အမဲရကၤဒီးအဲကလံးဟ့ၣ်ပလီၫ် ဘၣ်ထွဲတၫ်ဒုးမၤဟးဂီၤ ကူၣ်သ့တၫ်ဖံးတၫ်မၤလၢ ကီၫ်ပယီၤပူၤ

လါစဲးပထ့ဘၢၣ်(၁၀)သီ,၂၀၂၄နံၣ်

အပူၤကွံာ်(၂)နံၣ်အတီၫ်ပူၤ ကီၫ်ပယီၤဒီတဘ့ၣ်အပူၤ ကၠိတဖၣ်ဘၣ်တၫ်ဒုးအီၤ(၁၇၄)ဘျီ၀ံၤ ဖိဒံဖိသၣ်ကထီၣ်ဘၣ်ကၠိခွဲးယာ် လၢတၫ်ဘံၣ်တၫ်ဘၢအပူၤ ဘၣ်တၫ်ဂ့ၫ်လိာ်၀ဲအဂ့ၫ် ဖဲလါစဲးပထ့ဘၢၣ်(၉)သီနံၤလီၤဘၣ်  တၫ်ဒီသဒၢတၫ်ဒုးမၤဟးဂီၤထံဂုၤကီၫ်ဂၤဘၣ်ထွဲကူၣ်သ့သနၢၣ်အမုၫ်နံၤအပူၤ ၀့ၫ်တကူၣ်-အမဲရၤကၤမီၫ်သီ၀ဲၤဒၢး ဘိးဘၣ်ရၤလီၤ၀ဲလၢ အ Facebook ပှၤတ၀ၢပှာ်ဘျးစဲန့ၣ်လီၤ.

ကီၫ်ပယီၤပူၤဖိသၣ်(၃)ကလီၫ်ဘျဲၣ် လၢတူၫ်ဘၣ်တၫ်သဘံၣ်သဘုၣ်တၫ်ကီတၫ်ခဲတဖၣ်အဂီၫ် တၫ်ကဆီၣ်ထွဲမၤစၢၤန့ၫ်အီၤ တၫ်မၤလိလီၫ်လၢပူၤဖျဲးတၫ်လီၤဘၣ်ယိၣ် ကန့ၫ်အဂီၫ် လီၫ်က၀ီၤကူၣ်သ့သိၣ်မှံၤတဖၣ်,ထံဂုၤကီၫ်ဂၤတၫ်ကရၢကရိတဖၣ် ဃုာ်ဒီးအမဲရကၤထံဂုၤကီၫ်ဂၤတၫ်ဂုၤထီၣ်ပသီထီၣ် အ့ၣ်ကၠ့ၣ်စံၣ်USAIDတဖၣ် ဖီၣ်လိာ်စုမၤသကိးတၫ်အဂ့ၫ် တဲဃာ်၀ဲလီၤ.

တၫ်ပညိၣ်ဒုးဃီၤ၀ဲ ကီၫ်ပယီၤအခါဆူမဲာ်ညါ တၫ်သိၣ်လိကၠိတဖၣ် တၫ်ကပတုာ်ကွံာ်တဘျီဃီစ့ၫ်ကီး အမဲရကၤမီၫ်သီတၫ်ဘိးဘၣ်ရၤလီၤအပူၤ ဃ့ထီၣ်ဃာ်၀ဲလီၤ.

ဟီၣ်က၀ီၤလၢကလုာ်ဒူၣ်တၫ်ပၢဆၢသုး ပၢဆှၢဃာ်အပူၤ သုးကီၣ်ကးမၤကဒီး ကလံၤကျါတၫ်ခးလီၤတၫ်တဖၣ်ဒီး လီၤဆီဒၣ်တၫ်လၢ ယိၤဒိၣ်ကီၫ်စဲၣ်ဒီးကရ့ၣ်နံၣ်ကီၫ်စဲၣ်အပူၤ တၫ်သိၣ်လိကၠိတဖၣ် ဟးဂီၤကွံာ်၀ဲအသိး, ပှၤလီၫ်အိၣ်ကမှံဖိသၣ်တဖၣ် ဘၣ်ဒိဘၣ်ထံးသံ တၫ်ကစီၣ်တဖၣ်ဟးထီၣ်အကတီၫ်န့ၣ်လီၤ.

ကီၫ်ပယီၤအံၤ ပာ်ဃုာ်လၢထံကီၫ်လၢကူၣ်သ့သနၢၣ်ဘၣ်တၫ်ဒုးအီၤအစရီပူၤ၀ံၤ ဖိသၣ်ခဲလၢာ်ကဘၣ်အိၣ်ဒီး တၫ်မၤလိခွဲးယာ်လၢတၫ်ဘံၣ်တၫ်ဘၢအပူၤအဂ့ၫ် ဖဲလီၤဘၣ် တၫ်ဒီသဒၢ တၫ်ဒုးမၤဟးဂီၤထံဂုၤကီၫ်ဂၤဘၣ်ထွဲကူၣ်သ့သနၢၣ် အမုၫ်နံၤန့ၣ် ၀့ၫ်တကူၣ် အဲကလံးမီၫ်သီ၀ဲၤဒၢး အFacebookပှၤတ၀ၢပှာ်ဘျးစဲအပူၤ ပာ်ဖျါဃာ်၀ဲလီၤ.ခ့ၣ်အဲၣ်ယူၣ်-ကညီဒီကလုာ် စၢဖှိၣ်ကရၢ,ကီၫ်သူလ့ၤတၫ်ပၢဟီၣ်က၀ီၤပူၤ ဘၣ်ထွဲကၠိတဖၣ်ကပူၤဒီးတၫ်ဘၣ်ယိၣ် လံာ်ဘိးဘၣ်ရၤလီၤ တၫ်ဆဲးလီၤစုမုၫ်ကျၢၫ်န့ၣ် တူၫ်လိာ်၀ဲအဂ့ၫ် အဲကလံးမီၫ်သီ၀ဲၤဒၢး တၫ်ဘိးဘၣ်ရၤလီၤပူၤ ပာ်ဖျါဃာ်၀ဲန့ၣ်လီၤ.

Ref: VOA