လါအီကူး(၂၆)သီ,၂၀၂၄နံၣ်
ပံၤယီၤ-ဘ့ကလါဒ့းကီၢ်ဆၢ, ရၢၢ်ခၢၣ်ကီၢ်စဲၣ်, မီၣ်တီ၀့ၢ်အပူၤ သုးကီၣ်ကးအသုး တၢ်ခီၣ်ဆၢအလီၢ်အိၣ်တ့ၢ်ဒၣ်စှၤဖျၢၣ်လီၤ၀ံၤ တၢ်လီၢ်တဖၣ်အံၤစ့ၢ်ကီး ရၢၢ်ခၢၣ်သုးမုၣ်ဒိၣ်(AA)ဒုး၀ဲအဃိ တယံၤတမီၢ်ဘၣ်ဒီး တၢ်ကပၢဆှၢန့ၢ်ကွံၥ်ခဲလၢၥ်လီၤအဂ့ၢ် AAထုးထီၣ်ပၥ်ဖျါဃၣ်၀ဲဖဲ လါအီကူး(၂၄)သီအနံၤန့ၣ်လီၤ.
စးထီၣ်ဖဲလၢလါအီကူး(၄)သီအနံၤန့ၣ် တၢ်ထီၣ်ဒုး၀ဲ၀့ၢ်မီၣ်တီ၀ံၤ မ့မ့ၢ်သုးကီၣ်ကးအသုးကလၢၤလၢအိၣ်ဖဲမီၣ်တီ၀့ၢ်အကပၤတဖၣ်တခီ တၢ်စးထီၣ်ဒုး၀ဲဖဲအပူၤကွံၥ်(၃)လါလံၤလံၤန့ၣ်လီၤ.
လၢကတီၢ်ခဲအံၤ တၢ်ထီၣ်ဒုး၀ဲသုးကီၣ်ကးအသုးတၢ်ခီၣ်ဆၢအလီၢ်လၢအိၣ်တ့ၢ်တဖၣ်အဃိ တၢ်ထီၣ်ဒုး၀့ၢ်မီၣ်တီတၢ်ဒုးအံၤ ဆူၣ်ထီၣ်ဒံးအဖၢမုၢ်လီၤအဂ့ၢ် AA တဲ၀ဲန့ၣ်လီၤ.
တကးဘၣ် ဖဲလၢ ကၠ့ၣ်နလံး(ကျိန္တလီ),မီၣ်ရွ့ၣ်လ့(မောင်ရွှေလေး၊), ကွ့၀ဲ(ကွင်းဝိုင်း)ဟီၣ်က၀ီၤတဖၣ်အပူၤစ့ၢ်ကီး တၢ်ဒုးဆူၣ်၀ဲ၀ံၤ သုးကီၣ်ကးတပၤခီၣ်ဆၢဒုးစၢၤ၀ဲလၢ ခိသုး,ထံသုးဒီး ကလံၤသုးတဖၣ်အဃိ တၢ်ဒုးတဖၣ်ဆူၣ်ထီၣ်၀ဲအဂ့ၢ် စံး၀ဲန့ၣ်လီၤ.
လၢရၢၢ်ခၢၣ်ကီၢ်စဲၣ်အပူၤ, သုးကီၣ်ကးဒီး AAအဘၢၣ်စၢၤ တၢ်ဒုး (၉)လါဘျဲၣ်အတီၢ်ပူၤ AA ထီၣ်ဒုးမၤန့ၢ်ဃၣ်၀ဲ ကီၢ်ဆၣ်(၉)ဘ့ၣ်ဒီး ခၠီကီၢ်စဲၣ်ပူၤ ပလဲး၀းကီၢ်ဆၣ်တဖၣ်န့ၣ်လီၤ.
