၁၀.၇.၂၀၂၄
လၢ၀့ၫ်တကူၣ်ကီၫ်ဒိၣ်, တၫ်ဆါဟံၣ်တဖၣ်အပူၤ ထဲဒၣ်လါယူၤလံ(၈)သီတနံၤဃီအတီၫ်ပူၤန့ၣ် ခီဖျိလၢဟၢဖၢလူတၫ်ဆါအဃိ ပှၤဆါအသီလၢလဲၤထီၣ်တၫ်ဆါဟံၣ်အိၣ်ထီၣ်တုၤ(၆)ဂၤအဃိ (၃)သီအတီၫ်ပူၤ ပှၤဘၣ်လဲၤထီၣ်တၫ်ဆါဟံၣ်အိၣ်ထီၣ်တုၤ(၁၆၇)ဂၤန့ၣ်လီၤ.
ခီဖျိလၢဟၢဖၢလူတၫ်ဆါအဃိ ဖဲလါယူၤ(၇)သီအနံၤန့ၣ် ပှၤဆါ(၄၄)ဂၤဒီး လါယူၤ(၆)သီအနံၤန့ၣ် ပှၤဆါ(၆၃)ဂၤ လဲၤထီၣ်တၫ်ဆါဟံၣ်ဘၣ်လဲၤကူစါယါဘျါအသးန့ၣ်လီၤ.
စဲးဖီကဟၣ်တၫ်မၤလီၫ်, တၫ်သိၣ်လိကၠိတဖၣ်, သီခါဖၠၣ်တဖၣ် ဒ်သိးလၢကမျၢၫ်အိၣ်အါတၫ်လီၫ်တဖၣ်အပူၤ ဟၢဖၢလူတၫ်ဆါသူတဘၣ်ကူဘၣ်ဂၫ်အါထီၣ်အဂီၫ် တၫ်ဂုာ်ကျဲးစၢးမၤ၀ဲအဂ့ၫ် ဆူၣ်ချ့ကိတိာ်၀ဲၤကျိၤတဲ၀ဲန့ၣ်လီၤ.
၀့ၫ်တကူၣ်ကီၫ်ဒိၣ်အပူၤ မ့မ့ၫ်လၢ ဒီပိၣ်ကီၫ်ဆၣ်အပူၤ တၫ်ပၢၤအီၤတၫ်ဆါတၫ်ဘၣ်ကူဘၣ်ဂၫ်န့ၫ်၀ဲ၀ံၤ မ့မ့ၫ်လၢသၣ်က့ၣ်တၣ်ကီၫ်ဆၣ်ပူၤတခီ တၫ်ဆါတၫ်ဘၣ်ကူဘၣ်ဂၫ်တဖၣ်လီၤစှၤလီၤလံအဂ့ၫ် စံး၀ဲန့ၣ်လီၤ.
ခီဖျိလၢ ဟၢဖၢလူတၫ်ဆါအဃိ လၢ၀့ၫ်တကူၣ်တၫ်ဆါဟံၣ်တဖၣ် ဆါလီၤန့ၫ်အံသၣ်ထံဘၢအဘိၣ် အပှ့ၤတဖၣ်ဒိၣ်ထီၣ်၀ဲအဂ့ၫ် ကမျၢၫ်လၢအိၣ်ဖဲ၀့ၫ်တကူၣ်တဂၤတဲ၀ဲန့ၣ်လီၤ.
“အံၣ်သၣ်ဘၢထံအဘိၣ်တဖၣ် အပှ့ၤဒိၣ်ထီၣ်၀ဲလီၤ. ပှၤအါဂၤဘၣ်ယိၣ်ဘၣ်ဘှီ၀ံၤ ပှ့ၤပာ်ဃၣ်၀ဲအါအါဂီၫ်ဂီၫ်အဃိ အပှ့ၤကလံၤဒိၣ်ထီၣ်၀ဲန့ၣ်လီၤ. လၢအပူၤကွံာ်အပှ့ၤမ့ၫ်အိၣ် (၁)ကထိန့ၣ် ခဲအံၤလၢက၀ီၤဒ့ကျးတဖၣ်အပူၤ ဒိၣ်ထီၣ်တုၤ(၂၅၀၀)ကၠးန့ၣ်လီၤ.
စှၤသီအတီၫ်ပူၤ လၢ၀့ၫ်တကူၣ်ကီၫ်ဒိၣ်, သၣ်က့ၣ်တး,ဒီပိၣ်,မ့ကလၣ်တီၣ်ညိးဒီးဘိၣ်တထီၣ်ကီၫ်ဆၣ်တဖၣ်အပူၤ တၫ်ဘၣ်ကူဘၣ်ဂၫ်ဟၢဖၢလူတၫ်ဆါဟဲအါထီၣ်၀ဲအဂ့ၫ် လီၫ်က၀ီၤကမျၢၫ်တဖၣ်တဲ၀ဲန့ၣ်လီၤ.
ဟၢဖၢလူတၫ်ဆါ စးထီၣ်ကဲထီၣ်သးဖဲလါယူၤလံတၢတနွံအတီၫ်ပူၤန့ၣ် ခီဖျိလၢဟၢဖၢလူတၫ်ဆါအဃိ ပှၤသံအိၣ်ထီၣ်တုၤ(၅)ဂၤအဂ့ၫ် ၀့ၫ်တကူၣ်ကမျၢၫ်တဖၣ်တဲ၀ဲန့ၣ်လီၤ. ဘၣ်ဆၣ်သုးကီၣ်ကးတခီ ခီဖျိလၢဟၢဖၢလူတၫ်ဆါအဃိ ပှၤသံတအိၣ်၀ဲဘၣ်အဂ့ၫ် တဲလီၤဃၣ်၀ဲလၢ ထံကီၫ်တၫ်ကစီၣ်သန့တဖၣ်အပူၤန့ၣ်လီၤ.
Ref: RFA
