လါစဲးပထ့ဘၢၣ်(၁၁)သီ,၂၀၂၄နံၣ်
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ(၃)နံၣ်ဘျဲၣ်အတီၢ်ပူၤ ခီဖျိလၢသုးကီၣ်ကးအသုးဒီးအစုတီဖီလၥ်တၢ်ကရၢကရိတဖၣ် ဒွဲၣ်အူမၤဟးဂီၤကွံၥ်အီၤအဃိ လီၢ်က၀ီၤကမျၢၢ် ဟံၣ်(၁)ကလီၢ်ဘျဲၣ် ဘၣ်ဟးဂီၤကွံၥ်၀ဲအဂ့ၢ် Data for Myanmarထုးထီၣ်ပၥ်ဖျါဃၣ်၀ဲ ဖဲလါစပထ့ဘၢၣ်(၁၀)သီအနံၤန့ၣ်လီၤ.
၂၀၂၄နံၣ်အတီၢ်ပူၤ ခီဖျိလၢသုးကီၣ်ကးအသုးဒွဲၣ်အူမၤဟးဂီၤကွံၥ်အီၤအဃိ ဟံၣ်ဃီ(၂၁,၀၀၀)ဘျဲၣ် ဘၣ်ဟးဂီၤကွံၥ်၀ဲ၀ံၤ ကီလ့, ကလ့, ဘူသံတီၣ်,မၠ့းခၠၣ်ဒီးမိၣ်ယွၣ်ကီၢ်ဆၣ်တဖၣ်အပူၤ ဟံၣ်ဃီဘၣ်ဟးဂီၤကွံၥ်၀ဲ အဖျၢၣ်(၁,၀၀၀)ဒီး(၅,၀၀၀)အဘၢၣ်စၢၤန့ၣ်လီၤ.
၂၀၂၄နံၣ်, လါယူၤလံအတီၢ်ပူၤ စကဲကီၢ်ခီ, မါတလ့ကီၢ်ခီ, ကရ့ၣ်နံၣ်ကီၢ်စဲၣ်, ပကိကီၢ်ခီ(မုၢ်နုၥ်တပၤ) တနီသရံး, ရၢၢ်ခၢၣ်ကီၢ်စဲၣ်ဒီး ယိၤဒိၣ်ကီၢ်စဲၣ်ကလံၤထံးတပၤ လီၢ်က၀ီၤကမျၢၢ်ဟံၣ်ဃီလၢ ဘၣ်တၢ်ဒွဲၣ်အူမၤဟးဂီၤကွံၥ်အိၣ်၀ဲ(၁,၁၇၈)ဖျၢၣ်န့ၣ်လီၤ.
လါဖ့ၤဘြူၤအါရံၤဒီးလါမးရှးအတီၢ်ပူၤ ခီဖျိလၢသုးကီၣ်ကးအသုး ဒွဲၣ်အူမၤဟးဂီၤကွံၥ် ကီလ့၀့ၢ်ပူၤက၀ီၤဒ့တဖၣ်ဒီးသ၀ီ(၄၀)ဖျၢၣ်လၢ အဘူးဒီး၀့ၢ်အကပိၥ်ကပၤတဖၣ်အဃိ ဟံၣ်ဃီအစှၤကတၢၢ်(၅,၂၀၀)ဖျၢၣ်ဃၣ်ဃၣ် ဘၣ်ဟးဂီၤကွံၥ်၀ဲအဂ့ၢ် Data for Myanmar စံး၀ဲန့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ(၃)နံၣ်ဘျဲၣ်အတီၢ်ပူၤ တၢ်ဒုးတဖၣ်ဟဲဆူၣ်ထီၣ်လၢ သုးကီၣ်ကးဒီးတၢ်ပၢၢ်ဆၢဂံၢ်ဘါကရူၢ်တဖၣ်အဘၢၣ်စၢၤ၀ံၤ ဟီၣ်က၀ီၤလၢပှၤပၢၢ်ဆၢတၢ်ဖိအဂံၢ်ဆူၣ်တဖၣ်အပူၤ သုးကီၣ်ကးအသုးဒီးအစုတီၤဖီလၥ် တၢ်ကရၢကရိတဖၣ် ဒွဲၣ်အူမၤဟးဂီၤကွံၥ် လီၢ်က၀ီၤကမျၢၢ်ဟံၣ်ဃီတဖၣ်န့ၣ်လီၤ.
လီၢ်က၀ီၤကမျၢၢ်ဟံၣ်ဃီတဖၣ် ဘၣ်ဟးဂီၤကွံၥ်၀ဲ ခီဖျိလၢသုးကီၣ်ကးသုးကျိၤနုၥ်လီၤဒွဲၣ်အူကွံၥ်တၢ် တကးဘၣ် တၢ်ခးလီၤကျိဖးဒိၣ်, ခးလီၤတၢ်လၢကလံၤကျါဒီး သုးကဘီတဖၣ်ပူၤအဃိန့ၣ်လီၤ.
ခီဖျိလၢသုးကီၣ်ကးအသုးဒီးအစုတီဖီလၥ်တၢ်ကရၢကရိတဖၣ် ဒွဲၣ်အူမၤဟးဂီၤကွံၥ်အီၤအဃိ ၂၀၂၁နံၣ်အတီၢ်ပူၤ လီၢ်က၀ီၤကမျၢၢ်ဟံၣ်ဃီ ဘၣ်ဟးဂီၤကွံၥ်(၂,၁၁၁)ဖျၢၣ်, ၂၀၂၂နံၣ်အတီၢ်ပူၤ (၄၆,၈၅၆)ဖျၢၣ်, ၂၀၂၃နံၣ်အတီၢ်ပူၤ (၃၁,၄၈၄)ဖျၢၣ် ဒီး၂၀၂၄နံၣ်(တုၤ လါယူၤလံအလၢၢ်) လီၢ်က၀ီၤကမျၢၢ်ဟံၣ်ဃီ ဘၣ်ဟးဂီၤကွံၥ်၀ဲ(၂၁,၀၁၂)ဖျၢၣ်အဂ့ၢ် Data for Myanmar ထုးထီၣ်ပၥ်ဖျါဃၣ်၀ဲန့ၣ်လီၤ.
