လါအီကူး(၂၀)သီ,၂၀၂၄နံၣ်
သုး၀ဲၤဒၢး လၢအိၣ်ဖဲန့ၣ်ပၠံၣ်တီၣ်, ခိသုးဒုးယၤဂ့ၫ်၀ီ၀ဲၤကျိၤန့ၣ် သုးရိၣ်မဲခိၣ်ကျၢၫ်ခံစိ၀့ လၢအ၀ဲၤဒၢးအိၣ်တကထၢဃီဒီး သုးကီၣ်ကးအခိၣ်မ့အီၣ်လဲၣ်အ၀ဲၤဒၢးန့ၣ် ဘၣ်တၫ်သုးကွံာ်အလီၫ်ဆူ တၫ်ဖီလာ်တကထၢတကတီၫ်ဃီ ကီၫ်ခိၣ်အိၣ်ဟံၣ် အပူၤကွံာ်ပှၤကူၣ်လိာ်တၢၣ်ပီၣ်တၫ် ဒီၣ်အီၣ်ဆါစူးကၠံၣ်အ၀ဲၤဒၢးလၢ သုးရိၣ်မဲခိၣ်ကျၢၫ်ခံ ဟံးန့ၫ်ဃာ်၀ဲစ့ၫ်ကီး တၫ်ဆီတလဲက့ၤဆူ ကီၫ်ခိၣ်(၂)၀ဲၤဒၢးအဂ့ၫ် သုးဂ့ၫ်ခီၣ်ထံးတၫ်ကစီၣ်တဖၣ်တဲ၀ဲလီၤ.
တၫ်မၤအသးအံၤ သုးကီၣ်ကးအခိၣ် မ့အီၣ်လဲၣ်န့ၣ် ဖဲလါအီကူး(၁၅)သီနံၤန့ၣ် သုးထီထီၣ်န့ၫ်၀ဲ သုးခိၣ်ကျၢၫ်ဒိၣ်စိညိၣ်စီ, သုးခိၣ်ကျၢၫ်ဒိၣ်စိ အီၣ်လ့ဒွ့ဒီးသုးခိၣ်ကျၢၫ်ဒိၣ်စိ ယဲ၀့အူ တဖၣ်ဒ်သုးခိၣ်ကျၢၫ်ဒိၣ်စိလီၫ်လၤ၀ံၤအလီၫ်ခံ ဟဲကဲထီၣ်၀ဲဒ်သိးအံၤန့ၣ်လီၤ.
တၫ်န့ၣ်အဃိ သုးတၫ်ပၢတၫ်ပြးအပူၤ သုးကီၣ်ကးအခိၣ်မ့အီၣ်လဲၣ်န့ၣ် အပှၤလၢနာ်န့ၫ်၀ဲတဖၣ် ဟ့ၣ်၀ဲတၫ်စိတၫ်ကမီၤ၀ံၤ သုးရိၣ်မဲခိၣ်ကျၢၫ်ခံစိ၀့အမူဒါတၫ်ဖံးတၫ်မၤတဖၣ် တၫ်မၤလီၤကဆှၣ်ကွံာ်ဧါန့ၣ် ကဲထီၣ်တၫ်သံကွၫ်န့ၣ်လီၤ.
တၫ်ပၢၫ်ဆၢကလုာ်ဒူၣ်ဖီၣ်စုက၀ဲၤ လၢထီဒါသုးဟံးန့ၫ်ဆူၣ်ထံကီၫ်တၫ်စိတၫ်ကမီၤ အတၫ်ဒုးတဖၣ်အပူၤ သုးကီၣ်ကးအသုးဘၣ်ပာ်တ့ၫ်ကွံာ်သုးကလၢၤတဖၣ်အဃိ ပှၤဆီၣ်ထွဲသုးတဖၣ် စံးအၢစံးသီမ့အီၣ်လဲၣ်ဆူၣ်ထီၣ်၀ံၤ အပူၤကွံာ် ပှၤဆီၣ်ထွဲသုးမၤတၫ်ပာ်ဖျါထီၣ်တၫ်ပာ်ဒီး ဃ့ထီၣ်ဒံး၀ဲတုၤဒၣ်လဲၣ်လၢ သုးရိၣ်မဲခိၣ်ကျၢၫ်ခံစိ၀့ ကဟံးန့ၫ်မူဒါဒ် သုးရိၣ် မဲခိၣ်ကျၢၫ်အလီၫ်န့ၣ်လီၤ.
ဒ်န့ၣ်အသိး တရူးကီၫ်စ့ၫ်ကီး စးထီၣ်လၢ မ့အီၣ်လဲၣ်ဟံးန့ၫ်တၫ်စိတၫ်ကမီၤလံၤလံၤ တကွဲမုာ်၀ဲနီတဘျီဘၣ်ဆၣ် ဖဲ၂၀၂၄နံၣ် လါယူၤလံအပူၤ ရှၣ်ဟဲ(ရှန်ဟိုင်း)တၫ်ပာ်ဖှိၣ်မၤသကိးတၫ်ကရၢ အလွဲၫ်လါတၫ်လဲၤထီၣ်လဲၤထီဖိၣ်ရၣ် (SCO) သုးရိၣ်မဲခိၣ်ကျၢၫ်ခံကလဲၤထီၣ်ဘၣ်အဂီၫ် ကွဲမုာ်၀ဲလီၤ.လၢအ၀ဲတချူးလဲၤ၀ဲတနွံန့ၣ် ကီၫ်ခိၣ်လီၫ်လံၤ အူသ့စ့ၣ် စ့ၫ်ကီး ကလဲၤထီၣ်၀ဲ တၫ်အိၣ်ဆိးသကိးလၢတၫ်မုာ်တၫ်ခုၣ်အပူၤတၫ်ဘျၢ(၅)ထံၣ် တၫ်ဘိးဘၣ်ရၤလီၤ၀ဲပှဲၤထီၣ်အနံၣ် (၇၀)နံၣ် တၫ်ရဲၣ်တၫ်ကျဲၤမူးအဂီၫ် တရူးကွဲမုာ်၀ဲ၀ံၤ ကဒုးအိၣ်ထီၣ်တၫ်ဘၢၣ်စၢၤပဒိၣ်အဂီၫ် ဆီၣ်တခူထီၣ်၀ဲအဂ့ၫ် တၫ်ကစီၣ်ဟးထီၣ်၀ဲလီၤ.
သုးရိၣ်မဲခိၣ်ကျၢၫ်ခံစိ၀့အ၀ဲၤဒၢးဘၣ်တၫ်သုးကွံာ်အလီၫ်ဒ်သိးအံၤန့ၣ် သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ ကီၣ်ကးကရၢဖိတဖၣ် အဘၢၣ်စၢၤ တၫ်ဟံးန့ၫ်ကဒါက့ၤတၫ်စိတၫ်ကမီၤတဆီ တၫ်သီၣ်၀ံသဲကလၤ တၫ်ကစီၣ်တဖၣ် ရၤလီၤအသး၀ံၤ ဟဲအိၣ်ထီၣ်၀ဲလီၤ.
Ref: The Irrawaddy
