လါယူၤလံ(၂၄)သီ,၂၀၂၄နံၣ်
လၢတၫ်ဒုးလီၤအီၤဃိၣ်(၆)နံၣ်အပူၤ ခီဖျိလၢတၫ်ပျဲပူၤသးသမူခွဲးယာ်အဖီခိၣ် ဖဲလါအ့ဖြ့ၣ်(၁၇)သီနံၤ ဟဲက့ၤပူၤဖျဲးထီၣ် ဘၣ်ဆၣ်ပှၤလၢသုးကီၣ်ကးက့ၤဖီၣ်ကဒါက့ၤအီၤ ကခၠ့ၣ်ဘျၢထံခရံာ်ဖိကရၢခိၣ်ကျၢၫ်(KBC)ပှၤဟ့ၣ်ကူၣ်တၫ်သရၣ်ဒိၣ် ဒီးကထၢၣ်ခလၣ်ဆၣ်ဆိၣ်န့ၣ် တၫ်ပျၫ်ကွံာ်အီၤလံန့ၣ်လီၤ.
ယံာ်(၃)လါဘျဲၣ်ဒီးဖဲတနံၤအံၤမုၫ်ဆါခီအကတီၫ် ဘၣ်တၫ်ပျၫ်ကွံာ်၀ဲအဂ့ၫ် ကခၠ့ၣ်တၫ်ဆီၣ်ထွဲတၫ်မုာ်တၫ်ခုၣ်ကရၢ PCG လမဲၣ်ကိၣ်ကၠၣ်(လမိုင်ဂွန်ဂျာ)တဲ၀ဲလီၤ.”တၫ်ပျၫ်ကွံာ်အီၤန့ၣ်သ့ၣ်ညါဘၣ်လီၤ.လၢဂီၤ(၁၁)နၣ်ရံၣ်တခီန့ၣ်တၫ်ပျၫ်ကွံာ်၀ဲလီၤ.ဂ့ၤလီၤ,တၫ်အိၣ်ဆူၣ်အိၣ်ချ့စ့ၫ်ကီးဂ့ၤ၀ဲလီၤ.အခဲအံၤဒုဟံးန့ၫ်တၫ်အိၣ်ဘှံးလၢဟံၣ်န့ၣ်လီၤ.”
တၫ်ဘျၢ(၃)ခါအဖီခိၣ် KBC ပှၤပၢၤလီၫ်ဆ့ၣ်နီၤလီၫ်လံၤ ဒီးကထၢၣ်ခလၣ်ဆၣ်ဆိၣ်(ဒေါက်တာ ခလမ်ဆမ်ဆွမ်) လၢတၫ်ဒုးလီၤအီၤဃိၣ်(၆)နံၣ်အံၤ ဖဲပယီၤနံၣ်ထီၣ်သီ(၁)သီနံၤန့ၣ် ဘၣ်တၫ်ပျၫ်ကွံာ်အီၤ၀ံၤ စှၤနၣ်ရံၣ်အတီၫ်ပူၤ တၫ်လဲၤဖီၣ်ကဒီးအီၤလၢအဟံၣ်၀ံၤ တၫ်ပာ်အီၤဖဲမၠံးကၠံနါဃိၣ်န့ၣ်လီၤ.
တၫ်အံၤတမ့ၫ်တၫ်ဖီၣ်အီၤဘၣ်ဒီးကတၢၣ်ပီၣ်တဲကိးတၫ်မုာ်တၫ်ခုၣ်အဂီၫ် ဘၣ်တၫ်ကိးဃာ်အီၤအဂ့ၫ် သုးကီၣ်ကးပှၤတဲတၫ်ပၢတဲဃာ်၀ဲဘၣ်ဆၣ် တၢၣ်ပီၣ်တဲသကိးတၫ်တအိၣ်နီတမံၤဘၣ်အဂ့ၫ် ပှၤလၢအိၣ်ဘူးဒီးအီၤတဖၣ်တဲ၀ဲလီၤ.
ထံၣ်လိာ်အသးဒီး ဒီကလုာ်ဃူဖိးပဒိၣ်-ကီၫ်ခိၣ်ဒူ၀ၣ်လးရှံလးတကးဘၣ် ဟီၣ်လာ်တၫ်အိၣ်ယၢၤကိတိာ်အူတူခီၣ်ကူၣ်သ့ကိတိာ်သရၣ်မုၣ်ဒီၣ်ကၠၣ်ထွဲၣ်ပၣ်တဖၣ် ဖဲ၀့ၫ်လဲၣ်စၣ်အဃိ ဖဲ၂၀၂၃နံၣ် လါယနူၤအါရံၤ(၁၁)သီနံၤ သုးခိၣ်ဒိၣ်ဖိသူၣ်အီၣ်စီၣ်လိာ်ဘၢလိာ်ကွီၫ်အီၤဖဲ၀့ၫ်မၠံးကၠံနါ ပၢၤကီၫ်၀ဲၤဒၢးအဃိ ဘၣ်တၫ်ဒုးလီၤအီၤဃိၣ်(၆)နံၣ်န့ၣ်လီၤ.
ဒီးကထၢၣ်ခလၣ်ဆၣ်ဆိၣ်န့ၣ် ဟံးန့ၫ်တ့ၫ်မူဒါဒ် KBCအနဲၣ်ရွဲၣ်ခိၣ်ကျၢၫ်ဒီးပှၤပၢၤလီၫ်ဆ့ၣ်နီၤအသိး၀ံၤ ဖဲအပူၤကွံာ်လါအီကထိဘၢၣ်အပူၤ ဘၣ်တၫ်ဃုထၢထီၣ်အီၤ ဒ်ကခၠ့ၣ်ဘျၢထံခရံာ်ဖိကရၢခိၣ်ကျၢၫ် (KBC) အပှၤဟ့ၣ်ကူၣ်တၫ်လီၤဆီအသိးန့ၣ်လီၤ.
ပှၤကလုာ်ဒူၣ်ဖိတဖၣ်အဖီခိၣ် ဘၣ်ထွဲဒီးပယီၤသုးကီၣ်ကးဆီၣ်ဘံၣ်ဆီဘၢဃာ် တၫ်ဘူၣ်တၫ်ဘါခွဲးယာ်တဖၣ် ဖဲ၂၀၁၉နံၣ်န့ၣ်အနီၫ်ကစၫ်ဒၣ်၀ဲလဲၤတီၣ်ဖျါထီၣ်၀ဲဆူ ဒီနၢၣ်ထရၢးအိၣ်ဖဲဟံၣ်၀ါန့ၣ်လီၤ. လဲၤ၀ဲဒ်သိးန့ၣ်အဃိ ဖဲန့ၣ်အကတီၫ် ပယီၤသုးကီၣ်ကးလိာ်ဘၢလိာ်ကွီၫ်အီၤဘၣ်ဆၣ် အလီၫ်ခံဘၣ်တၫ်ထုးသံကွံာ်၀ဲလီၤ.
