ကီၢ်ဘ့ကလါဒ့း မၤအါထီၣ်တၢ်ဘံၣ်တၢ်ဘၢ ဖဲပယီၤကီၢ်ဆၢ ခီဖျိလၢပှၤလီၢ်အိၣ်ကမှံတဖၣ် ဟဲနုၥ်လီၤအါထီၣ်

လါစဲးပထ့ဘၢၣ်(၁၂)သီ,၂၀၂၄နံၣ်

စှၤလါအတီၢ်ပူၤ ပှၤရိၣ်ဟ့ၣ်ကၠၣ်ဖိတစှၤန့ၣ်(၁၈၀၀၀)ဂၤ ခီကီၢ်ဆၢလဲၤနုၥ်လီၤဆူ ကီၢ်ဘ့ကလါဒ့း၀ံၤအလီၢ်ခံ တၢ်မၤအါထီၣ်ဃၣ်တၢ်ဘံၣ်တၢ်ဘၢအါန့ၣ်ဒံးအပူၤကွံၥ်အဂ့ၢ် ပှၤဘၣ်မူဘၣ်ဒါတဖၣ် တဲ၀ဲန့ၣ်လီၤ.

ရၢၢ်ခၢၣ်ကီၢ်စဲၣ်အပူၤ တၢ်ဒုးဆူၣ်ထီၣ်လၢ ရၢၢ်ခၢၣ်သုးမုၢ်ဒိၣ်ဒီးသုးကီၣ်ကးအဘၢၣ်စၢၤ၀ံၤ သုးဂ့ၢ်၀ီဖ့ၣ်ဆၢလိၥ်သးဒိၣ်ထီၣ်အဆၢကတီၢ် ပှၤလီၢ်အိၣ်ကမှံဖိအကထိတဖၣ် ဂုၥ်ကျဲးစၢးနုၥ်လီၤဆူ ကီၢ်ဘ့ကလါဒ့းပူၤအဂ့ၢ် စံး၀ဲန့ၣ်လီၤ.

“ပှၤလီၢ်အိၣ်ကမှံဖိအကထိတဖၣ် ဟဲခီနုၥ်လီၤဆူလၢအံၤတပၤလီၤ. ပှၤအါအါဂီၢ်ဂီၢ် ခိး၀ဲလၢကဟဲနုၥ်လီၤအဂီၢ်လီၤ.”အဂ့ၢ် ကီၢ်ဘ့ကလါဒ့းထံဂုၤကီၢ်ဂၤကိတိၥ်၀ဲၤကျိၤ ပှၤဘၣ်မူဘၣ်ဒါ တဲလီၤ၀ဲဆူ တၢ်ကစီၣ်သန့တဖၣ်အအိၣ်န့ၣ်လီၤ.

ကီၢ်ဘ့ကလါဒ့းတဲ၀ဲလၢ ခီဖျိလၢ တၢ်ဆီၣ်ထွဲမၤစၢၤစှၤအဃိ တၢ်တတူၢ်လိၥ်ကဒီးလၢၤ ပှၤလီၢ်အိၣ်ကမှံဖိတဖၣ်ဘၣ်ဆၣ် တလါအံၤအတီၢ်ပူၤ ပှၤလီၢ်အိၣ်ကမှံဖိအနီၣ်ဂံၢ်နီၣ်ဒွးလၢ ဟဲနုၥ်လီၤအံၤ အိၣ်အါန့ၢ်(၂)ဆးဒံး ပဒိၣ်တယၥ်ဃၣ်၀ဲန့ၣ်လီၤ.

“တၢ်မၤအါထီၣ်ဃၣ် တၢ်ဘံၣ်တၢ်ဘၢလၢကီၢ်ဆၢဘၣ်ဆၣ် တၢ်ပၢဆှၢရဲၣ်ကျဲၤ ကီၢ်ဆၢလၢအစဲဘူးလိၥ်သးဒီးကီၢ်ပယီၤ ၁၆၈မံၤလၤအံၤ လီၤဆီဒၣ်တၢ် ကီၢ်ပယီၤတပၤ မ့ၢ်တပၥ်ဖှိၣ်မၤသကိးတၢ်ဘၣ်န့ၣ် တၢ်ကီတၢ်ခဲအိၣ်အါမးအဂ့ၢ်” ပှၤဘၣ်မူဘၣ်ဒါ စံး၀ဲန့ၣ်လီၤ.

ပဒိၣ်တခီတဆၢတဲၥ်လီၤ၀ဲ တၢ်ကသြီနုၥ် ပှၤလၢဟဲတုၤလၢ စှၤလါအတီၢ်ပူၤဒီး ဟဲတုၤအိၣ်တဖၣ်စရီအဂီၢ်ဒံးဘၣ်အဂ့ၢ် ထံဂုၤကီၢ်ဂၤကိတိၥ်၀ဲၤကျိၤ ပှၤဘၣ်မူဘၣ်ဒါ တဲ၀ဲန့ၣ်လီၤ.

“တၢ်မ့ၢ်တူၢ်လိၥ်ပှၤလီၢ်အိၣ်ကမှံတဖၣ်န့ၣ်တၢ်ကဟဲနုၥ်လီၤကဒီးအါအါဂီၢ်ဂီၢ်သ့၀ံၤတၢ်ပၢဆှၢရဲၣ်ကျဲၤတၢ်ဂ့ၢ်အံၤတသ့ဘၣ်. ဘၣ်ဆၣ် တၢ်သံကွၢ်န့ၣ် နတကနၣ်ဃုၥ် တၢ်ဆၢကတီၢ်ယံၤယံၤကသ့ထဲလဲၣ်”အဂ့ၢ် အ၀ဲတဲ၀ဲန့ၣ်လီၤ.

Ref: Reuters