လါအီကူး(၂၆)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူပျၥ်ယၥ်, ၀ီရ့ၣ်ဟီၣ်က၀ီၤ, လၢၢ်ကတံၤ(သံဖြူဇရပ်)-ဃိၣ်သၢဖျၢၣ်ကျဲမုၢ်ဖးဒိၣ်အဖီခိၣ် အနါကွ့သုးတၢ်တိၥ်ကျၢၤသုးကလၢၤအပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA),သုးပၥ်ဖှိၣ်တဖၣ် ဒီးသုးကီၣ်ကးအဘၢၣ်စၢၤ တၢ်ဒုးကဲထီၣ်သးယံၤထီၣ်လံ (၂)နွံအတီၢ်ပူၤလံန့ၣ်လီၤ.
(KNLA)ဒီးသုးပၥ်ဖှိၣ်တဖၣ် လဲၤနုၥ်လီၤဒုး၀ဲ သုးကီၣ်ကးအသုးကလၢၤလၢအိၣ်ဆီလီၤသးဖဲ ဃိၣ်ထၣ်၀့ၢ်(၀့ၢ်မီၣ်လမၠဲၣ်), မုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ်အစုတီၤဖီလၥ် အနါကွ့သုးတၢ်တိၥ်ကျၢၤသုးကလၢၤအဂ့ၢ် ပှၤလၢသ့ၣ်ညါသုးဂ့ၢ်၀ီတၢ်အိၣ်သးတဖၣ်တဲ၀ဲန့ၣ်လီၤ.
သုးကီၣ်ကးတပၤ အသုးတၢ်တိၥ်ကျၢၤသုးကလၢၤသုတလီၤအဂီၢ် ခးလီၤကျိဖးဒိၣ်တဖၣ်ဒီး ဟဲခးလီၤတၢ်လၢကလံၤကျါ တုၤလါအီကူး(၂၅)သီအနံၤအဂ့ၢ် သ၀ီဖိတဂၤတဲပၥ်ဂၢၢ်ပၥ်ကျၢၤ၀ဲန့ၣ်လီၤ.
“မ့မ့ၢ် ဖဲလါအီကူး(၂၄)အနံၤန့ၣ် ခးလီၤ၀ဲဒီတနံၤလီၤ. တုၤလါအီကူး(၂၅)သီ, ဂီၤအဆၢကတီၢ်စ့ၢ်ကီး တၢ်နၢ်ဟူဘၣ် ကျိဖးဒိၣ်အကလုၥ်တဖၣ်လီၤ. တနွံညါအံၤအတီၢ်ပူၤန့ၣ် ခးလီၤအါထီၣ်အါထီၣ်လီၤ”အဂ့ၢ်အ၀ဲတဲ၀ဲန့ၣ်လီၤ.
တကးဘၣ် ဖဲလါအီကူး(၂၄)သီအနံၤစ့ၢ်ကီး သုးကီၣ်ကးဒီးတၢ်ပၢၢ်ဆၢသုးပၥ်ဖှိၣ်တဖၣ်အဘၢၣ်စၢၤ တၢ်ဘၣ်သဂၢၢ်ခးလိၥ်သးတဖၣ်ကဲထီၣ်တ့ၢ်သးဖဲ လိးရှါသ၀ီ(လွှတ်ရှမ်း)အဂ့ၢ် လီၢ်က၀ီၤဖိတဂၤ စံး၀ဲန့ၣ်လီၤ.
သုးကီၣ်ကးအံၤ အနါကွ့သုးတၢ်တိၥ်ကျၢၤသုးကလၢၤ ဒီးလိးရှါသုးကလၢၤ(လွှတ်ရှမ်းကျေးရွာ)သုတလီၤအဂီၢ် စးထီၣ်ဖဲလါအီကူး(၁၉)သီအနံၤန့ၣ် ခီၣ်ဆၢဒုးစၢၤ၀ဲလၢကလံၤကျါဆူၣ်ဆူၣ်ကလၢၢ်လီၤအဂ့ၢ် ပှၤလၢအသ့ၣ်ညါသုးဂ့ၢ်၀ီတၢ်အိၣ်သးတဂၤ စံး၀ဲန့ၣ်လီၤ. ခးစၢၤ၀ဲစ့ၢ်ကီးလၢ ကျိဖးဒိၣ်တဖၣ်လၢ ၀့ၢ်လၢၢ်ကတံၤသုးရ့ၣ်အဂ့ၢ် စံး၀ဲန့ၣ်လီၤ.
(KNLA)ဒီးသုးပၥ်ဖှိၣ်တဖၣ် ကးတံၥ်က၀ီၤဒုး၀ဲ အနါကွ့သုးတၢ်တိၥ်ကျၢၤသုးကလၢၤအဃိ သုးကီၣ်ကးတပၤ ဘၣ်ဟဲဆှၢန့ၢ်တၢ်အီၣ်တၢ်အီဒီး ကျိချံပှၥ်သၣ်တဖၣ်လၢ ကလံၤကျါလီၤအဂ့ၢ် စံး၀ဲန့ၣ်လီၤ.
လိးရှါသုးကလၢၤအံၤ မ့ၢ်သုးကလၢၤတဖျၢၣ်လၢ အပူၤကွံၥ် (KNLA)သုးရ့ၣ်(၁၆)ဟီၣ်က၀ီၤ တၢ်ဘံၣ်တၢ်ဘၢသုးကလၢၤတဖျၢၣ်၀ံၤ ဖဲလၢ၂၀၂၁နံၣ်သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ သုးကီၣ်ကးအသုးနုၥ်လီၤဟံးန့ၢ်ဆီၣ်လီၤပၥ်သးအဃိ တၢ်ခးလိၥ်သးတဖၣ်ကဲထီၣ်၀ဲခဲအံၤခဲအံၤအဂ့ၢ် လီၢ်က၀ီၤတၢ်ကစီၣ်တဖၣ် ပၥ်ဖျါဃၣ်၀ဲန့ၣ်လီၤ.
တၢ်ဒုးတဖၣ်အဃိ အနါကွ့ဒီးလိးရှါသ၀ီပၥ်ဃုၥ် သ၀ီတစှၤန့ၢ်(၄)ဖျၢၣ်အပူၤ လီၢ်က၀ီၤကမျၢၢ်လၢ အကထိတဖၣ် ဘၣ်ဃ့ၢ်ပူၤဖျဲးသးအဂ့ၢ် ပှၤလၢသ့ၣ်ညါဟီၣ်ခိၣ်မဲၥ်ဖံးခိၣ်တၢ်အိၣ်သးတဖၣ် စံး၀ဲန့ၣ်လီၤ.
Ref: BBC
