣ်စီၤ၀ါမုၢ် စံးဘၣ်အၣ်ထူၣ်ခ့ၣ်န့ၣ်လီၤ.
“မ့ၢ် ဒိၣ်စးထီၣ်ဖဲမဟါအနံၤနီၢ်. ကတီၢ်ခဲအံၤဒုဒိၣ်အဖၢလီၤ. တလီၤဒံးဘၣ်. ဒီးကထီၣ်ဒံးစံးအါလဲၣ်ဒု တဲလီၤတံၤတသ့ဒံးဘၣ်အဂ့ၢ်” စံး၀ဲန့ၣ်လီၤ.
ထံဒိၣ်နိယွၤကဲထီၣ်သး အခဲအံၤတ၀ီန့ၣ် ဒိၣ်န့ၢ်ဒံးအပူၤကွံၥ်တ၀ီအဃိ ထံလုၥ်ဘၢကွံၥ် ကျဲမုၢ်ကျဲဘိ, ဟံၣ်ဃီဒီးတၢ်သူၣ်ထီၣ်တဖၣ်အမျးကယၤန့ၣ် အါဒိၣ်န့ၢ်ဒံးအပူၤကွံၥ်အဂ့ၢ် စံးကဒီး၀ဲန့ၣ်လီၤ.
တကးဘၣ် ခီဖျိလၢထံဒိၣ်နိယွၤကဲထီၣ်သးအဃိ ဘၣ်တၢ်ကးတံၥ်ဃၣ်၀ဲ တၢ်သိၣ်လိကၠိတဖၣ်လၢ ဒူသ၀ီလၢထံလုၥ်ဘၢကွၥ်တၢ်အပူၤခဲလၢၥ်အဂ့ၢ်န့ၣ်လီၤ.
ကမျၢၢ်လၢအိၣ်ဆိးဖဲ ထံလုၥ်ဘၢကွံၥ်သ၀ီတဖၣ်အပူၤတခီ ဘၣ်လဲၤအိၣ်၀ဲဆူ အဘူၣ်အတံၢ်တဖၣ်အအိၣ်ဒီး တနီၤတခီအိၣ်ခိးကွၢ်၀ဲတၢ်အိၣ်သးဒီး အိၣ်ဆိး၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“မ့မ့ၢ် တၢ်ဟးဂုၤဟးဂီၤဒု အဒိၣ်ဒၢးအဆံးဒုအိၣ်လီၤနဲၣ်. ဘၣ်မနုအဃိပတဲလဲၣ်န့ၣ် တနီၤန့ၣ်ထံဒိၣ်လီၤလၢညါတ၀ီန့ၣ် အဘုဟးဂီၤ က့ၤသူၣ်ကဒါက့ၤအိၣ်လီၤ. ထံက့ၤဒိၣ်ထီၣ်အသီတ၀ီအဃိ ဘုလၢတၢ်သူၣ်ကဒါက့ၤနၥ်က့ တၢ်သူကဒါက့ၤအီၤတန့ၢ်လၢၤဘၣ်မီၤ. ဟံၣ်ဃီတၢ်လီၤဘျၢအဖီန့ၣ် အ၀ဲပှၤလၢအဟံၣ်ခီၣ်ဖုၣ်သ့ၣ်တဖၣ်ဟီဒု ဘၣ်ပၥ်တ့ၢ်ဟံၣ်ဒီဖျၢၣ် ဒီး ဃ့ၢ်ကပၤကွံၥ်အသးလၢအနီၢ်ကစၢ်အိၣ်တနီၤ”အဂ့ၢ် လၢၢ်ဒိၣ်ကီၢ်ဆၣ်ပှၤကတိၤတၢ်ပၢ ပဒိၣ်စီၤ၀ါမုၢ် စံး၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၣ်ထူၣ်, လၢၢ်ဒိၣ်ကီၢ်ဆၣ်, ပရဲလိၥ်ကျိမုၢ်ထီၣ်ဒီးမုၢ်နုၥ်ဟီၣ်က၀ီၤပူၤ သ၀ီခဲလၢၥ်အိၣ်၀ဲ(၁၁၄)ဖျၢၣ်, ဟံၣ်ခိၣ်(၁၃၇၄၄)ဖျၢၣ်အပူၤ ကမျၢၢ်(၇၀၀၆၈)ဂၤ ဘၣ်ကွၢ်ဆၢၣ်မဲၥ်ဘၣ် ထံတၢ်လီၤဘၣ်ယိၣ်န့ၣ်လီၤ.
