လါအီကူး(၃၀)သီ,၂၀၂၄နံၣ်
ကၠီၣ်တဲၣ်-ကညီကီၫ်ဆၢ, ၀့ၫ်ရၤမတံပူၤ သုးကီၣ်ကးမၤပှဲၤဂံၫ်ဘါ၀ံၤ ကတီၤသးလၢသုးဂ့ၫ်၀ီအဃိ ဘၣ်ယိၣ်၀ဲလၢ တၫ်ဒုးကက့ၤကဲထီၣ်ကဒါက့ၤအဂ့ၫ် ရၤမတံလီၫ်က၀ီၤဖိတဖၣ် တဲ၀ဲလီၤ.
ရၤမတံ၀့ၫ်ကပၤ သုးကီၣ်ကးအသုး(ခမရ-၃၅၅,ခမရ-၃၅၆,ခမရ-၃၅၇,ခလရ-၂၇၅,သ့ၣ်ခါညံၣ်နီၣ် တၫ်တိာ်ကူၣ်ကျဲၤသုးကလၢၤတဖၣ် ဖဲလါအ့ဖြ့ၣ်(၁၀)သီအနံၤန့ၣ် KNLA သုးပာ်ဖှိၣ်တဖၣ် ထီၣ်ဒုးမၤန့ၫ်၀ဲလီၤ.
သုးကီၣ်ကးအသုးကလၢၤတဖၣ် ဘၣ်တၫ်ထီၣ်ဒုးန့ၫ်ကွံာ်၀ံၤအလီၫ်ခံ ရၤမတံသုတလီၤအဂီၫ် သုးကီၣ်ကးအသုးဖိလၢ ဃ့ၫ်ဖျိးပူၤဖျဲးတဖၣ်ပာ်ဖှိၣ်ထီၣ်သးဒီး သုးခိးကီၫ်ဆၢ(BGF)လီၤ.လၢရၤမတံ သုးကီၣ်ကးအသုးတဖၣ် မၤပှဲၤဂံၫ်ဘါ အိၣ်ကတီၤသးလၢဒုးယၤဂ့ၫ်၀ီအဂ့ၫ် ရၤမတံလီၫ်က၀ီၤဖိတဖၣ်တဲ၀ဲလီၤ.
ပှၤ၀့ၫ်ရၤမတံဖိတဂၤတဲ၀ဲလၢ”ရၤမတံတၫ်အိၣ်သးန့ၣ် အိၣ်လၢတၫ်ဘှ့ၣ်တၫ်ဘှီၣ်အပူၤဘၣ်ဆၣ် ပှၤအါတက့ၫ်အိၣ်ဒီး တၫ်ဘၣ်ယိၣ်ဘၣ်ဘှီန့ၣ်လီၤ.ဖဲမဟါတနံၤဂီၤအကတီၫ် လၢကၠၣ်ခ့တကပၤ(ကြံခင်းဘက်)ဒီး ကျိးဖးဒိၣ်နီၫ်ဂံၫ်(၅)တကပၤ တၫ်ထံၣ်ဘၣ်လၢသုးဖိတဖၣ် အိၣ်ကတဲာ်ကတီၤအသးဃုာ်ဒီးတၫ်စုက၀ဲၤလၢလၢပှဲၤပှဲၤန့ၣ်လီၤ.တမ့ၫ်ဒ်သိးဒီး လၢညါအသိးဘၣ်.လီၤဂာ်လၢန့ၫ်ဘၣ်တၫ်ကစီၣ်ဒီးအိၣ်ကတီၤသးအဂ့ၫ်”တဲ၀ဲလီၤ.
၀့ၫ်ရၤမတံပူၤ တၫ်တထုးထီၣ်ဃးမုၫ်နၤတၫ်တဘၣ်ဟးထီၣ်တၫ်ချၢတၫ်ကလုၫ်ဘၣ်ဆၣ် ဟါ(၁၀)နၣ်ရံၣ်တုၤ(၄)နၣ်ရံၣ် တၫ်ဟးထီၣ်က့ၤလီၤတန့ၫ်ဘၣ်အမဲာ်ညါ သုဖိလၢဟံးန့ၫ်ဃာ်တၫ်ဘံၣ်တၫ်ဘၢတဖၣ်စ့ၫ်ကီးတုၤဂီၤ(၆)နၣ်ရံၣ် တထုးကွံာ်၀ဲဒံးဘၣ်အဂ့ၫ် ရၤမတံ၀့ၫ်ဖိတဖၣ်တဲ၀ဲလီၤ.
၀့ၫ်ရၤမတံ, တမ့ၫ်လၢအိၣ်ကတဲာ်ကတီၤသးလၢသုးဂ့ၫ်၀ီဘၣ်အမဲာ်ညါ တၫ်ထီၣ်ဒုးပၢ၀့ၫ်သုးတကဲထီၣ်အဂီၫ် သုးကီၣ်ကးမၤအါထီၣ်ဂံၫ်ဘါသ့အဂ့ၫ် ဂ့ၫ်ခီၣ်ထံးတၫ်ကစီၣ်လၢဘူးဒီး သုးကီၣ်ကးတဖၣ်တဲ၀ဲလီၤ.
ထံကီၫ်ပတီၫ် ခီဖျိလၢအီၣ်စ့ၣ်ယးဒုးယၤတၫ်ရဲၣ်တၫ်ကျဲၤအဃိ သုးကျိၤဟဲထီၣ်တဖၣ် ယံာ်(၃)လါအတီၫ်ပူၤ အ့ရှၢၣ်ကျဲမုၫ်ဒိၣ်ပာ်ဃုာ် တိဖျိ၀ဲတီနီၫ်ကစၢၫ်တန့ၫ်ဘၣ်အမဲာ်ညါ KNLAသုးပာ်ဖှိၣ်အသုးကျိၤတဖၣ် ဒုးဃီၤအီၤအဃိ ဘၣ်ဒိဘၣ်ထံးဘၣ်သံဘၣ်ပှၫ်အါမးလီၤ.
စးထီၣ်ဖဲလါဒံၣ်စဲဘၢၣ်(၁)သီနံၤ တၫ်ဒုးအပူၤလီၫ်က၀ီၤကမျၢၫ်(၂၀)ဂၤဘျဲၣ်ဘၣ်သံကွံာ်ဒီး ကမျၢၫ်လၢဃ့ၫ်သုးအဟံၣ်အဖျၢၣ်(၅၀၀)ဘျဲၣ် မ့ၣ်အူအီၣ်ဟးဂီၤကွံာ်၀ံၤ ဟံၣ်ဃီအဖျၢၣ်(၁၀၀)ဟးဂီၤအမဲာ်ညါ လီၫ်က၀ီၤကမျၢၫ်လၢအကလီၫ် ဘၣ်ဃ့ၫ်ပူၤဖျဲးသးန့ၣ်လီၤ.
