န့ၣ်ပၠံၣ်တီၣ် အ့ၣ်လၣ်ကလံၤသုး သုးကလၢၤတၢ်လဲၤဒုးအီၤလၢမျိၥ်သၣ်ယူၢ်

လါယူၤလံ ၁၇သီ , ၂၀၂၄နံၣ်

သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုးခိၣ်သုးနၢ်တဖၣ်အိၣ်တၢ်လီၢ်လၢအမ့ၢ် န့ၣ်ပၠံၣ်တီၣ်အ့ၣ်လၣ်ကလံၤသုး သုးကလၢၤအံၤ ဖဲလါယူၤလံ(၁၆)သီအနံၤန့ၣ် တၢ်ပၢၢ်ဆၢသုးပၥ်ဖှိၣ်တဖၣ် လဲၤဒုးအီၤလၢ(၁၇၀-မမ)မျိၥ်သၣ်ယူၢ်(၇)ဖျၢၣ်အဂ့ၢ်(MKCDF) ထုးထီၣ်ပၥ်ဖျါဃၣ်၀ဲန့ၣ်လီၤ.

“လါယူၤလံ(၁၆)သီအနံၤ, ဂီၤ(၉)နၣ်ရံၣ်ဘျဲၣ်န့ၣ် တၢ်လဲၤဒုးအီၤန့ၣ်ပၠံၣ်တီၣ်အ့ၣ်လၣ်ကလံၤသုး သုးကလၢၤလၢ (၁၇၀-မမ)မျိၥ်သၣ်ယူၢ်အပူၤ (၅)ဖျၢၣ်န့ၣ်တၢ်ခးအီၤန့ၢ်၀ဲဂ့ၤဂ့ၤလီၤအဂ့ၢ်” စံး၀ဲန့ၣ်လီၤ.

တၢ်လဲၤဒုးအီၤန့ၣ်ပၠံၣ်တီၣ်အ့ၣ်လၣ်သုးကလၢၤအပူၤ တၢ်သူၣ်ထီၣ်(၄)ဖျၢၣ်, တၢ်ပၥ်ကီၤစုက၀ဲၤဒၢး(၁)ဖျၢၣ်, တၢ်ပၥ်ကီၤတၢ်ဘှီဘၣ်က့ၤကဘီယူၤတၢ်ပီးတၢ်လီဒၢးဟးဂီၤကွံၥ်၀ဲ,ကလံၤသုးလီၢ်လၤအိၣ်(၄)ဂၤဒီးကလံၤသုးအပှၤသုးဖိ(၁၂)ဂၤသံ၀ဲအဂ့ၢ်ပၥ်ဖျါဃၣ်၀ဲန့ၣ်လီၤ.

တကဒံးဘၣ် A-5 Bomber Jet Fighterတခိၣ်ဟးဂီၤကွံၥ်၀ဲ, Jet Fighterတခိၣ်အခိၣ်ဟးဂီၤကွံၥ်၀ဲ, Y-12 Military transport Aircraft တခိၣ်ဟးဂီၤကွံၥ်၀ဲအသိး ကလံၤသုးလီၢ်လၤအိၣ်(၃)ဂၤဒီးပှၤ(၇)ဂၤစ့ၢ်ကီး လီၢ်မၣ်ကွံၥ်၀ဲအဂ့ၢ်ပၥ်ဖျါဃၣ်၀ဲန့ၣ်လီၤ.

န့ၣ်ပၠံၣ်တီၣ်အ့ၣ်လၣ်ကလံၤသုး သုးကလၢၤအံၤ တၢ်ပၥ်လီၤဃၣ်တၢ်ဘံၣ်တၢ်ဘၢဃံးဃံးစ့ၢ်စ့ၢ်ဒီး မ့ၢ်စ့ၢ်ကီးပတီၢ်ထီကဘီယူၤသန့ၤတခါ၀ံၤ မ့ၢ်စ့ၢ်ကီးကဘီယူၤသန့ၤတခါလၢအမၤသံမၤ၀ီ ကီၢ်ကရ့ၣ်နံၣ်ဒီးကညီကီၢ်စဲၣ်ပၥ်ဃုၥ် ထံကီၢ်ဒီတဘ့ၣ်အပူၤလီၢ်က၀ီၤကမျၢၢ်တဖၣ် ဒီးတၢ်ပၢၢ်ဆၢသုးတဖၣ်အဂ့ၢ်စံး၀ဲန့ၣ်လီၤ.

စးထီၣ်လၢ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ Mountain Knights Civilian Defense Force(MKCDF), Mercury Revolution Force(MRF), Brave Warriors for Myanmar(BWM)တဖၣ်ပၥ်ဖှိၣ်ထီၣ်အသး၀ံၤ လဲၤဒုး၀ဲန့ၣ်ပၠံၣ်တီၣ်အ့ၣ်လၣ်ကလံၤသုး သုးကလၢၤအံၤအိၣ်ထီၣ်၀ဲ (၅)ဘျီဃၣ်ဃၣ်လံန့ၣ်လီၤ.