လါယူၤလံ ၁၆သီ, ၂၀၂၄နံၣ်
ဖဲလါယူၤလံ(၆)သီအနံၤ, ဟါ(၂း၃၀)နၣ်ရံၣ်အဆၢကတီၢ် သုးကီၣ်ကးအသုးလၢအိၣ်ဆီလီၤအသး ဖဲ၀့ၢ်ကၠဲးထိၣ် သုးတြီၤ-၄၄, ၀ၣ်ကလီ(ဝန်ကလော)ဒီးက့မိစခါ(ကင်းမွန်းစခန်း)တဖၣ် ခးလီၤ(၁၂၀-မမ)ကျိဖးဒိၣ်(၃)ဖျၢၣ်ဆူ ကီၢ်ရ့ၣ်ဒူသထူၣ်, ကၠဲးထိၣ်ကီၢ်ဆၣ်, ငပၠီတီကရူၢ်, ငပၠီတီရှါပဲ(ငပျောတောရှမ်းပိုင်း)အပူၤအဃိ ကၠိဖိ(၄)ဂၤပၥ်ဃုၥ်(၆)ဂၤဘၣ်ဒိ၀ဲအဂ့ၢ် တၢ်သ့ၣ်ညါဘၣ်လၢ ဂံၢ်ခီၣ်ထံးတၢ်ကစီၣ်အအိၣ်န့ၣ်လီၤ.
“သုးကီၣ်ကးခးလီၤကျိဖးဒိၣ်ဆူ ဒူသ၀ီတဖၣ်အပူၤ ကိးမုၢ်နံၤဃၣ်ဃၣ်လီၤ. အပူၤကွံၥ်အနၤန့ၣ် ခးလီၤ(၃)ဖျၢၣ်(၄)ဖျၢၣ်ညါ. ခဲအံၤန့ၣ် မုၢ်ဆါခီတပၤစ့ၢ်ကီးခး၀ဲလီၤ. လီၢ်က၀ီၤဖိအါတက့ၢ်န့ၣ် လဲၤမၤတၢ်၀ံၤဟဲက့ၤလၢဟံၣ်အဆၢကတီၢ် ဘၣ်ဒိ၀ဲအဂ့ၢ်” ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
ကၠိဖိ(၄)ဂၤပၥ်ဃုၥ်ပှၤ(၆)ဂၤလၢဘၣ်ဒိဒီး ကျိဖးဒိၣ်တဖၣ်အံၤ တၢ်လဲၤကူစါယါဖျါအသးဖဲ ညီၣ်ထီးရှါစူး(ညောင်ထောက်ရှမ်းစု)တၢ်ဆါဟံၣ်အဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
ခီဖျိလၢသုးကီၣ်ကး ခးလီၤကျိဖးဒိၣ် ကိးမုၢ်နံၤဃၣ်ဃၣ်အဃိ ကၠဲးထိၣ်ကီၢ်ဆၣ်, ငပၠီတီကရူၢ်အပူၤ သ၀ီ(၃)ဖျၢၣ်အမ့ၢ် ငပၠီတီဆီးရှါပဲ(ငပျောတောဆော့ရှမ်းပိုင်း)သ၀ီ, စံကိ(ဇီးကုန်း)သ၀ီဒီး ပတီးတီ(ပတောက်တော)သ၀ီတဖၣ်အပူၤ ဒူသ၀ီကမျၢၢ်တဖၣ်ဘၣ်ဃ့ၢ်ပူၤဖျဲးအသးန့ၣ်လီၤ.
မ့မ့ၢ်လၢ သုးကီၣ်ကးအသုးကျိၤတဖၣ် မ့ၢ်ဟဲလီၤန့ၣ် ဘၣ်ဃ့ၢ်ပူၤဖျဲးသးသ၀ီခဲလၢၥ်လီၤအဂ့ၢ် စံး၀ဲန့ၣ်လီၤ.ဒူသ၀ီလီၢ်က၀ီၤကမျၢၢ်တဖၣ်လၢ ဘၣ်ဃ့ၢ်ပူၤဖျဲးသးတဖၣ်အံၤ ဘၣ်လဲၤဃ့ၢ်အိၣ်ကဒုအသး ဖဲသီခါဖၠၣ်တဖၣ်န့ၣ်လီၤ.
ဒ်န့ၣ်အသိး ဖဲလါယူၤလံ(၆)သီအနံၤန့ၣ် ခီဖျိလၢသုးကီၣ်ကးခးလီၤကျိဖးဒိၣ်တဖၣ်ဆူ သထူၣ်ကီၢ်ဆၣ်ပူၤအဃိ လီၢ်က၀ီၤကမျၢၢ်အိၣ်ဟံၣ်(၆)ဖျၢၣ် ဒီးတၢ်ဘူၣ်တၢ်ဘါတၢ်သူထီၣ်(၁)ဖျၢၣ်, မီၣ်တီၣ်တုၤ(၁)ခိၣ်ဟးဂီၤတ့ၢ်၀ဲအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးဘိးဘၣ်ပၥ်ဖျါဃၣ်၀ဲန့ၣ်လီၤ.
