လါယူၤလံ(၂၄)သီ, ၂၀၂၄နံၣ်
သုးကီၣ်ကးအသုးလၢအိၣ်ဆီၤလီၤပၥ်သးဖဲ၀့ၢ်လါရှိအကပၤတဖၣ်အပူၤ သုးကီၣ်ကးအသုးခိၣ်ဒိၣ်ဂီၢ်ဂ့ၢ်(၁)ဂၤပၥ်ဃုၥ်အပှၤသုးဖိ(၃၀၀)ဘျဲၣ် ဟဲပၥ်လီၤစုက၀ဲၤအဂ့ၢ် MNDAAထုးထီၣ်ပၥ်ဖျါဃၣ်၀ဲ ဖဲလါယူၤလံ(၂၃)သီအနံၤန့ၣ်လီၤ.
သုးခိၣ်ဒိၣ်ဂီၢ်ဂ့ၢ်(၁)ဂၤ,သုးခိၣ်ဒိၣ်ဖိ(၂)ဂၤ,သုးခိၣ်စိ(၅)ဂၤ ဒီးသုးဖိခဲလၢၥ်ပၥ်ဖှိၣ်(၃၁၇)ဂၤအံၤ ဖဲလၢလါယူၤလံ(၂၁)သီအနံၤ ဂီၤ(၁၀)နၣ်ရံၣ်အဆၢကတီၢ်န့ၣ် ဟဲပၥ်လီၤစုက၀ဲၤအဂ့ၢ်ထုးထီၣ်ပၥ်ဖျါဃၣ်၀ဲန့ၣ်လီၤ.
သုးကီၣ်ကးအသုးလၢ ဟဲပၥ်လီၤစုက၀ဲၤအံၤန့ၣ် မ့ၢ်၀ဲသုးကီၣ်ကးအသုး သုးတြိၤ(၇၇)တၢ်ပနီၣ်အဂ့ၢ်န့ၣ် တၢ်ထံၣ်ဘၣ်၀ဲလၢ MNDAAပၥ်ဖျါထီၣ်တၢ်ဂီၤမူအပူၤန့ၣ်လီၤ. တကးဒံးဘၣ် ဖဲလၢတၢ်ဂီၤအပူၤတဲ၀ဲစ့ၢ်ကီးလၢ တၢ်မ့ၢ်တဲကရၢကရိန့ၢ် သုးကီၣ်ကးအပှၤသုးဖိလၢအိၣ်တ့ၢ်တဖၣ်န့ၣ် တၢ်ကဟ့ၣ်တၢ်လၤကပီၤအဂ့ၢ်စ့ၢ်ကီးစံး၀ဲန့ၣ်လီၤ.
MNDAA အထံရူၢ်ကီၢ်သဲး၀ဲၤကျိၤ တၢ်မဲၥ်ညါတၢ်မၤကရၢအံၤ လဲၤတူၢ်လိၥ်မုၥ်၀ဲ ပှၤလၢဟဲပၥ်လီၤစုက၀ဲၤတဖၣ်၀ံၤ ပှၤလၢဟဲပၥ်လီၤစုက၀ဲၤတဂၤလၢ်လၢ် တၢ်ဘံၣ်တၢ်ဘၢအဂီၢ် အုၣ်ကီၤ၀ဲအဂ့ၢ်စ့ၢ်ကီးတၢ်သ့ၣ်ညါဘၣ်န့ၣ်လီၤ.
တၢ်အုၣ်ကီၤန့ၢ် ပှၤလၢဟဲပၥ်လီၤစုက၀ဲၤတဂၤလၢ်လၢ်တၢ်ဘံၣ်တၢ်ဘၢအဂီၢ် တကးဒံးဘၣ် တၢ်ကူစါယါဘျါန့ၢ်၀ဲ ပှၤဘၣ်ဒိဘၣ်ထံးတဖၣ်အဂ့ၢ်စ့ၢ်ကီး MNDAAစံး၀ဲန့ၣ်လီၤ.
ဖဲအပူၤကွံၥ် လါယူၤလံ(၁၄)သီအနံၤန့ၣ် MNDAAဘိးဘၣ်ရၤလီၤ၀ဲလၢ တၢ်မ့ၢ်ဟဲပၥ်လီၤစုက၀ဲၤန့ၣ် တၢ်ကဟ့ၣ်တၢ်လၤကပီၤအသိး သုးဖိယိယိ(၁)ဂၤန့ၣ် အကလီၤ(၁၀) ကၠး, စုက၀ဲၤမ့ၢ်ပၥ်န့ၢ် (၁၅)ကလီၤကၠး, သုးခိၣ်ဖိဒီးသုးခိၣ်စိန့ၣ် အကလီၤ(၂၀)ကၠး, စုက၀ဲၤမ့ၢ်ပၥ်န့ၣ် ကၠး(၂၅)ကလီၤ, ဒီးမ့မ့ၢ် သုးခိၣ်ဒိၣ်ဖိတုၤသုးခိၣ်စိအပတီၢ်န့ၣ် အကလီၤ(၃၀)ကၠး, စုက၀ဲၤမ့ၢ်ပၥ်န့ၣ် (၃၅)ကလီၤကၠးအဂ့ၢ် စံး၀ဲန့ၣ်လီၤ.
