၁၀.၇.၂၀၂၄
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ချၢၣ်လွံၣ်ထူၣ်ကီၫ်ရ့ၣ်, လၢၫ်ဒိၣ်ကီၫ်ဆၣ်ဟီၣ်က၀ီၤ, ဒူသ၀ီတဖၣ်အပူၤ သုးကီၣ်ကးခးလီၤကျိဖးဒိၣ်(၂၅)ဖျၢၣ်ဘျဲၣ်အဃိ လီၫ်က၀ီၤကမျၢၫ်(၂)ဂၤသံ၀ဲဒီး ကမျၢၫ်ဟံၣ်(၁)ဖျၢၣ်ဟးဂီၤကွံာ်၀ဲအဂ့ၫ် လၢၫ်ဒိၣ်ကီၫ်ဆၣ်ပှၤကတိၤတၫ်ပၢ ပဒိၣ်စီၤ၀ါမုၫ်တဲဘၣ်အၣ်ထူခ့ၣ်န့ၣ်လီၤ.
“ထဲဒၣ်လါယူၤလံ(၈)သီ, တနံၤအတီၫ်ပူၤန့ၣ် သုးကီၣ်ကးအသုးတဖၣ် ခးလီၤကျိဖးဒိၣ်တဖၣ် ဆူလၢၫ်ဒိၣ်ကီၫ်ဆၣ်ဟီၣ်က၀ီၤ သ၀ီကရူၫ်(၄)ဘ့ၣ်အပူၤ“အဂ့ၫ် စံး၀ဲန့ၣ်လီၤ.
တနံၤဃီဖဲဂီၤအဆၢကတီၫ် သုးကီၣ်ကးအသုး(ခလရ-၂၆၄)လၢအိၣ်ဆီလီၤအသးဖဲ ၀့ၫ်ပ့စလိး ဒီး သုးကီၣ်ကးအသုးလၢအိၣ်ဆီလီၤအသဖဲ လ့ၣ်မ့ၣ်အူတၫ်ပတုာ်လီၫ်တဖၣ် ခးလီၤကျိဖးဒိၣ်ဆူ လၢၫ်ဒိၣ်ကီၫ်ဆၣ်, တီၣ်ခ့ၣ်ကရူၫ်ပူၤ(၆)ဖျၢၣ်န့ၣ်လီၤ.
လါယူၤလံ(၈)သီအနံၤ, မုၫ်ထီၣ်(၁၁း၂၅)နၣ်ရံၣ်အဆၢကတီၫ် သုးကီၣ်ကးအသုး(ခလရ-၂၆၄)အံၤ ခးလီၤနါစိၤကျိးဖးဒိၣ်တဖၣ်အဃိ လဲၤလီၤတဲာ်ပိာ်ဖးထီၣ်၀ဲဒိၣ် ဖဲလ့အ့ၣ်စူသ၀ီပူၤ၀ံၤ ဒူသ၀ီဖိတဂၤလၢအမ့ၫ် အူစိမၠ့းအဟံၣ်(၁)ဖျၢၣ်ဟးဂီၤကွံာ်၀ဲန့ၣ်လီၤ .
တကးဘၣ် ဖဲလၢမုၫ်ထူၣ်(၁၁း၄၀)နၣ်ရံၣ်အဆၢကတီၫ် သုးကီၣ်ကးအသုးတၫ်သမံသမိးတြဲၤလၢအိၣ်ဆီလီၤအသးဖဲ ဟၣ်ရံသ၀ီကရူၫ်, ဘၣ်ဘူၣ်ကိသ၀ီသၣ်လါအဒြိ(၂)ဘ့ၣ်အံၤ ဟဲတ့ၫ်လီၤမ့ၣ်ပိၫ်(၂)ဖျၢၣ်ဆူ တီၣ်ခ့ၣ်ကရူၫ်,လ့အ့ၣ်စူသ၀ီပူၤအဃိ ဒူသ၀ီဖိ(၂)ဂၤလၢအမ့ၫ် ဒီၣ်မိ၀ါ,သးနံၣ်(၄၂)နံၣ်ဒီး ကိၣ်ကၠီၣ်ရဲ,သးနံၣ်(၃၃)နံၣ်(၂)ဂၤ သံ၀ဲအဂ့ၫ် တၫ်သ့ၣ်ညါဘၣ်လၢ ဂံၫ်ခီၣ်ထံးတၫ်ကစီၣ်အအိၣ်န့ၣ်လီၤ.
ဒ်န့ၣ်အသိး ဖဲလၢမုၫ်ထူၣ်ဒီးမုၫ်ဃ့ၫ်လီၤအဆၢကတီၫ် သုးကီၣ်ကးအသုး(ခလရ-၂၆၄)လၢအိၣ်ဆီလီၤအသးဖဲ ၀့ၫ်ပ့စလိးဒီးဘၣ်ဘူၣ်ကိတဖၣ်စ့ၫ်ကီး ခးလီၤကဒီး၀ဲကျိဖးဒိၣ်ဆူ နွါယ့ၣ်ကၠီကရူၫ်ပူၤ(၇)ဖျၢၣ်,လ့အ့ၣ်စူကရူၫ်ပူၤ(၅)ဖျၢၣ် ဒီးအလဲၣ်ကရူၫ်ပူၤ(၁)ဖျၢၣ်အဂ့ၫ် တၫ်သ့ၣ်ညါဘၣ်န့ၣ်လီၤ.
တကးဒံးဘၣ် ဖဲလၢဟါလီၤခီအဆၢကတီၫ်စ့ၫ်ကီး သုးကီၣ်ကးအသုး(ခလရ-၂၆၄)အံၤ ခးလီၤကဒီးကျိဖးဒိၣ်ဒီးဒြိတဖၣ်ဆူ တီၣ်ခ့ၣ်ကရူၫ်ပူၤ(၄)ဖျၢၣ်န့ၣ်လီၤ.
လၢန့ၣ်အမဲာ်ညါ ဖဲအပူၤကွံာ်လါယူၤ(၁)လါအတီၫ်ပူၤစ့ၫ်ကီး သုးကီၣ်ကးအသုးတဖၣ်လၢအမ့ၫ် (ခလရ-၂၆၄),(ခမရ-၃၀၇),(ခလရ-၆၀),ဒီး(ခလရ-၂၀)တဖၣ် ခးလီၤကျိဖးဒိၣ်(၁၈၅)ဖျၢၣ်ဒီးဒြိ(၁)ဖျၢၣ်ဆူ လၢၫ်ဒိၣ်ကီၫ်ဆၣ်ဟီၣ်က၀ီၤပူၤအဃိ လီၫ်က၀ီၤကမျၢၫ်သံ၀ဲ(၈)ဂၤ, ဘၣ်ဒိ(၅)ဂၤ, ဟံၣ်ဟးဂီၤကွံာ်(၄)ဖျၢၣ်ဒီး ကျီၫ်(၂)ဒုဘၣ်ဒိ၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
