လါစဲးပထ့ဘၢၣ်(၁၁)သီ,၂၀၂၄နံၣ်
ဖဲလါစပထ့ဘၢၣ်(၉)သီအနံၤ, ဟါလီၤခီအဆၢကတီၢ် သုးကီၣ်ကးလဲၤတ့ၢ်လီၤ ရၢၢ်ခၢၣ်သုးမုၢ်ဒိၣ်(AA) အမီၣ်တီတစိၤတလီၢ်ဃိၣ်ဒဲက၀ီၤလၢမ့ၣ်ပိၢ်အဃိ ဘၣ်သံ၀ဲ ပှၤသုးဖိလၢတၢ်ဖီၣ်န့ၢ်အီၤဖဲ တၢ်ဒုးပူၤပၥ်ဃုၥ် ပှၤလီၤဃိၣ်ဖိ(၅၀)ဂၤဘျဲၣ်အဂ့ၢ် AAထုးထီၣ်ပၥ်ဖျါဃၣ်၀ဲန့ၣ်လီၤ.
ပှၤသံတဖၣ်အံၤ မ့ၢ်ပှၤသုးဖိတဖၣ်လၢ တၢ်ဖီၣ်န့ၢ်အီၤဖဲတၢ်ထီၣ်ဒုး၀့ၢ်မီၣ်တီအပူၤ, ARSA, RSO, မိၣ်စလ့ၣ်ပှၤဖီၣ်စုက၀ဲၤလၢ သုးကီၣ်ကးဟ့ၣ်သုးတၢ်သိၣ်လိတဖၣ်, ပှၤလၢအဘၣ်ထွဲလိၥ်သးဒီး ရၢၢ်ခၢၣ်တၢ်ထူၣ်ဖျဲးပၣ်တံၣ်(ALP)ဒီး ပှၤလၢတၢ်ဖီၣ်ဃၣ်အီၤလၢ တၢ်ဂ့ၢ်အကလုၥ်ကလုၥ်တဖၣ် ပၥ်ဃုၥ်၀ဲအဂ့ၢ် စံး၀ဲန့ၣ်လီၤ.
AAအလံၥ်ဘိးဘၣ်ရၤလီၤအပူၤ ပၥ်ဖျါဃၣ်စ့ၢ်ကီး၀ဲလၢ ပှၤသံတဖၣ်အိၣ်၀ဲတကးဘၣ် ပှၤဘၣ်ဒိဘၣ်ထံးလၢ သးသမူတၢ်လီၤဘၣ်ယိၣ်အိၣ်တဖၣ် အိၣ်၀ဲအါအါဂီၢ်ဂီၢ်န့ၣ်လီၤ. (နခခ-၂)သုးကလၢၤလၢ သုးကီၣ်ကးလဲၤတ့ၢ်လီၤမ့ၣ်ပိၢ်အံၤ မ့ၢ်သုးကလၢၤ(၁)ဖျၢၣ်လၢ တၢ်ထီၣ်ဒုးမၤန့ၢ်ဃၣ်၀ဲ ဖဲ၂၀၂၄နံၣ် လါယူၤလံ(၆)သီအနံၤအဂ့ၢ် တဲ၀ဲန့ၣ်လီၤ.
တသီဃီအတီၢ်ပူၤ သုးကီၣ်ကးအသုးလဲၤတ့ၢ်လီၤစ့ၢ်ကီးမ့ၣ်ပိၢ်လၢ ၀့ၢ်သၣ်လံၣ်သ၀ီ UNတၢ်သူၣ်ထီၣ်တဖၣ်လၢ အယံၤဒီးမီၣ်တီ၀့ၢ် (၃)မံၤလၥ်အဂ့ၢ် အလံၥ်ဘိးဘၣ်ရၤလီၤအပူၤ ပၥ်ဖျါဃၣ်၀ဲန့ၣ်လီၤ.
သုးကီၣ်ကးအသုး မၤအါထီၣ်ကလံၤကျါတၢ်ဒုး ခဲအံၤခဲအံၤလၢအါန့ၢ်ဒံးအပူၤကွံၥ်အသိး ဟဲတ့ၢ်လီၤမ့ၣ်ပိၢ်လၢ ပှၤကညီအိၣ်အါအလီၢ်လၢအမ့ၢ် တၢ်သိၣ်လိကၠိ,တၢ်ဆါဟံၣ်,ကျး,သီခါဖၠၣ်, ၀ဲၤကျိၤ၀ဲၤဒ့တၢ်သူၣ်ထီၣ်ဒီး သုးကလၢၤလၢဘၣ်ပျၢ်ကွံၥ်၀ဲတဖၣ်စ့ၢ်ကီး ပၥ်ဃုၥ်၀ဲအဃိ ထံဖိကမျၢၢ်ဖိတဖၣ် ကပလီၢ်သူၣ်ပလီၢ်သးလၢ ကလံၤကျါတၢ်လီၤဘၣ်ယိၣ်အဂ့ၢ် AA ဆီၣ်တခူထီၣ်ဃၣ်၀ဲန့ၣ်လီၤ.
လါစပထ့ဘၢၣ်(၈)သီအနံၤစ့ၢ်ကီး သုးကီၣ်ကးအသုးလဲၤတ့ၢ်လီၤမ့ၣ်ပိၢ်လၢ ရၢၢ်ခၢၣ်ကီၢ်စဲၣ်, ပီးတီကီၢ်ဆၣ်, ရှ့ၣ်ယွၣ်သ၀ီပူၤအဃိ သုးကီၣ်ကးအပှၤသုးဖိလၢတၢ်ဖီၣ်ဒုးဃၣ်အီၤ ဘၣ်သံ၀ဲ (၁၇)ဂၤဒီးဘၣ်ဒိ၀ဲ(၁၀)ဂၤအဂ့ၢ် AAထုးထီၣ်ပၥ်ဖျါဃၣ်၀ဲန့ၣ်လီၤ.
