လါအီကူး(၃၀)သီ,၂၀၂၄နံၣ်
တၫ်စူၤဒိၣ်အဃိ အ့ၣ်ယၣ်၀တံၣ်တၫ်ပၢၤခိၣ်ဟီၣ်က၀ီၤ ဟံၣ်ဖိဃီဖိလၢကွၫ်ဆၢၣ်မဲာ်ဘၣ်ထံတၫ်ဂ့ၫ်ကီတဖၣ် ဟ့ၣ်နီၤလီၤန့ၫ်၀ဲဂ့ၫ်ဂီၫ်အူတၫ်မၤစၢၤတဖၣ်လံအဂ့ၫ် ဘီမုၫ်စၢဖှိၣ်ကရၢ တၫ်ဟ့ၣ်ဟီၣ်ခိၣ်ဖိတၫ်မၤစၢၤကရၢ တဲလီၤ၀ဲဖဲလါအီကူး(၂၆)သီအနံၤန့ၣ်လီၤ.
ပှၤလၢကွၫ်ဆၢၣ်မဲာ်ဘၣ်ထံတၫ်ဂ့ၫ်ကီ အိၣ်၀ဲ(၅)ကလီၫ်အဂ့ၫ်,လံာ်တၫ်ပာ်ဖျါတဖၣ်အဖီခိၣ် ဟီၣ်ခိၣ်လီၫ်အ့ကၢၣ်လၢအကယၤ ထံလုၫ်ဘၢကွံာ်အဂ့ၫ်,ဟီၣ်က၀ီၤလၢနးတဖၣ် လိၣ်ဘၣ်၀ဲဂ့ၫ်ဂီၫ်အူ ဂ့ၫ်ခီၣ်ထံးတၫ်လိၣ်ဘၣ်တဖၣ်အဂ့ၫ် ဟီၣ်ခိၣ်ဒီဖျၢၣ်တၫ်အီၣ်တၫ်အီတၫ်ရဲၣ်တၫ်ကျဲၤတဲ၀ဲလီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤဟံာ်(၃)နံၣ်ဘျဲၣ်, တၫ်ဒုးတဖၣ်ဆူၣ်ထီၣ်,တၫ်ဘၣ်ပာ်တ့ၫ်ဟံၣ်ဃီ သုးလီၫ်သုးကျဲဒီး ကီၫ်ပယီၤလၢဘၣ်ကွၫ်ဆၢၣ်မဲာ်တၫ်ဘံၣ်တၫ်ဘၢတၫ်မၤပျံၤမၤဖုးအဂီၫ် ဂ့ၫ်ဂီၫ်အူတၫ်အိၣ်သးတဖၣ်အံၤ မၤဘၣ်ဒိအါထီၣ် ထံဖိကီၫ်ဖိကမျၢၫ်တဖၣ်လီၤ.
၂၀၂၄နံၣ် ကီၫ်ပယီၤဟီၣ်ခိၣ်ဖိတၫ်မၤစၢၤတၫ်လိၣ်ဘၣ်ဒီးတၫ်ခီၣ်ဆၢတၫ်ရဲၣ်တၫ်ကျဲၤအဖီခိၣ် တချူးထံဒိၣ်နိယွၤကဲထီၣ် အ့ၣ်ယၣ်၀တံၣ်ကီၫ်ခီအပူၤ ပှၤခဲလၢာ်(၁)ကကွဲၫ်ဘျဲၣ်(ပှၤနီၫ်ဂံၫ်(၄ပူ၁ပူ)န့ၣ် လိၣ်ဘၣ်ဟီၣ်ခိၣ်ဖိတၫ်မၤစၢၤအဂ့ၫ် ကီၫ်ပယီၤအ WFPခၢၣ်စး Sheela Matthewတဲ၀ဲလီၤ.
အပူၤကွံာ် လါဒံၣ်စဲဘၢၣ် UNOCHAအတၫ်ဘိးဘၣ်ရၤလီၤအပူၤစ့ၫ်ကီး ကီၫ်ပယီၤပူၤဖိသၣ်(၆)ကကွဲၫ်ပာ်ဃုာ် ပှၤနီၫ်ဂံၫ် (၁၈.၆)ကကွဲၫ် လိၣ်ဘၣ်ဟီၣ်ခိၣ်ဖိတၫ်မၤစၢၤအဂ့ၫ် ပာ်ဖျါ၀ဲလီၤ.
လၢ၉နံၣ်အတီၫ်ပူၤ အ့ၣ်ယၣ်၀တံၣ်တၣ်ပၢၤခိၣ်ဟီၣ်က၀ီၤန့ၣ် WFPက့ၤဆီၣ်ထွဲမၤစၢၤကဒါက့ၤ၀ံၤ အလီၫ်ခံကတၢၫ်တဘျီန့ၣ် မ့ၫ်၀ဲဖဲ၂၀၁၅နံၣ် ထံဒိၣ်အကတီၫ် ဟ့ၣ်၀ဲတၫ်မၤစၢၤန့ၣ်လီၤ.
ပကိ,ကခၠ့ၣ်,ကညီကီၫ်စဲၣ်,မကွကီၫ်ခီ,မတလ့ဒီးစကဲကီၫ်ခီ, ကီၫ်ပယီၤပူၤ ကမျၢၫ်လၢကွၫ်ဆၢၣ်မဲာ်ဘၣ်ထံတၫ်ဂ့ၫ်ကီ (၁၃၀,၀၀၀)ဂၤစ့ၫ်ကီး မၤစၢၤတ့ၫ်၀ဲ၀ံၤ ရခၢၣ်ကီၫ်စဲၣ်ပူၤ တၫ်လိၣ်ဘၣ်တဖၣ် အိၣ်ခိးကွၫ်၀ဲ၀ံၤ ကမၤစၢၤဆီၣ်ထွဲ၀ဲအဂီၫ် အိၣ်ကတီၤသးလံအဂ့ၫ် WFPအတၫ်ဘိးဘၣ်ရၤလီၤပူၤ ပာ်ဖျါ၀ဲလီၤ.
Ref: မောင်း
