လါအီကၢး(၇)သီ,၂၀၂၄နံၣ်
လၢကီၢ်ဘ့ကလါဒ့းရှ်တၢ်ပၥ်ဖျါထီၣ်တၢ်ပၥ်သးတဖၣ်ဆူၣ်ထီၣ်၀ံၤအလီၢ်ခံကိတိၥ်ခိၣ်ကျၢၢ်ရှ့းဟၣ်စံၣ်နၣ် (ရှိတ်ဟာစီနာ)လၢအပၢ၀ဲထံကီၢ်လၢတၢ်ဆၢကတီၢ်ယံၤယံၤအံၤဟးထီၣ်လၢမူဒါဒီးဃ့ၢ်ဟးထီၣ်ကွံၥ်၀ဲလၢထံကီၢ်၀ံၤအလီၢ်ခံထံကီၢ်အံၤသုးမုၢ်ဒိၣ်ပၢဆှၢဃၣ်၀ဲ၀ံၤတၢ်ကဒုးအိၣ်ထီၣ်တၢ်ဘၢၣ်စၤပဒိၣ်အဂ့ၢ်သုးမုၢ်ဒိၣ်ခိၣ်နၢ်ဒိၣ်ထီတဖၣ်အၢၣ်လီၤ၀ဲန့ၣ်လီၤ.
“ထံကီၢ်န့ၣ်ကွၢ်ဆၢၣ်မဲၥ်ဘၣ်တၢ်နးတၢ်ဖှိၣ်ဒိၣ်မးလံ. မုၥ်ကျိၤ၀ဲၤကွၢ်စ့ၢ်ကီးလီၤ၀ဲလီၤ. ပှၤအါအါဂီၢ်ဂီၢ်သံတ့ၢ်လံ.တၢ်ဆၢကတီၢ်တုၤဃီၤလၢတၢ်ကမၤပတုၥ်ကွံၥ် တၢ်မၤပျိၢ်မၤဂီၤတဖၣ်လံ”အဂ့ၢ် ကီၢ်ဘ့ကလါဒ့းရှ် သုးမုၢ်ဒိၣ်ခိၣ်နၢ်ဒိၣ်ထီ သုးခိၣ်ကျၢၢ်ဒိၣ်စိ Waker-Uz-Zaman တဲလီၤ၀ဲဖဲ ကွဲၤဟူဖျါအပူၤန့ၣ်လီၤ.
တၢ်ထီဒါပဒိၣ်တၢ်ပၥ်ဖျါထီၣ်တၢ်ပၥ်သးတဖၣ်အပူၤ တၢ်ကမၤလီၤပှီၢ်ကွံၥ်ပှၤပၥ်ဖျါထီၣ်တၢ်ပၥ်သးတဖၣ်အဂီၢ် သူ၀ဲပၢၤကီၢ်ဒီးတၢ်ဘံၣ်တၢ်ဘၢတဖၣ်အါအါဂီၢ်ဂီၢ်အဃိ ပှၤဘူးထီၣ်(၃)ကယၤသံတ့ၢ်၀ဲဘၣ်ဆၣ် ဖဲမဟါအနံၤန့ၣ် ပှၤပၥ်ဖျါထီၣ်တၢ်ပၥ်သးတဖၣ်လဲၤနုၥ်လီၤ၀ဲဆူ ကိတိၥ်ခိၣ်ကျၢၢ်အဟံၣ်၀ံၤအလီၢ်ခံ ရှ့းဟၣ်စံၣ်နၣ်ဟးထီၣ်လၢမူဒါ၀ံၤ ဃ့ၢ်ဟးထီၣ်၀ဲဆူကီၢ်ချၢန့ၣ်လီၤ.
သုးမုၢ်ဒိၣ်ခိၣ်နၢ်ဒိၣ်ထီ တဲလီၤ၀ဲလၢတၢ်ကဒုးအိၣ်ထီၣ်တၢ်ဘၢၣ်စၢၤပဒိၣ်၀ံၤအလီၢ်ခံ ဘ့ကလါဒ့းရှ်ကမျၢၢ်လၢအကကွဲၢ်တဖၣ် ဟးထီၣ်လၢကျဲမုၢ်ဒီးမၤလၤကပီၤ၀ဲတၢ်မၤနၢၤန့ၣ်လီၤ.
“ပထံကီၢ်ထူၣ်ဖျဲးထီၣ်လံအဃိ ပသးခူဒိၣ်မးလီၤ.အဂ့ၢ် သးနံၣ်(၂၁)အိၣ် ဆၣ်စ့းအၣ်နဲး(ဆာဇိဒ်အာနက်ဖ်)တဲ၀ဲလီၤ. တၢ်ဂ့ၢ်အံၤ ထိၣ်သတြီၤတဲ၀ဲလၢ တၢ်ဟံးန့ၢ်တၢ်သဘျ့လၢကီၢ်ပၣ်က့ၣ်စတၣ်၀ံၤ တၢ်ထူၣ်ဖျဲးထီၣ်လၢမီၤစိရိၤအစုပူၤဖဲ ၁၉၇၁နံၣ်ဒီးအခဲအံၤ(၂၀၂၄)နံၣ်အပူၤ တၢ်ထံၣ်ဘၣ်၀ဲအံၤန့ၣ်မ့ၢ်ကီၢ်ဘ့ကလါဒ့းရှ်တၢ်ထူၣ်ဖျဲးအဂီၢ် တၢ်ဟူးဂဲၤလီၤအဂ့ၢ် အ၀ဲတဲ၀ဲန့ၣ်လီၤ.
ဖဲမဟါအနံၤန့ၣ်ပှၤလၢပၥ်ဖျါထီၣ်တၢ်ပၥ်သးတဖၣ်အံၤလဲၤနုၥ်လီၤ၀ဲဆူပဒိၣ်ပၣ်လံၣ်မၣ်ဒီးကွဲၤဟူဖျါ၀ဲၤကျိၤတဖၣ်၀ံၤ ကိတိၥ်ိခၣ်ကျၢၢ်အပၢ်တၢ်ဂီၤကျီၤတဖၣ်စ့ၢ်ကီး တၢ်မၤဟးဂီၤကွံၥ်၀ံၤ ပှၤထီဒါပဒိၣ်တဖၣ်တကးဘၣ် တၢ်သဘုၣ်သဘူၣ်ကဲထီၣ်သးလၢဒီးပၢၤကီၢ်အဘၢၣ်စၢၤအဃိ ထဲဒၣ်ဖဲမဟါတသီအနံၤန့ၣ် ပှၤ(၆၀)ဂၤဘျဲၣ်သံတ့ၢ်၀ဲန့ၣ်လီၤ.
Ref: AFP
