လါစဲးပထ့ဘၢၣ်(၁၀)သီ,၂၀၂၄နံၣ်
လါစဲးစပထ့ဘၢၣ် စးထီၣ်သီန့ၣ် သုးကီၣ်ကးအသုးဒီး BGFသုးတဖၣ် မၤပှဲၤအါထီၣ်သုးအဂံၢ်အဘါ၀ံၤ ဟဲနုၥ်လီၤဟူးဂဲၤ၀ဲ သုးဂ့ၢ်၀ီတၢ်ဟူးတၢ်ဂဲၤတဖၣ် ဖဲကီၢ်ရ့ၣ်မုၢ်တြီၢ်, ဒွဲၣ်လိကီၢ်ဆၣ်, ကတၢတံးလီၢ်က၀ီၤပူၤအဂ့ၢ် ကီၢ်ရ့ၣ်မုၢ်တြီၢ် ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၢ်ဒိၣ်တဲ၀ဲန့ၣ်လီၤ.
သုးကီၣ်ကးအသုးဒီး BGFအဂံၢ်အဘါအိၣ်(၁၀၀)ဘျဲၣ်အံၤ ဟဲနုၥ်လီၤတဆီ ဖဲ၀့ၢ်ကမးမီ၀ံၤ ဟဲနုၥ်လီၤ၀ဲဆူ ကီၢ်ရ့ၣ်မုၢ်တြီၢ်ဟီၣ်က၀ီၤ, ကတၢတ့းသ၀ီပူၤန့ၣ်လီၤ.
တၢ်ဒုးဆူၣ်ထီၣ်သ့ ခီဖျိလၢ သုးကီၣ်ကးအသုး မ့ၢ်ဟဲတလၢကွံၥ် ကတၢတံးသ၀ီဒီး မ့ၢ်ဟဲထီၣ်ဆူ ဖၣ်ပူၣ်တခီအဂ့ၢ် သုးခိၣ်ဒိၣ်ဂီၢ်ဂ့ၢ် စီၤကျၢၢ်ဒိၣ် စံး၀ဲန့ၣ်လီၤ.
သုးကီၣ်ကးအသုးဒီး BGFအဂံၢ်အဘါအိၣ်(၁၀၀)ဘျဲၣ်အံၤ ဟဲမၤစၢၤ၀ဲသုးဂ့ၢ်၀ီဆူ ၀့ၢ်ဖၣ်ပူၣ်လၢ KNLAသုးပၥ်ဖှိၣ်တဖၣ် က၀ီၤတးတံၥ်ဃၣ် တန့ၢ်ဘၣ်ဆၣ် ဟဲမၤတံၢ်တၥ် သုးပၥ်ဖှိၣ်တဖၣ် သုးဂ့ၢ်၀ီတၢ်ဟူးတၢ်ဂဲၤအဂ့ၢ် သုးခိၣ်ဒိၣ်ဂီၢ်ဂ့ၢ် စီၤကျၢၢ်ဒိၣ် ပဲၥ်ထံနီၤဖး၀ဲန့ၣ်လီၤ.
ကတၢတံးသ၀ီအပူၤ သုးကီၣ်ကးအသုးကလၢၤ(၁)ဖျၢၣ်ဒီး သုးခိးကီၢ်ဆၢ(BGF) သုးရ့ၣ်၀ဲၤလီၢ်ခိၣ်သ့ၣ် အိၣ်ဆီလီၤပၥ်သး၀ံၤ လၢကတၢတံးအဆၢခိၣ် ယံၤမံၤလၥ်(၄၀)တခီ ၀့ၢ်ဖၣ်ပူၣ်အိၣ်၀ဲန့ၣ်လီၤ.
သုးက့နီၣ်ဂံၢ်(၅) KNLAတၢ်ပၢၢ်ဆၢသုးပၥ်ဖှိၣ် က၀ီၤကးတံၥ်ကဒီးဃၣ်၀ဲ ဖၣ်ပူၣ်သုးတၢ်တိၥ်ကူၣ်ကျဲၤဒီး သုးရ့ၣ်သုးကလၢၤတဖၣ်၀ံၤ သုးကီၣ်ကးတခီ သုးကလၢၤလၢတၢ်က၀ီၤကးတံၥ်ဃၣ်တဖၣ် ကဒိးန့ၢ်ဘၣ်တၢ်အီၣ်အဂီၢ် ဟဲတ့ၢ်လီၤန့ၢ်၀ဲဒၣ်လၢ ကဘီယူၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်မုၢ်တြီၢ်ဟီၣ်က၀ီၤပူၤ အပူၤကွံၥ်လါအီကူး(၁)လါအတီၢ်ပူၤ တၢ်ဒုးကဲထီၣ်တ့ၢ်၀ဲလၢ KNLAတၢ်ပၢၢ်ဆၢသုးပၥ်ဖှိၣ်ဒီး သုးကီၣ်ကးအဘၢၣ်စၢၤ ခဲလၢၥ်အဘျီ(၁၀၀)ဘျဲၣ်၀ံၤ သုးကီၣ်ကးအသုးဘၣ်ဒိသံ (၅၀)ဂၤဃၣ်ဃၣ်အဂ့ၢ် ခ့ၣ်အဲၣ်ယူၣ်-မုၢ်တြီၢ်ပၥ်ဖျါဃၣ်၀ဲန့ၣ်လီၤ.
Ref: Than Lwin Times
