လါစဲးပထ့ဘၢၣ်(၁၁)သီ,၂၀၂၄နံၣ်
ဖဲအပူၤကွံာ် လါစဲးပထ့ဘၢၣ်(၇)သီနံၤ လၢကီၫ်ဘံၣ်ယဲးနၣ်အပူၤ စူၣ်ပၣ်တဲၣ်ဖိကလံၤမုၫ်ယၣ်ကံၫ်အူတၫ်အဃိ ပှၤဘၣ်သံ(၁၂၇)ဂၤ၀ံၤ ပှၤလီၤမၫ်၀ဲ(၅၄)ဂၤအဂ့ၫ် ပှၤဘၣ်မူဘၣ်ဒါတဖၣ်တဲ၀ဲလီၤ.
ထံကီၫ်ကလံၤစိးတကပၤ, ကီၫ်စဲၣ်တနီၤအပူၤ ထံဒိၣ်လုၫ်ဘၢတၫ်အဃိ ပှၤလၢအကထိတဖၣ် ဘၣ်ထီၣ်အိၣ်လၢ ဟံၣ်အခိၣ်ဒုးဖီခိၣ်၀ံၤ တနီၤဒုဃ့တၫ်မၤစၢၤလၢ ပှၤတ၀ၢပှာ်ဘျးစဲအဖီခိၣ်န့ၣ်လီၤ.
စူၣ်ပၣ်တဲၣ်ဖိကလံၤမုၫ်ယၣ်ကံၫ်အံၤ လၢကီၫ်ဘံၣ်ယဲးနၣ် အနံၣ်(၃၀)အတီၫ်ပူၤ မ့ၫ်ကလံၤမုၫ်လၢအဂံၫ်ဆူၣ်ကတၢၫ်၀ံၤ ဖဲအူတၫ်လၢထံကီၫ်ကလံၤစိးတကပၤအကတီၫ် လီၫ်က၀ီၤဖိ (၁.၅)ကကွဲၫ် ကွၫ်ဆၢၣ်မဲာ်ဘၣ် လီမ့ၣ်အူတၫ်ဂ့ၫ်ကီန့ၣ်လီၤ.
ဖဲအပူၤကွံာ် လါစဲးပထ့ဘၢၣ်(၉)သီနံၤစ့ၫ်ကီး လၢဖူၣ်သိၣ်ကီၫ်ဆၣ်,ဖၣ်ခၠီတိၤကၫ်ကွံာ်အဃိ သိလ့ၣ်ဒီးပှၤ(၁၃)ဂၤ လီၤတဲာ်ပိာ်ထွဲထံခံဒီးလီၤမၫ်ကွံာ်အဂ့ၫ် ပှၤဘၣ်မူဘၣ်ဒါတဖၣ်တဲ၀ဲလီၤ.ကလံၤမုၫ်န့ၣ် အဂံၫ်စၫ်လီၤဘၣ်ဆၣ် သုးကဒီးကသးဆူ မုၫ်နုာ်တကပၤအဃိ ထံဒိၣ်နိယွၤဒီးဟီၣ်ခိၣ်လာ်တဖၣ် တၫ်ကဘၣ်ပလီၫ်သးအဂ့ၫ် ပှၤဘၣ်မူဘၣ်ဒါတဖၣ်တဲ၀ဲလီၤ.
လၢကတီၫ်အံၤ ပှၤသံဒီးပှၤလၢလီၤမၫ်တကးဘၣ်, ပှၤခဲလၢာ်(၇၀၀)ဂၤဘျဲၣ်ဘၣ်ဒိဘၣ်ထံး၀ံၤ ပှၤဘၣ်မူဘၣ်ဒါတဖၣ် ထုးထီၣ်ဃာ်လံာ်တၫ်ဟ့ၣ်ပလီၫ် လၢကလံၤစိးကီၫ်စဲၣ်(၁၈)ဘ့ၣ်,ကီၫ်ရ့ၣ်(၄၀၁)ခါအပူၤ ဘၣ်ထွဲတၫ်ကပလီၫ်သးလၢ ထံဒိၣ်နိယွၤဒီးဟီၣ် ခိၣ်လာ်တဖၣ်န့ၣ်လီၤ.
ကလံၤမုၫ်ယၣ်ကံၫ်(မုန်တိုင်း ရာဂီ)အံၤ ဖဲတချူးအူ၀ဲ ကီၫ်ဘံၣ်ယဲးနၣ်အကတီၫ် နုာ်လီၤအူ၀ဲ တရူးကလံၤထံးဒီးကီၫ် ဖံးလံးဖံးတဖၣ်၀ံၤ ပှၤဘၣ်သံ(၂၄)ဂၤဒီး တၫ်ဟးဂုၤဟးဂီၤအိၣ်အါးမးန့ၣ်လီၤ.
Ref: VOM
