လါစဲးပထ့ဘၢၣ်(၁၂)သီ,၂၀၂၄နံၣ်
သုးကီၣ်ကးန့ၣ်ရဲၣ်ကျဲၤ၀ဲလၢ ကစးထီၣ်ထၢဖးဖီမုၫ်စရီလၢ ၂၀၂၄နံၣ်လါအီးကထိဘၢၣ်(၁)သီနံၤအဃိ တၫ်အံၤအဖီခိၣ် ပှၤအိၣ်လၢ၀့ၫ်ပူၤတဖၣ် ဘၣ်ယိၣ်ဘၣ်ဘှီတၫ်အဂ့ၫ် ပှၤ၀့ၫ်ဖိတဖၣ်တဲ၀ဲလီၤ.
သုးကီၣ်ကးအိၣ်ကတီၤသးလၢ ကစးထီၣ်ထၢပှၤနီၫ်ဂံၫ်ဒီးဟံၣ်ဃီတၫ်ဂ့ၫ်တၫ်ကျိၤ ဖးဖီမုၫ်စရီလၢ လါအီကထိဘၢၣ်(၁)သီနံၤ ဖဲတနီသရံၣ်ကီၫ်ခီ,ဒ၀ဲၫ်,ဘျံး,ကီးသီ ပာ်ဃုာ် လၢထံကီၫ်ဒီတဘ့ၣ် ၀့ၫ်လၢသုးကီၣ်ကးပၢဆှၢဃၥ် က၀ီၤဒ့တဖၣ်အပူၤန့ၣ်လီၤ.
သုးကီၣ်ကးဘိးဘၣ်ပာ်ဖျါ၀ဲလၢ တၫ်ကထၢပှၤနီၫ်ဂံၫ်စရီလၢ ၀့ၫ်ဘျံးက၀ီၤဒ့နီၫ်ဂံၫ်(၁၄),သ၀ီကရူၫ်(၂၂)ကရူၫ်,သ၀ီ(၁၄၀)ဖျၢၣ်တဖၣ်အပူၤအဂ့ၫ်လီၤ.
“တၫ်ထၢစရီမ့ၫ်၀ံၤန့ၣ် ဟံၣ်၀ဲအံၤ ပှၤလၢကဘၣ်ကဲသုးအိၣ်ပှဲၤဂၤလဲၣ်န့ၣ် သုးကီၣ်ကးသ့ၣ်ညါ၀ဲလီၤ.ဘၣ်ယိၣ်ဒၣ် တၫ်၀ဲအံၤလီၤအဂ့ၫ်”ပှၤဒ၀ဲၫ်ဖိတဂၤတဲ၀ဲလီၤ.
သုးကီၣ်ကးန့ၣ် ဘိးဘၣ်ရၤလီၤဃာ်၀ဲလၢ သးနံၣ်(၁၈)နံၣ်တုၤ(၃၅)နံၣ်ကဘၣ်ကဲသုးအဂီၫ်,သးနံၣ်(၃၅)နံၣ်တုၤ(၆၅)နံၣ် ကဘၣ်နုာ်လီၤဟံးန့ၫ်မူဒါလၢ ကမျၢၫ်တၫ်ဘံၣ်တၫ်ဘၢကရၢပူၤအဂီၫ်န့ၣ်လီၤ.
လၢခိခိၣ်ဒူသ၀ီ တၫ်ဒုးအဃိ ပှၤလၢလဲၤဃ့ၫ်အိၣ်ကဒုဖဲ၀့ၫ်ဒ၀ဲၫ်ဒီးဘျံးတဖၣ်စ့ၫ်ကီး တၫ်ကထၢဖးဖီမုၫ်စရီအဃိ ထံၣ်ဘၣ်တၫ်ဂ့ၫ်ကီလီၤ.
“ကတီၫ်အံၤကက့ၤဆူဟံၣ်အဂီၫ် တအိၣ်ဒံးဘၣ်.ဘၣ်ခိးကွၫ်တၫ်အိၣ်သးဒံးလီၤ.မ့ၫ်ကဲထီၣ်တၫ်ဂ့ၫ်ကီဒု ဆိမိၣ်ဃာ် လၢကပျၫ်က့ၤဖိသၣ်တဖၣ်လၢသ၀ီအဂ့ၫ်”ပိာ်ခွါသးနံၣ်အိၣ်(၆၀)နံၣ်တဂၤလၢ ဟဲဃ့ၫ်အိၣ်ကဒု ဖဲ၀့ၫ်ဒ၀ဲၫ်ဖီခိၣ် တဂၤ တဲ၀ဲလီၤ.
သုးကီၣ်ကးတခီ တဲဃာ်၀ဲလၢ စးထီၣ်ဖဲလါအီးကထိဘၢၣ်(၁)သီနံၤတုၤ(၁၅)သီအနံၤန့ၣ် ကထၢဖးဖီမုၫ်စရီ ဒ်သိးထီၣ်တဟံၣ်လီၤတဟံၣ်အက့ၫ်အဂီၤ အသိးမ့ၫ်ဂ့ၤ,လၢပာ်ပနီၣ်န့ၫ်ဃာ်၀ဲအက့ၢ်အဂီၤအသိးမ့ၫ်ဂ့ၤန့ၣ်လီၤ.
အနံၣ်(၁၀)တဘျီညီနုၫ် တၫ်ထၢ၀ဲဖးဖီမုၫ်စရီန့ၣ်လီၤ.လၢ၂၀၁၄နံၣ်န့ၣ် တၫ်ထၢ၀ဲထံကီၫ်ဒီတဘ့ၣ်ဖးဖီမုၫ်စရီအသိး, လၢတနံၤအံၤ၂၀၂၄နံၣ်လၢ ကပှဲၤထီၣ်အနံၣ်(၁၀)တီတီအံၤ သုးကီၣ်ကးရဲၣ်ကျဲၤ၀ဲလၢ ကထၢဖးဖီမုၢ်စရီန့ၣ်လီၤ.
၂၀၁၄နံၣ် ဖးဖီမုၫ်စရီအဖီခိၣ် လၢတနီသရံၣ်ကီၫ်ခီပူၤ ပှၤနီၫ်ဂံၫ်အိၣ်(၁၄)ကကွဲၫ်ဘျဲၣ်န့ၣ်လီၤ.လၢ(၁၄)ကကွဲၫ်အကျါ (၇၆)မၠးကယၤ မ့ၫ်ပှၤအိၣ်လၢခိခိၣ်ဒူသ၀ီတဖၣ်အပူၤ၀ံၤ အိၣ်တ့ၫ်(၂၄)မျးကယၤန့ၣ်အိၣ်လၢ၀့ၫ်ပူၤန့ၣ်လီၤ.
Ref: Dawei Watch
