၁၀.၇.၂၀၂၄
ကီၫ်ယူၣ်ကရ့ပူၤ တၫ်လီၫ်သကုၤရၢရှၢၣ်ခးလီၤလၢမျိာ်သၣ်ယူၤတဖၣ်အဃိ ယူၣ်ကရ့ဖိသၣ်တၫ်ဆါဟံၣ်တဖျၢၣ် ဘၣ်ဟးဂီၤ၀ဲအဂ့ၫ် ယူၣ်ကရ့ပှၤဘၣ်မူဘၣ်ဒါတဖၣ်တဲ၀ဲလီၤ.ယူၣ်ကရ့ဖိသၣ်တၫ်ဆါဟံၣ်အဒိၣ်ကတၢၫ်လၢအမ့ၫ် Ohmatdytတၫ်ဆါဟံၣ်အံၤ မျိာ်သၣ်ဘၣ်အီၤအဃိ ပှၤဘၣ်သံ(၂)ဂၤန့ၣ်လီၤ.ပှၤသံ(၂)ဂၤန့ၣ် မ့ၫ်၀ဲသးပှၫ်ဒီး ကသံၣ် သရၣ်တဂၤန့ၣ်လီၤ.
တၫ်ဆါဟံၣ်တၫ်ဟးဂုၤဟးဂီၤအဖီလာ် ပှၤလၢအိၣ်ကးတံာ်အသးတဖၣ် ပှၤမၤပူၤဖျဲးထီၣ်တၫ်တဖၣ်ဟးဃု၀ဲလီၤ. ရၢရှၢၣ်အတၫ်ခးလီၤတဖၣ်အပူၤ ပှၤဘၣ်သံခဲလၢာ်ပာ်ဖှိၣ်အိၣ်၀ဲ(၃၆)ဂၤဒီးဘၣ်ဒိဘၣ်ထံး(၁၄၉)ဂၤအဂ့ၫ် ယူၣ်ကရ့ကီၫ်ခိၣ်၀ဲၤဒၢး ဘိးဘၣ်ပာ်ဖျါ၀ဲလီၤ.
တၫ်ဒုးတဘျီအံၤ ရၢရှၢၣ်တကပၤဂ့ၫ်လိာ်ဃာ်၀ဲ၀ံၤ တဲ၀ဲလၢယူၣ်ကရ့ကလံၤကျါတၫ်ဒီသဒၢသနူအက့အခီတဖၣ်ဘၣ်၀ဲလီၤ.ယူၣ်ကရ့တခီတဲ၀ဲလၢ တၫ်ဒုးအပူၤ ထံၣ်၀ဲရၢရှၢၣ်ခရူးမျိာ်သၣ် (ရုရှားခရုဇ်ဒုံးကျည်)အက့အခီတဖၣ်လီၤ.
ရၢရှၢၣ်န့ၣ် လၢတယံာ်ဒံးဘၣ်အတီၫ်ပူၤ မၤဆူၣ်ထီၣ်၀ဲတၫ်ဒုးတၫ်ယၤ ဖဲယူၣ်ကရ့ကီၫ်ဆၢတၫ်လီၫ်တဖၣ်၀ံၤ ယူၣ်ကရ့ အဂံၫ်ဘါသဟီၣ်တၫ်သူၣ်ထီၣ်တဖၣ်စ့ၫ်ကီး ပညိၣ်ဒုး၀ဲခဲအံၤခဲအံၤန့ၣ်လီၤ.ယူၣ်ကရ့ကီၫ်ခၣ်တခီ ဃ့ထီၣ်ကဒီး၀ဲကလံၤကျါတၫ်ဒီသဒၢသနူတဖၣ်ဆူ အသိၣ်မှံၤထံကီၫ်တဖၣ်အိၣ်န့ၣ်လီၤ. တၫ်အိၣ်သးဒ်သိးအံၤအဃိ ယူၣ်ကရ့အဂီၫ် သုးဂ့ၫ်၀ီတၫ်မၤစၢၤတဖၣ်န့ၣ် တၫ်ကဟ့ၣ်ကဒီးလၢခံတနံၣ်အဂီၫ် လၢ၀ၣ်ရှ့ၣ်တၢၣ် တၫ်ကမၤ၀ဲန့ၣ်တိတၫ်အိၣ်ဖှိၣ်အပူၤ တၫ်ကအၢၣ်လီၤတူၫ်လိာ်၀ဲအိၣ်န့ၣ်လီၤ.
Ref: VOM
