လါစဲးပထ့ဘၢၣ် (၁၀)သီ,၂၀၂၄နံၣ်
ကညီဒီကလုၥ်ပၢၤကီၢ်သုး သိၣ်ဒူတဖၣ် ကမၤလၢပှဲၤဘၣ်မှုဒါအဂီၢ် ဒီး ခီဖျိလၢဟံးန့ၢ်မှုဒါမၤကဒီး၀ဲ ကညီဒီကလုၥ်ပၢၤကီၢ်သုးတၢ်ဖံးတၢ်မၤတဖၣ်အဃိ ပၥ်ကဖၢလၢသးအဂ့ၢ် ကညီဒီကလုာ်ပၢၤကီၢ်သုး, ပၢၤကီၢ်ခိၣ်ကျၢၢ်, သုးခိၣ်ဒိၣ်ဂီၢ်ဂ့ၢ်စီၤအဲၣ်ကလုၥ်ဖိ ကတိၤဟ့ၣ်ဂံၢ်ဟ့ၣ်ဘါလီၤ ကညီဒီကလုၥ်ပၢၤကီၢ်သုးခိၣ်နၢ်တဖၣ်ဒီး သိၣ်ဒူတဖၣ် ဖဲ (၃၃)၀ီတ၀ီ ကညီဒီကလုၥ်ပၢၤကီၢ်သုး မုၢ်နံၤဆၢက့ၤပှဲၤထီၣ်အမူးတၢ်ရဲၣ်တၢ်ကျဲၤပူၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၣ်၀ဲန့ၣ်လီၤ.
တချူးလၢ တၢ်ဒုးအိၣ်ထီၣ် ကညီဒီကလုၥ်ပၢၤကီၢ်သုးအဆၢကတီၢ် သဲစးတၢ်ဘျၢကဒိၣ်စိအဂီၢ် တၢ်ဟ့ၣ်လီၤမှုဒါဆူ ကညီဒီကလုၥ်ဂၢၤသးကရၢ(KNDO)လၢ ကတိစၢၤမၤစၢၤဘၣ် စံၣ်ညီၣ်ပီတ့တၢ်ဖံးတၢ်မၤတဖၣ်အပူၤန့ၣ်လီၤ. ဖဲလၢတၢ်စးထီၣ်ဒုးအိၣ်ထီၣ် ကညီဒီကလုၥ်ပၢၤကီၢ်သုးအဆၢကတီၢ်စ့ၢ်ကီး ပၢၤကီၢ်သုးလၢလိၣ်ဘၣ်တဖၣ် တၢ်ဃုထၢထီၣ်၀ဲ KNDOသိၣ်ဒူတဖၣ်အဂ့ၢ် တဲလီၤ၀ဲန့ၣ်လီၤ.
စိၤဆၢကတီၢ် ဟဲလဲၤထီၣ်လဲၤထီတပယူၢ်ဃီ ပှၤကညီတၢ်ဆိကမိၣ်ဆိကမးတဖၣ် ဟဲလဲၤထီၣ်လဲၤထီ၀ဲအဃိ တၢ်မၤကမၣ် ကွီၢ်မ့ၣ်တဖၣ်စ့ၢ်ကီးအိၣ်အါထီၣ်၀ဲလီၤ. ဟီၣ်ခိၣ်ဒီဘ့ၣ်တၢ်ရ့လိၥ်မုၥ်လိၥ်အပူၤ တၢ်မၤဘၣ်ဒိ ကညီဒီကလုၥ်တၢ်ဆဲးတၢ်လၤ, လုၢ်လၢ်ထူသနူဒီး တၢ်မၤကမၣ်သဲစးတၢ်ဘျၢတဖၣ်စ့ၢ်ကီးအိၣ်အါထီၣ်၀ဲအဂ့ၢ် စံး၀ဲန့ၣ်လီၤ.
“တၢ်ကီတၢ်ခဲအိၣ်အကလုၥ်ကလုၥ်လၢ ပတၢ်ဖံးတၢ်မၤအပူၤလီၤ. ဘၣ်မနုအဃိလဲၣ် တၢ်ထီဒါပၢၢ်ဆၢ မိၤစိရိၤသနူအဆၢကတီၢ်တကတီၢ်ဃီ ကညီကစံၣ်ညီၣ်တီနံနီၢ်ကစၢ်အဘူၣ်အတီၢ်အဂီၢ်,ကသူၣ်ထီၣ်ဆီလီၤဘၣ်နီၢ်ကစၢ်တၢ်ပၢတၢ်ပြးအဂီၢ်, ကီၢ်ပူၤတၢ်ဘံၣ်တၢ်ဘၢအဂီၢ် ဒီးကညီဒီကလုၥ်တၢ်ဘံၣ်တၢ်ဘၢအဂီၢ် မူဒါအိၣ်လၢလၢပှဲၤပှဲၤလၢ ကညီဒီကလုၥ်ပၢၤကီၢ်သုးအအိၣ်”အဂ့ၢ် တဲ၀ဲလီၤန့ၣ်လီၤ.
တၢ်ဒုးအိၣ်ထီၣ်ဃၣ် ကညီဒီကလုၥ်ပၢၤကီၢ်သုးအံၤလၢ အဲၣ်ကလုၥ်ပှၤပၢၢ်ဆၢတၢ်ဖိတဖၣ်၀ံၤ တၢ်ကူၣ်ဘၣ်ကူၣ်သ့, တၢ်လဲၤခီဖျိလၢ အိၣ်ဒီးပှၤတဖၣ်အဖီခိၣ် တၢ်ပၥ်ဖှိၣ်မၤသကိးတၢ်လၢ သုးဂ့ၢ်၀ီအပူၤမ့ၢ်ဂ့ၤ ဒီး တၢ်ပၢတၢ်ပြးဂ့ၢ်၀ီတပၤမ့ၢ်ဂ့ၤအဂ့ၢ် တဲဆီၣ်တခူထီၣ်၀ဲန့ၣ်လီၤ.
