လါယူၤလံ(၉)သီ,၂၀၂၄နံၣ်
ကညီကီၫ်စဲၣ်,ကီၫ်ဆၣ်ကီးတရံး,ကျူၫ်တုဟီၣ်က၀ီၤ သုးကီၣ်ကးအသုးဒီးKNLA/PDF သုးပာ်ဖှိၣ်တဖၣ် တၫ်ဒုးကဲထီၣ် ကိးမုၫ်နံၤဒဲး၀ံၤ ကလံၤကျါတၫ်ခးလီၤတၫ်,ဒရိတၫ်ခးလီၤတၫ်,ကျိဖးဒိၣ်ဒီးတၫ်ခးလိာ်သးတဖၣ် လၢ(၅)သီအတီၫ်ပူၤ ဆူၣ်ထီၣ်၀ဲလီၤ.ကီးတရံးတပူၤ သုးကီၣ်ကးအအီၣ်စ့ၣ်ယး ဒုးယၤတၫ်ရဲၣ်တၫ်ကျဲၤစ့ၫ်ကီး ပာ်ဖှိၣ်အလီၫ်က၀ီၤသုး တဖၣ်၀ံၤ ခီဖျိလၢBGFအတၫ်မၤစၢၤအဖီခိၣ် ကမၤဆူၣ်ထီၣ်တၫ်ဒုးအဂီၫ် စိာ်ဆှၢဃီၤတၫ်စုက၀ဲၤအိၣ်၀ဲအဂ့ၫ်န့ၣ်လီၤ.
သုးကီၣ်ကးအသုးတဖၣ် ခးလီၤတၫ်လၢကလံၤကျါ,ဟဲဒုးဃီၤတၫ်လၢဒရိဒီးခးလီၤကျိဖးဒိၣ်တဖၣ် လၢ(၅)သီအတီၫ်ပူၤ မၤဆူၣ်ထီၣ်၀ဲလီၤ. မ့ၫ်ဒ်သိးကမၤ၀ဲဒုးယၤခံကပၤလၢ သုးပာ်ဖှိၣ်တဖၣ် လၢအိၣ်ဖဲကီးတရံးဒီးရၤမတံအဘၢၣ်စၢၤအဂီၫ် အဂ့ၫ် သုးပာ်ဖှိၣ်ခိၣ်နၫ်တဂၤတဲ၀ဲလီၤ.
“တၫ်အိၣ်သးဒုအိၣ်လၢ ကဒုး၀ဲ ကီးတရံးဒီးရၤမတံ ခံခီယာ်ဘးအဂီၫ်န့ၣ်လီၤ.တၫ်ရဲၣ်တၫ်ကျဲၤအိၣ်လၢ ကကးတံာ်ဒုး၀ဲ တၫ်ပၢၫ်ဆၢသုးပာ်ဖှိၣ်တဖၣ်လၢအိၣ်ဖဲကီးတရံးဒီးရၤမတံအဘၢၣ်စၢၤတဖၣ်န့ၣ်လီၤ.အိၣ်ဖဲန့ၣ်ပူၣ်ခၣ်ကိ(နေပူခံကုန်း)ဒီးခးစိလီၤကျိဖးဒိၣ်ဆူသ၀ီတဖၣ်အပူၤလီၤ.ခးလီၤ၀ဲကွၫ်ဖဲကဘၣ်လီၤ.ခးစိဃီၤကဒီး၀ဲလၢကျဲလီၫ်လံၤတကပၤအဃိ ကမျၢၫ်တၫ်ဘၣ်ဒိဘၣ်ထံးအိၣ်၀ဲန့ၣ်လီၤ.”
