လါစဲးပထ့ဘၢၣ်(၁၂)သီ,၂၀၂၄နံၣ်
စးထီၣ်လၢလါစဲးပထ့ဘၢၣ်(၉)သီအနံၤ မူခိၣ်စူၤဒိၣ်တပယူၥ်ဃီလၢ(၃)သီအတီၢ်ပူၤ၀ံၤ သူမွဲကျိထံဟဲဒိၣ်ထီၣ်အဃိ ပှၤလီၢ်အိၣ်ကမှံၤဒဲက၀ီၤတစှၤန့ၣ်(၅)ဖျၢၣ်လၢအိၣ်ဖဲထံကျိကၢၢ်နံၤတဖၣ်အပူၤဟံၣ်(၃)ကယၤဃၣ်ဃၣ်ဟးဂီၤကွံၥ်၀ံၤ ပှၤနီၣ်ဂံၢ်(၆)ကထိဘျဲၣ် ဘၣ်ကွၢ်ဆၢၣ်မဲၥ်ဘၣ်ထံတၢ်လီၤဘၣ်ယိၣ်န့ၣ်လီၤ.
သူမွဲကျိကၢၢ်နံၤ, ပှၤလီၢ်အိၣ်ကမှံၤဒဲက၀ီၤလၢ ဘၣ်ကွၢ်ဆၢၣ်မဲၥ်ဘၣ်ထံတၢ်လီၤဘၣ်ယိၣ်တဖၣ်မ့ၢ်၀ဲ ကနဲလ့ထး,သ့ၣ်ဘီဘိ, ဘျၢၣ်ဒိၣ်, ၀ီလ့ၢ် ဒီးပလီၢ်တဘိ(ပလော်တပို့)တဖၣ်န့ၣ်လီၤ.
ပလီၢ်တဘိဒဲက၀ီၤပူၤ ဒဲဖိအဖျၢၣ်(၃၀)ဃၣ်ဃၣ် လီၤထွံကွံၥ်လၢထံကျါအဂ့ၢ် အူမ့မ့လၢ အမၤစၢၤ ပှၤဃ့ၢ်သုးပှၤလီၢ်အိၣ်ကမှံၤဖိတဖၣ် တဲ၀ဲန့ၣ်လီၤ.
“ထံဟဲဖီးလီၤဆူၣ်မးလီၤ. ထံမ့ၢ်ဖီးလီၤဆူၣ်ဆူၣ်န့ၣ် ထံကျိကၢၢ်နံၤလီၤပှီၢ်ကွံၥ်လီၤ. ထံကျိကၢၢ်နံၤလီၤပှီၢ်ကွံၥ်အဃိ ဟံၣ်ဖိတဖၣ်စ့ၢ်ကီး ထိၣ်ထွံကွံၥ်လီၤ. သ့ၣ်ထူၣ်တဖၣ်စ့ၢ်ကီး ပၥ်ဃုၥ်၀ဲလီၤ. မ့မ့ၢ်ပှၤကညီတခီ တၢ်ဘၣ်ဒိဘၣ်ထံးတအိၣ်ဘၣ်” န့ၣ်လီၤ.
တကးဘၣ် ခီဖျိလၢသူမွဲကျိထံဒိၣ်ထီၣ်အဃိ ကနဲလ့ဒဲက၀ီၤပူၤ ဒဲဖိတဖၣ်စ့ၢ်ကီး ထံလီၤဘၢကွံၥ်၀ဲအဂ့ၢ် ဒီၣ်ယံၣ်ယံၣ်၀့လၢ အမၤစၢၤပှၤလီၢ်အိၣ်ကမှံဖိတဖၣ် တဲ၀ဲန့ၣ်လီၤ.
“တၢ်လီၢ်အါအါဂီၢ်ဂီၢ်ထံလူၤဘၢကွံၥ်လီၤ. ထံထီၣ်ချ့အဃိ ဘၣ်အိးခိးကွၢ်လီၤ. ဘၣ်ဆၣ်ထံထီၣ်ချ့အဃိ ကသံၣ်ဒၢးလၢ ပှၤအိၣ်လၢကီၢ်ဆၢတဖၣ် ဘၣ်ဒိးသန့ၤထီၣ်သး၀ဲအံၤ ထံလူၤဘၢကွံၥ်၀ဲလီၤ. ဒဲတနီၤလၢအိၣ်ဖဲ ကီၢ်ဆၢတဖၣ်စ့ၢ်ကီး လီၤထွံကွံၥ်လၢထံကျါလီၤ. ကနဲလ့ဒဲက၀ီၤပူၤစ့ၢ်ကီး ထံနုၥ်လီၤ၀ဲ”န့ၣ်လီၤ.
သူမွဲကျိ ထံထီၣ်တုၤလၢ တၢ်ဘၣ်ယိၣ်တၢ်ပနီၣ်(၈)ပျၢ်အသိး ကထီၣ်အါထီၣ်သ့(၃)ပျၢ်ဒံးအဂ့ၢ် သုးကီၣ်ကးမူခိၣ်ကလံၤသီၣ်ဂီၤ၀ဲၤကျိၤ ဟ့ၣ်ပလီၢ်ထုးထီၣ်ပၥ်ဖျါဃၣ်၀ဲဖဲ လါစဲးပထ့ဘၢၣ် (၁၁)သီအနံၤန့ၣ်လီၤ.
ဟံၣ်ဒူၣ်(၉)ကထိဃၣ်ဃၣ်လၢ ဘၣ်ကွၢ်ဆၢၣ်မဲၥ် ထံတၢ်လီၤဘၣ်ယိၣ်တဖၣ် ကၠီၣ်တဲၣ်ပဒိၣ် ဟ့ၣ်၀ဲဂ့ၢ်ဂီၤအူတၢ်မၤစၢၤတဖၣ်န့ၣ်လီၤ. စးထီၣ်လၢလါစပထ့ဘၢၣ်(၁၃)သီအနံၤတုၤ(၁၈)သီအနံၤ မူခိၣ်စူၤဒိၣ်၀ံၤ ထံဒိၣ်ထီၣ်သ့အဃိကၠီၣ်တဲၣ်ပဒိၣ်ဟ့ၣ်ပလီၢ်ဃၣ်၀ဲလၢတၢ်ကပလီၢ်သူၣ်ပလီၢ်သးလၢတၢ်လီၤဘၣ်ယိၣ်လၢကပိၥ်ထွဲထီၣ်သးအခံတဖၣ်န့ၣ်လီၤ.
ကီၢ်ပယီၤဒီတဘ့ၣ်ပူၤစ့ၢ်ကီး မူခိၣ်စူၤဒိၣ်၀ံၤ န့ၣ်ပၠံၣ်တီၣ်ဒီးရၤမတံပၥ်ဃုၥ် တၢ်လီၢ်အါတီၢ်ပူၤ လီၢ်က၀ီၤကမျၢၢ်လၢအကလးတဖၣ် ဘၣ်ကွၢ်ဆၢၣ်မဲၥ်ဘၣ်ထံတၢ်လီၤဘၣ်ယိၣ်၀ံၤ လိၣ်ဘၣ်ဂ့ၢ်ဂီၢ်အူတၢ်မၤစၢၤတဖၣ်န့ၣ်လီၤ.
Ref: RFA
