လါစဲးပထ့ဘၢၣ်(၁၁)သီ,၂၀၂၄နံၣ်
ယိၤဒိၣ်ကီၫ်စဲၣ်မုၫ်ထီၣ်,ကၠီၣ်တဲၣ်-ပယီၤကီၫ်ဆၢ လၢ၀့ၫ်တၣ်ခၠံၣ်လ့းပူၤ မဲၣ်ဆဲၣ်ထံကျိန့ၣ် ဖဲလါစဲးပထ့ဘၢၣ်(၁၀)သီနံၤ စးထီၣ်ဖဲဂီၤအကတီၫ် ထီၣ်တလၢထံတၫ်ဘၣ်ယိၣ်တၫ်ပာ်ပနီၣ်လီၫ်(၅)ပျၢ်ဘျဲၣ်အဃိ ထံဒိၣ်ဘၢတၫ် ဘၣ်ကဲထီၣ်၀ဲ အဂ့ၫ် တၫ်သ့ၣ်ညါဘၣ်လၢ လီၫ်က၀ီၤဖိတဖၣ်အိၣ်န့ၣ်လီၤ.
“ဟံၣ်ဃီလီၤဘျၢလီၤ.ပှၤကညီဒု အိၣ်တ့ၫ်ဒၣ်ထဲအခိၣ်သၣ်ဃံဖျါထီၣ်လီၤ.ပိထိၣ်(ပုန်းထွန်)တကပၤ ပှၤမၤစၢၤတၫ် တဖၣ်စ့ၫ်ကီး ဆဲးကျိးအီၤလီတဲစိတန့ၫ်ဘၣ်အဂ့ၫ်” လီၫ်က၀ီၤဖိတဂၤတဲ၀ဲလီၤ.
၀့ၫ်တၣ်ခၠံၣ်လ့း, အ၀ဲပး(အဝိုင်းပတ်)ဒီးပိထိၣ်က၀ီၤဒ့ပူၤ ဟံၣ်တနီၤ လီၤဘျၢကွံာ်၀ဲ၀ံၤ ၀့ၫ်တၣ်ခၠံၣ်လ့းတကပၤ ပယီၤ-ကၠီၣ်တဲၣ်တၫ်ရ့လိာ်မုာ်လိာ်တိၤ နီၫ်ဂံၫ်(၁)အဖီခိၣ်ဒၣ်လဲၣ် ထံတဖၣ်ဟဲထီၣ်၀ဲအဂ့ၫ် တဲ၀ဲလီၤ.
“တၣ်ခၠ့ၣ်လ့း ထံဒိၣ်အံၤဒု တုၤဒၣ်လဲၣ် တၫ်ရ့လိာ်မုာ်လိာ်တိၤ ကလီၤဘျၢဘၣ်အသးလီၤ”အဂ့ၫ် ပှၤလီၫ်က၀ီၤဖိလၢခံတဂၤတဲ၀ဲလီၤ.
ထံဟဲထီၣ်သတူာ်ကလာ်အဃိ က၀ီၤဒ့လၢထံညီနုၫ်လုၫ်ဘၢ တကးဘၣ်ဘိၣ်ခၠိးကျဲမုၫ်ဒီတကျိၤဒီးနီၫ်ဂံၫ်(၁)တၫ်ရ့လိာ်မုာ်လိာ်တိၤ တိၤဖီခိၣ်ဒၣ်လဲၣ် ထံထီၣ်တုၤအဃိ တၫ်ဘၣ်မၤ ဂ့ၫ်ဂီၫ်အူ တၫ်ကဆှဲကဆှီတၫ်မၤ,တၫ်ကမှံၤတဖၣ် ကယွၤလီၤပိာ်ဃုာ်ထံအခံအဂီၫ်မၤ၀ဲအဂ့ၫ် လီၫ်က၀ီၤတၫ်ကစီၣ် တဖၣ်ပာ်ဖျါ၀ဲလီၤ.
ထံထီၣ်အသဟီၣ်အဃိ တၫ်ဒီၣ်တဲာ်ဃးလီမ့ၣ်အူ၀ံၤ လီတဲစိတၫ်ဆဲးကျိးတဖၣ်စ့ၫ်ကီး ကီခဲ၀ဲအဂ့ၫ် တဲ၀ဲလီၤ.
၀့ၫ်တၣ်ခၠံၣ်လ့းအ မဲၣ်ဆဲၣ်ထံကျိထံ ထံတၫ်ဘၣ်ယိၣ်တၫ်ပာ်ပနီၣ်န့ၣ် အိၣ်၀ဲ(၃၉၀)စ့ၣ်တံၣ်မံထၢၣ်၀ံၤ ဖဲဂီၤ(၈)နၣ်ရံၣ်န့ၣ် အိၣ်တုၤလၢ(၅၄၈)စ့ၣ်တံၣ်မံထၢၣ်အဃိ အါန့ၫ်ဒံး ထံတၫ်ဘၣ်ယိၣ်တၫ်ပာ်ပနီၣ်လီၫ်(၁၅၈ စ့ၣ်တံၣ်မံထၢၣ်/၅ ပျၫ်ဘျဲၣ် ဃၣ်ဃၣ်န့ၣ်လီၤ.
ယိၤဒိၣ်ကီၫ်စဲၣ်မုၫ်ထီၣ်,ကီၫ်ဆၣ်ကျဲတိၣ်အပူၤစ့ၫ်ကီး တၫ်စူၤတပယူာ်ဃီအဃိ ထံဒိၣ်နိယွၤကဲထီၣ်၀ံၤ လီၫ်က၀ီၤသုးတဖၣ်,၀ဲၤကျိၤတဖၣ်, ပၢၤကီၫ်တဖၣ်,ပှၤမၤပံာ်မ့ၣ်အူဖိတဖၣ်,ပှၤတ၀ၢတၫ်မၤစၢၤကရၢတဖၣ်ဒီးပှၤ ဘၣ်မူဘၣ်ဒါတဖၣ် မၤစၢၤဆီၣ်ထွဲ၀ဲ၀ံၤ လၢ၀့ၫ်မဲခး(မိုင်းခတ်မြို့)ဒီး မဲယါကီၫ်ဆၣ်(မိုင်းယန်းမြို့နယ်)အပူၤစ့ၫ်ကီး မူခိၣ်စူၤထံဒိၣ်အဃိ ပှၤဘၣ်မူဘၣ်ဒါတဖၣ် မၤတၫ်မၤပူၤဖျဲးထီၣ်သးသမူတၫ်ဖံးတၫ်မၤတဖၣ်အဂ့ၫ် တၫ်သ့ၣ်ညါဘၣ် လီၤ.
Ref: VOM