ဖဲလါအ့ဖြ့ၣ်အလၢာ်န့ၣ် အီၣ်စ့ၣ်ယးဒုးယၤတၫ်ရဲၣ်တၫ်ကျဲၤအဂီၫ်သုးကီၣ်ကးအသုး လၢကဟဲထီၣ်ဆူရၤမတံတဖၣ် သုးပာ်ဖှိၣ်တဖၣ် ခးအီၤလၢတၫ်ဘၢၣ်စၢၤအဃိ ဘၣ်ဒိဘၣ်ထံးအါမးဒီး ဟဲထီၣ်ဆူရၤမတံတန့ၫ်ဒံးဘၣ်. အသုးဂံၫ်ဘါ တနီၤဘၣ်ဆှၢဃီၤ၀ဲဆူ ရခၢၣ်တကပၤအဃိ အဂံၫ်ဘါလီၤစၫ်၀ဲလီၤ.ဘၣ်ဆၣ်ခီဖျိလၢ သုးခိးကီၫ်ဆၢBGFတၫ်မၤစၢၤ အဖီခိၣ် စိာ်ဆှၢဃီၤတၫ်စုက၀ဲၤတဖၣ်အိၣ်၀ဲအဂ့ၫ်န့ၣ်လီၤ.
“အီၣ်စ့ၣ်ယးသုးကျိၤတခီအဂံၫ်ဘါတအိၣ်လၢလၢပှဲၤပှဲၤလၢၤဘၣ်.တမ့ၫ်သုးကျိၤလၢဟဲထီၣ်ဒီးဒုးယၤအကံၫ်အစီလၢလၢပှဲၤပှဲၤလၢၤဘၣ်.ဟဲထီၣ်မၤပှဲၤအါထီၣ်အသုးဂံၫ်ဘါဖဲကျူၫ်တု,နဘူတဖၣ်အိၣ်၀ဲလီၤ.ခီၣ်ချ့သုးရ့ၣ်(၅၄၅,၅၄၆)တဖၣ်အပူၤ မၤပှဲၤအါထီၣ်သုးဂံၫ်ဘါလီၤ.အ၀ဲသ့ၣ်အဂံၫ်ဘါတအိၣ်လၢၤဘၣ်အဃိ ခီဖျိလၢBGF,ဘိၣပံးအသုးတဖၣ် တၫ်မၤစၢၤအဖီခိၣ် စိာ်ဆှၢတၫ်စုက၀ဲၤအိၣ်၀ဲလီၤ.”
ရၤမတံ,သ့ၣ်ခါညံၣ်နီၣ်တကပၤ ခီၣ်ချ့သုးရ့ၣ်(၂၇၅)သုးကလၢၤအပူၤ BGFတၫ်မၤစၢၤအဖီခိၣ် အ၀ဲသ့ၣ် က့ၤဆီလီၤက့ၤ အသး၀ံၤသ၀ီလၢအိၣ်ဘူးဖဲန့ၣ်တဖၣ်ခးစိဃီၤ၀ဲလၢကျိဖးဒိၣ်အိၣ်၀ဲအဂ့ၫ်လီၫ်က၀ီၤဖိတဖၣ်တဲ၀ဲလီၤ.လၢရွှ့ၣ်မၠးစၣ်ဒံၣ်ဟီၣ်က၀ီၤအသီ(ရွှေမြစန္ဒီကွက်သစ်)ဒီးယွၣ်သံးကိ(ရွာသစ်ကုန်း)တၫ်လီၫ်တဖၣ်စ့ၫ်ကီးတၫ်ဒုးကဲထီၣ်၀ဲလီၤ.ဖဲလါယူၤလံ(၂)သီတုၤ(၇)သီလၢ(၅)သီအတီၫ်ပူၤကမျၢၫ်ဘၣ်ဒိဘၣ်ထံးလၢသုးကီၣ်ကးအကျိဖးဒိၣ်အိၣ်၀ဲတစှၤန့ၣ်(၆)ဂၤအဂ့ၫ်,သုးကီၣ်ကးအကျိဖးဒိၣ်အချံလီၤတဲာ်ပိၫ်ဖး၀ဲဒၣ်ဖဲကီးတရံး,နီၣ်နဲသ၀ီ(နိုင်းကျေးရွာ),တတါကၠိ(တံတားကျိုး)တၫ်လီၫ်တဖၣ်အပူၤအဃိ ကမျၢၫ်တၫ်ဘၣ်ဒိဘၣ်ထံးအိၣ်စ့ၫ်ကီး၀ဲအဂ့ၫ် ပှၤဟူးဂဲၤလၢပှၤဂ့ၫ်၀ီခွဲးယာ် တဖၣ်တဲ၀ဲလီၤ.
