JFMဃ့ထီၣ်၀ဲလၢ တၫ်ကကးတံာ်ဟံးန့ၫ်ဂ့ၫ်၀ီ ကီၫ်ပယီၤဒီကလုာ်ကလံၤကျါတၫ်လဲၤထီၣ်က့ၤလီၤ

လါစဲးပထ့ဘၢၣ်(၁၀)သီ,၂၀၂၄နံၣ်

ကီၫ်ပယီၤဒီကလုာ်ကလံၤကျါတၫ်လဲၤထီၣ်က့ၤလီၤ(MNA)န့ၣ် မၤစၢၤဆီၣ်ထွဲသုးကီၣ်ကးအဃိ တၫ်ကကးတံာ်ဟံးန့ၫ်ဂ့ၫ်၀ီအဂီၫ် ဖဲလါစဲးပထ့ဘၢၣ်(၉)သီနံၤန့ၣ် Justice For Myanmar (JFM)ဃ့ထီၣ်၀ဲလီၤ.

ကီၫ်ပယီၤဒီကလုာ်ကလံၤကျါတၫ်လဲၤထီၣ်က့ၤလီၤ(MNA) န့ၣ် မ့ၫ်ထံကီၫ်ပၢ၀ံၤ သုးဟံးန့ၫ်ထံကီၫ်တၫ်စိတၫ်ကမီၤ၀ံၤအလီၫ်ခံ သုးကီၣ်ကးပၢဆှၢဃာ်၀ဲလီၤ.လၢကတီၫ်အံၤ ATRကဘီယူၤကလုာ်လၢ မၤတၫ်ဖဲMNAကလံၤကျါတၫ်လဲၤထီၣ်က့ၤလီၤန့ၣ် တၫ်သူ၀ဲလၢသုးဂ့ၫ်၀ီ၀ံစိာ်တီဆှၢအဂီၫ်အဃိ တၫ်ကကးတံာ်ဟံးန့ၫ်ဂ့ၫ်၀ီအဂီၫ် JFMတဲဆီၣ်တခူ ထီၣ်ဃာ်၀ဲလီၤ.

အပူၤကွံာ် လါအ့ဖြ့ၣ်အပူၤKNUဒီးPDFသုးပာ်ဖှိၣ်တဖၣ် အတၫ်ထီၣ်ဒုး၀့ၫ်ရၤမတံ၀ံၤအလီၫ်ခံ သုးကီၣ်ကးအသုးလၢဃ့ဖျိးကွံာ် ဆူကီၫ်ကၠီၣ်တဲၣ်တကပၤဒီးသုးကီၣ်ကးအတၫ်ဖိတၫ်လံၤတဖၣ် တၫ်သူ၀ဲATRကဘီယူၤ၀ံၤ လဲၤကိးက့ၤ အ၀ဲသ့ၣ်အိၣ်၀ဲလီၤ.

MNAကလံၤကျါတၫ်လဲၤထီၣ်က့ၤလီၤ ပှၤနီကဘီယူၤဖိအါတက့ၫ်န့ၣ် မ့ၫ်ကလံၤသုးခိၣ်နၫ်လီၫ်လံၤတဖၣ်၀ံၤ ခီပနံၣ်တကပၤစ့ၫ်ကီး အိၣ်ဒီးတၫ်ရ့လိာ်ဘၣ်ထွဲဒီး ကလံၤသုးခိၣ်နၫ်ဒိၣ်ထီတဖၣ်အဂ့ၫ် တဲဃာ်၀ဲလီၤ.

MNAအဒၣ်ရဲးထၢၣ်လီၫ်လံၤတဂၤလၢအမ့ၫ် အူလ့ထဲးန့ၣ် မ့ၫ်၀ဲအပူၤကွံာ်ကလံၤသုး သုးခိၣ်ကျၢၫ်လီၫ်လံၤမီၣ်မီၣ်ကၠီၣ် အဖိဒိၣ်ခွါ၀ံၤ ဘျးစဲဘၣ်ထွဲလိာ်သးဒီး ကမျၢၫ်တကပၤမ့ၫ်ဂ့ၤ,ဘၣ်ထွဲသုးတကပၤ ကလံၤကျါသနၢၣ်အပူၤအိၣ်၀ဲအဂ့ၫ် JFMတဲ၀ဲလီၤ.

MNAကလံၤကျါတၫ်လဲၤထီၣ်က့ၤလီၤ န့ၫ်ပၢ၀ဲATR 72-500ကဘီယူၤ(၂)ခိၣ်အကျါ MSN 781န့ၣ် ဖဲ၂၀၁၃နံၣ်န့ၣ် ဟ့ၣ်ခီဃီၤ၀ဲဆူကလံၤသုးအိၣ်၀ံၤ မ့မ့ၫ်လၢ MSN 765တခီ ဟ့ၣ်ခီဃီၤ၀ဲ ဖဲ၂၀၁၄နံၣ်အဂ့ၫ်တဲဃာ်၀ဲလီၤ.ဖဲ၂၀၁၆နံၣ်န့ၣ် ဟ့ၣ်ခီဃီၤ၀ဲ ATR 42-320ကဘီယူၤကလုာ်အသိး,တၫ်က့ၤဘှီဘၣ်သူ၀ဲလၢ ကလံၤသုးအပီၣ်လဲၣ်ပူၤ ဒ်ကဘီယူၤ ကွၫ်ဟုၣ်တၫ်အသိးအဂ့ၫ် JFMအတၫ်ဘိးဘၣ်ရၤလီၤအပူၤ ပာ်ဖျါ၀ဲလီၤ.

သုးကီၣ်ကး ပၢဆှၢဃာ်MNAကလံၤကျါတၫ်လဲၤထီၣ်က့ၤလီၤပာ်ဃုာ် ထံကီၫ်ပၢမုာ်ကျိၤ၀ဲၤကွာ်တၫ်မၤခဲလၢာ် ထံဂုၤကီၫ်ဂၤတကပၤ ကကတံာ်ဟံးန့ၫ်ဘၣ်ဂ့ၫ်၀ီအဂီၫ် Justice For Myanmar တဲဆီၣ်တခူထီၣ်ကဒီး၀ဲန့ၣ်လီၤ.

Ref: RFA