လါယူၤလံ(၂၄)သီအနံၤ, ၂၀၂၄နံၣ်
အ့ဒံယါ-ပယီၤကီၢ်ဆၢ ဘိၣ်ယၣ်သ၀ီ, ကီၢ်ပယီၤပှၤလီၢ်အိၣ်ကမှံၤဒဲက၀ီၤတဖၣ်အပူၤ မူခိၣ်စူၤဒိၣ်၀ံၤထံဒိၣ်ထီၣ်သတုၢ်ကလၥ်အဃိတၢ်အီၣ်တၢ်အီတဖၣ်ထံလူၤဘၢဟးဂီၤကွံၥ်၀ဲဒီးလိၣ်ဘၣ်ဂ့ၢ်ဂီၤအူတၢ်မၤစၢၤတဖၣ်အဂ့ၢ် ကရၢလၢမၤစၢၤတၢ်တဖၣ်တဲ၀ဲန့ၣ်လီၤ.
လါယူၤလံ(၂၂)သီအနံၤ, ဂီၤ(၁)နၣ်ရံၣ်ဃၣ်ဃၣ်အဆၢကတီၢ်န့ၣ် ထံတဖၣ်စးထီၣ်ဒိၣ်ထီၣ်၀ဲ၀ံၤ ပှၤလီၢ်အိၣ်ကမှံဒဲက၀ီၤတဖၣ်အပူၤဒၢး(၁၂)ဖျၢၣ်ထံလူၤဘၢကွံၥ်၀ဲ၀ံၤတၢ်အီၣ်တၢ်အီတဖၣ်ဒီးတၢ်ဖိတၢ်လံၤတနီၤဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“မူခိၣ်စူၤသတုၢ်ကလၥ်အပူၤ ဆဲးတဲးလီၤ. ထံဒိၣ်ထီၣ်တဘျီဃီအဃိ တၢ်တကတဲၥ်ကတီၤဘၣ်နီၤတမံၤဘၣ်. တၢ်အီၣ်တၢ်အီတဖၣ်ဟးဂီၤကွံၥ်ခဲလၢၥ်လီၤ. ကတီၢ်ခဲအံၤ တၢ်အီၣ်တၢ်အီအဂီၢ် ကဲထီၣ်တၢ်ကီတၢ်ခဲအဂ့ၢ်” ပှၤလၢမၤစၢၤတၢ်တဖၣ် တဲ၀ဲန့ၣ်လီၤ.
ထံဒိၣ်၀ဲဒ်အံၤအဃိ ဂံၢ်ခီၣ်ထံးတၢ်အီၣ်တၢ်အီလၢတၢ်ပၥ်ကီၤဃၣ်တဖၣ် တကးဘၣ်တၢ်သူတၢ်စွဲတၢ်ဖိတၢ်လံၤတနီၤစ့ၢ်ကီး ဟးဂီၤကွံၥ်၀ဲအဂ့ၢ် စံး၀ဲန့ၣ်လီၤ.
“ဟူသးန့ၣ် ကအိၣ်(၁၅)တီၣ်ဘျဲၣ်ညါ. လီၤအုးကွံၥ်ခဲလၢၥ်လီၤ. ထံဒိၣ်တုၤလၢသးနါပှၢ်ညါအဃိ ကတီၢ်ခဲအံၤန့ၣ် ဟူသးတဖၣ် တၢ်ဘၣ်လိက့ၤအီၤလၢမုၢ်ဒီး ကဖီၣ်အီၤအဂီၢ် တၢ်ကတဲၥ်ကတီၤ၀ဲအဂ့ၢ်” န့ၣ်အ၀ဲတဲ၀ဲန့ၣ်လီၤ.
ဖဲလၢပှၤလီၢ်အိၣ်ကမှံဒဲက၀ီၤတဖၣ်အပူၤ ဟံၣ်ခိၣ်အိၣ်၀ဲ(၅၀)ဃၣ်ဃၣ်, ပှၤနီၣ်ဂံၢ်အိၣ်(၁၀၀)ဘျဲၣ်၀ံၤ အိၣ်ဆိး၀ဲဒၣ်ဖဲ အ့ဒံယါ-ပယီၤကီၢ်ဆၢ ဟီၣ်ခိၣ်လီၤသြူးတဖၣ်အပူၤဒီး မ့ၢ်ပှၤတဖၣ်လၢအိၣ်ဖဲ စကဲကီၢ်ဒိၣ်, တမူကီၢ်ဆၣ် ပှၤဃ့ၢ်သုးပှၤလီၢ်အိၣ်ကမှံၤတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
